Read O‘zbek tilidagi Muqaddas Kitob, 2013 Hikmatlar 6 Bible Online

Hikmatlar 6 - O‘zbek tilidagi Muqaddas Kitob, 2013 bible

Hikmatlar 6

¹O‘g‘lim [1], o‘zgaga kafillik qilib, begona bilan ahdlashgan bo‘lsang [2],

²O‘z tilingdan ilinib, so‘zlaring tuzoqqa yetaklagan bo‘lsa,

³o‘g‘lim, o‘zganing qo‘liga tushib qolibsan, o‘zingni qutqar, bor, tiz cho‘kib yolvor.

⁴Ko‘zlaringga na uyqu, na mizg‘ish ber.

⁵Ovchidan qochgan ohu kabi, bedanavoz qo‘lidan qochgan bedanaday o‘zingni qutqar.

⁶Ey, tanbal, chumolilarga bir qara, ularning xatti–harakatlarini ko‘rib dono bo‘l.

⁷Ularning na rahbari, na nazoratchisi, na hukmdori bor.

⁸Lekin ular yozda oziq to‘playdi, o‘rim paytida esa don–dun yig‘ishadi.

⁹Sen–chi, tanbal, qachongacha uxlaysan?! Qachon o‘rningdan turasan?

¹⁰“Biroz uxlay, bir mizg‘ib olay, yonboshlab birpas dam olay”, — deysan.

¹¹Shuning uchun qashshoqlik yo‘lto‘sarday, muhtojlik esa qaroqchiday ustingga keladi.

¹²Ayyor va nopoklar buzuq so‘zlarni gapirib yuradilar.

¹³Ko‘z qisadilar, oyoq–qo‘llari bilan imo–ishora qiladilar.

¹⁴Yuraklarida doim yovuz niyat qilib, odamlar orasida janjal chiqaradilar.

¹⁵Shuning uchun to‘satdan ofatga uchraydilar, shifo topmay to‘satdan halok bo‘ladilar.

¹⁶Olti narsa Egamizga nafratli, yetti narsa jirkanchdir. Bular:

¹⁷manmanlik nigohi, yolg‘onchi til, begunoh qonni to‘kadigan qo‘llar,

¹⁸yomon niyatli yurak, yovuzlikka yuguradigan oyoqlar,

¹⁹yolg‘on gapiradigan soxta guvoh, aka–ukalar orasiga nifoq soluvchilardir.

²⁰O‘g‘lim, otang nasihatlariga quloq sol, onang o‘gitlarini rad etma,

²¹ularni doim yuragingda saqla, bo‘yningga taqib ol.

²²Yurganingda senga yo‘l ko‘rsatadi, uxlaganingda qo‘riqlaydi, uyg‘oqligingda senga gapiradi.

²³Chunki amrlar — chiroq, tanbeh — hayot yo‘li, pand–nasihatlar esa nurdir.

²⁴Ular seni boshqalarning xotinidan, zinokor ayolning shirin so‘zidan saqlaydi.

²⁵Yuragingda uning go‘zalligini orzu qilmagin, ko‘zlariga mahliyo bo‘lma.

²⁶Fohishaga bittagina non haqi yetarli, ammo zino qiluvchi butun hayotingni oladi.

²⁷Kiyimlarni kuydirmasdan qo‘yinga cho‘g‘ solib bo‘ladimi?!

²⁸Oyoqni kuydirmasdan cho‘g‘ ustida yurib bo‘ladimi?!

²⁹O‘zganing xotini oldiga kirganning ahvoli ham shunday, begona ayolga tekkan jazosiz qolmaydi.

³⁰Qorni ochligidan o‘zini to‘ydirish uchun o‘g‘irlik qilsa, odamlar undan nafratlanmaydi.

³¹Lekin qo‘lga tushib qolganda o‘g‘irlangan molining haqini yetti barobar qilib qaytarishi kerak.

³²Zino qilgan aqlsizdir, o‘zini o‘zi nobud qiladi.

³³U ko‘p kaltak yeb sharmanda bo‘ladi, bir umrga badnom bo‘ladi.

³⁴Chunki rashk erni g‘azablantiradi, er qasos olganda shafqat qilmaydi.

³⁵Har qanday hadyani rad etadi, qancha pora bersang olmaydi.