Read O‘zbek tilidagi Muqaddas Kitob, 2013 Hikmatlar 31 Bible Online

Hikmatlar 31 - O‘zbek tilidagi Muqaddas Kitob, 2013 bible

Hikmatlar 31

¹Shoh Lemulning so‘zlari. Bu so‘zlarni unga onasi o‘rgatgan:

²“O‘g‘lim, nima desam ekan? Nima deyin, ey, jigarbandim? Xudodan tilab olgan o‘g‘lim, senga ne aytay?

³Quvvatingni xotinlarga berma, shohni buzadiganlarga hayotingni sarf qilma.

⁴Ey, Lemul, shohlar uchun emas sharob, may amaldorlar uchun emas!

⁵Ular ichib qonunni unutadi, ezilgan xalqning hukmida egrilik qiladi.

⁶Mayni halok bo‘layotganga, sharobni esa qayg‘u chekkanga bergin.

⁷Ular ichib kambag‘alligini unutsin, falokatlarini eslamasin.

⁸Og‘zingni gung uchun ochgin, boshiga kulfat tushganlarning tarafini olgin.

⁹Gapir, adolat bilan hukm qil, bechora va kambag‘allarni himoya qil.”

¹⁰[1] Farosatli xotinni kim topa oladi? Uning bahosi gavhardan ham baland.

¹¹Eri unga yurakdan ishonadi, hech narsaga muhtoj bo‘lmaydi.

¹²U eriga yomonlik emas, bir umr yaxshilik qiladi.

¹³Jun va surp topadi, xursand bo‘lib o‘z qo‘li bilan ishlaydi.

¹⁴Savdo kemalari kabi uzoqdan nonini keltiradi.

¹⁵Qorong‘uda o‘rnidan turib, uy ahlini ovqatlantiradi, xizmatkorlariga topshiriq [2] beradi.

¹⁶O‘ylab dala sotib oladi, o‘z qo‘li bilan uzumzor yaratadi.

¹⁷Belini mahkam bog‘lab, qo‘llariga quvvat beradi.

¹⁸Qilgan ishining rohatini ko‘radi, tunlari ham chirog‘i o‘chmaydi.

¹⁹Qo‘lini charxga qo‘yadi, barmoqlari dukni tutadi.

²⁰Kambag‘allarga qo‘lini uzatadi, muhtojlarga rahm qiladi.

²¹Uy ahli uchun qish–qirovdan qo‘rqmaydi, chunki ular hammasi qalin kiyintirilgan.

²²O‘zi uchun so‘zana tikadi, libosi esa kimxob va shoyidandir.

²³Eri yurt oqsoqollari orasida o‘tiradi, shahar darvozasida [3] tanilgan.

²⁴Yana shoyidan kiyim tikib sotadi, savdogarlarga belbog‘ yetkazib beradi.

²⁵Libosi — quvvat, sharaf, u kelajakka qarab quvonadi.

²⁶Donolik bilan so‘zlaydi, mehr bilan nasihat qiladi.

²⁷Uy ahliga yaxshi qaraydi, dangasalik qilmaydi.

²⁸Bolalari turib duo qiladi, eri ham maqtaydi.

²⁹“Farosatli ayollar ko‘p, ammo sen hammasidan a’losan.”

³⁰Joziba aldamchi, chiroy esa o‘tkinchidir, ammo Xudodan qo‘rqadigan ayol ko‘kka ko‘tariladi.

³¹Mehnatining mevasini ko‘rsin, ishlari darvozalarda uni sharaflasin.