Read O‘zbek tilidagi Muqaddas Kitob, 2013 Hikmatlar 30 Bible Online

Hikmatlar 30 - O‘zbek tilidagi Muqaddas Kitob, 2013 bible

Hikmatlar 30

¹Yoxining o‘g‘li Ag‘urning Ixtiyolga bergan, Itel va O‘xalga aytgan so‘zlari [1]:

²“Rostdan ham odamlar orasida eng aqlsizi ekanman, insonning aql–idroki menda yo‘q.

³Na donolikni o‘rganibman, na Xudoni bilibman.

⁴Kim osmonga ko‘tarilgan, osmondan tushgan? Shamolni hovuchlariga yiqqan kim? Kim suvni o‘z kiyimiga o‘ragan? Yerning barcha chegaralarini o‘rnatgan kim? Uning ismi nima? O‘g‘lining ismi–chi? Bilasan–ku!

⁵Xudoning har bir so‘zi haqiqatdir, O‘zi esa Unga umid bog‘laganning qalqoni.

⁶Uning so‘zlariga qo‘shma, U jazolasa, yolg‘oning fosh etilsa nima qilasan?

⁷Sendan ikki narsani so‘rayman, o‘lmasimdan oldin qilgin.

⁸Soxtalik va yolg‘onni mendan uzoqlashtir, menga qashshoqlik ham, boylik ham emas, faqat nasibamni bergin.

⁹Qornim to‘yganda: “Egam kim o‘zi?” deb aytmayin, kambag‘allikdan o‘g‘irlik qilib Uni badnom qilmayin.

¹⁰Qul seni la’natlamasligi uchun egasiga yomonlama, bo‘lmasa jazolanasan.

¹¹Shunday nasl borki, otasiga la’nat o‘qiydi, onasini duo qilmaydi.

¹²Shunday nasl borki, o‘zining nazarida pok, lekin iflosligidan tozalanmagan.

¹³Shunday nasl bor, ko‘zlari qanchalik takabbur, qarashlari esa mag‘rur.

¹⁴Shunday nasl borki, tishlari — qilich, qoziq tishlari esa pichoq, yer yuzidan kambag‘alni, odamlar orasidan muhtojni yo‘qotadi.

¹⁵Zulukning ikki qizi bor: “Ber, ber!” — deb aytadi. Hech qachon qoniqmaydigan uch narsa, yetarli, demaydigan to‘rt narsa bor.

¹⁶Do‘zax [2], bepusht bachadon, suvsiragan tuproq hamda olov, yetarli, demaydi.

¹⁷Otani mazaxlaydigan, onaga bo‘ysunishni rad etadigan ko‘zlarni quzg‘unlar cho‘qiydi, kalxat bolalari yeydi.

¹⁸Meni hayron qoldiradigan uch narsa bor, to‘rt narsa borki, aqlimga sig‘maydi:

¹⁹Havodagi burgutning yo‘li, tosh ustidagi ilonning yo‘li, dengiz o‘rtasidagi kemaning yo‘li hamda qizga yuradigan erkaklarning yo‘li.

²⁰Zinokor ayolning yo‘li ham shundaydir: u yeb bo‘lgach, og‘zini artib: “Hech bir egrilik qilmadim–ku!” — deydi.

²¹Yer uch narsadan larzaga keladi, to‘rt narsani ko‘tara olmaydi:

²²Qul shohlik qilganda, ahmoq to‘yganda,

²³Yomon ko‘rilgan ayol erga tekkanda, cho‘ri bekasining o‘rnini olganda.

²⁴Yer yuzida to‘rtta kichkina narsa bor, lekin o‘ta dono:

²⁵Chumolilar zaif, lekin yeguligini yozda tayyorlaydi.

²⁶Bo‘rsiq kamquvvat, lekin inini qoyaga quradi.

²⁷Chigirtkalarning [3] sardori yo‘q, lekin barchasi hamjihat yurish qiladi.

²⁸O‘rgimchakni [4] qo‘l bilan ushlasa bo‘ladi, lekin saroyda ham yuradi.

²⁹Yurishi salobatli uch narsa, qadami ulug‘vor to‘rt narsa bor:

³⁰Sher hayvonlar ichida eng kuchlisi, hech nimadan qochmaydi.

³¹Maqtanib yuradigan xo‘roz [5], serka va g‘olib shoh [6].

³²O‘zingni yuqori qo‘yib ahmoqlik yoki yomon niyat qilgan bo‘lsang, og‘zingni qo‘ling bilan yum.

³³Chunki kuv pishsa yog‘ chiqadi, burunga ursa qonaydi, jahlni qo‘zg‘atsa janjal chiqadi.”