Read O‘zbek tilidagi Muqaddas Kitob, 2013 Hikmatlar 5 Bible Online

Hikmatlar 5 - O‘zbek tilidagi Muqaddas Kitob, 2013 bible

Hikmatlar 5

¹O‘g‘lim [1], donoligimga e’tibor ber, aql–idrokimga quloq sol,

²toki fahm–farosating yo‘qolmasin, biliming saqlansin.

³Buzuq ayolning tilidan bol tomadi, so‘zlari — malhamday yumshoq,

⁴ammo oqibati zaharday achchiq, xanjarday o‘tkirdir.

⁵Oyoqlari o‘lim tomon yuradi, qadamlari o‘liklar diyoriga [2] yetaklaydi.

⁶U hayotga olib boradigan yo‘lga e’tibor bermaydi, yo‘llari beqaror, o‘zi buni bilmaydi.

⁷O‘g‘lim [3], menga quloq sol, so‘zlarimdan chiqma.

⁸U ayoldan uzoqroq yur, uning eshigiga yaqinlashma.

⁹Bo‘lmasa o‘z obro‘ingni begonalarga, hayotingni esa yovuzlarga berasan.

¹⁰Boyligingdan begonalar bahramand bo‘ladi, mehnat bilan topgan mol–mulking o‘zgalarning uyida bo‘ladi.

¹¹Umring oxirida, vujudingu tanangdan asar qolmagach, faryod qilasan.

¹²O‘shanda shunday deysan: “Men intizom va tanqiddan qanchalik nafratlanar edim–a,

¹³Na ustozlarimga, na nasihat berganlarga quloq solibman.

¹⁴Ana, oqibat jamoa ichida halokat qirg‘og‘iga kelib qoldim.”

¹⁵O‘z sardobangdagi, o‘z qudug‘ingdagi suvni [4] ichaver.

¹⁶Buloqlaring tashqarida, irmoqlaring ko‘chada oqsinmi?

¹⁷Uni begonalar bilan baham ko‘rma, faqat o‘zingniki bo‘lsin.

¹⁸Bulog‘ing suvlari muborak bo‘lsin, ko‘z ochib ko‘rganing bilan quvongin.

¹⁹Jozibali ohu va go‘zal kiyik! Uning og‘ushi seni qoniqtirsin, doim uning sevgisi bilan qanoatlangin.

²⁰Nega endi, o‘g‘lim, begona xotinni ko‘ngling qo‘msaydi? Nimaga begona ayolning og‘ushini quchasan?

²¹Insonning xatti–harakatlari Egamizning ko‘zi oldida, odamning barcha ishlarini kuzatib turadi.

²²Fosiqning ishlari uning o‘zini ushlaydi, gunohlari esa zanjirga soladi.

²³U intizomsizligidan o‘ladi, ahmoqligi tufayli yo‘ldan ozadi.