Read O‘zbek tilidagi Muqaddas Kitob, 2013 Hikmatlar 4 Bible Online

Hikmatlar 4 - O‘zbek tilidagi Muqaddas Kitob, 2013 bible

Hikmatlar 4

¹O‘g‘illarim, otangizning pand–nasihatlariga quloq solinglar, e’tibor berib farosatli bo‘linglar.

²Sizlarga yaxshi saboq beraman, so‘zlarimdan yuz o‘girmanglar.

³Men ota–onamning yolg‘iz, yosh o‘g‘li edim.

⁴Bolaligimda otam menga shunday derdi: “So‘zlarimni yuragingga jo qilib, amrlarimni bajargin, shunda yashaysan.

⁵Dono bo‘l, idrokli bo‘l, ularni unutma, so‘zlarimdan chiqma.

⁶Donolikdan yuz o‘girma, seni himoya qiladi, uni sevgin, seni asraydi.

⁷Donolikning boshi shudir, dono bo‘l, bor–yo‘g‘ingni berib bo‘lsa ham, idrok ol [1].

⁸Uni hurmat qil, seni ko‘kka ko‘taradi. Uni quchgin, seni shon–shuhratga erishtiradi.

⁹Boshingga iltifot gulchambari, shuhrat tojini kiydiradi.”

¹⁰O‘g‘lim [2], aytganlarimga quloq solib qabul qil, shunda umring uzoq bo‘ladi.

¹¹Senga donolik yo‘llarini o‘rgatdim, to‘g‘ri yo‘ldan olib yurdim.

¹²Yurganingda to‘siqqa uchramaysan, yugurganingda qoqilmaysan.

¹³Yo‘l–yo‘riqlarimni qattiq ushla, qo‘yib yuborma, ularni qo‘riqla, chunki ular hayotingdir.

¹⁴Fosiqning so‘qmoqlariga oyoq bosma, yovuzlar yo‘lidan yurma.

¹⁵Hatto nazar solma, yonidan ham o‘tma, qayrilib uzoqdan yurgin.

¹⁶Chunki ular yomonlik qilmasdan uxlay olmaydi, birortasiga zarar keltirmaguncha uyqulari kelmaydi.

¹⁷Ular fosiqlik nonini yeydi, zo‘ravonlik sharobini ichadi.

¹⁸Solihning yo‘li tongga o‘xshaydi, tong kun chiqquncha yorishaveradi.

¹⁹Fosiqning yo‘li esa zulmat kabidir, nimaga qoqilib ketishini bilmaydi.

²⁰O‘g‘lim, so‘zlarimni eshit, aytganlarimga quloq sol.

²¹Ularni ko‘z oldingdan qochirma, yuragingning qa’rida saqlagin.

²²Chunki ularni topganlarga hayot, butun tani–joniga malham bo‘ladi.

²³Bor kuching bilan qalbingni asra, chunki u hayot bulog‘idir.

²⁴Og‘zingdan egrilikni, tillaringdan ayyorlikni olib tashla.

²⁵Ko‘zlaring to‘g‘riga qarasin, nigohlaring oldingga qaratilgan bo‘lsin.

²⁶To‘g‘ri yo‘lni tanlab yurgin [3], barcha so‘qmoqlaring mustahkam bo‘lsin.

²⁷O‘ngga ham, chapga ham og‘ma, yovuzlikdan uzoqlash.