Read O‘zbek tilidagi Muqaddas Kitob, 2013 Hikmatlar 7 Bible Online

Hikmatlar 7 - O‘zbek tilidagi Muqaddas Kitob, 2013 bible

Hikmatlar 7

¹O‘g‘lim [1], so‘zlarimni asra, amrlarimni dilingda saqla.

²Amrlarimni saqlab yasha, ta’limotimni ko‘z qorachig‘ingdek asra.

³Ularni barmog‘ingga bog‘la, yuraging qa’riga yozib qo‘y.

⁴Donolikni singlim, aql–idrokni esa qardoshim deb atagin.

⁵Ular seni zinokordan, tilyog‘lama buzuq ayoldan asraydi.

⁶Uyimning deraza panjarasi ortidan qaradim,

⁷sodda [2] yoshlarning orasida, bir aqlsiz yigitni ko‘rib qoldim.

⁸Yigit ko‘chadan o‘tib, zinokor ayolning uyi tomon ketayotgan edi.

⁹Oqshom. Kech. Tun qorong‘i edi.

¹⁰Shunda fohishaga o‘xshab kiyingan, makkor niyatli ayol uni kutib olgani chiqdi.

¹¹U shallaqi, o‘jar, hech qachon uyida turmaydi.

¹²Bir qarasang ko‘chada, bir qarasang maydonda, yana bir qarasang har xil burchakda turgan bo‘ladi.

¹³U yigitni quchoqlab, o‘pib, benomuslarcha shunday dedi:

¹⁴“Bugun qurbonlik keltirdim, va’dalarimni bajardim [3].

¹⁵Shuning uchun seni kutib olishga chiqdim, seni qidirib topdim.

¹⁶O‘rnimni Misrdan keltirilgan rangli mato bilan bezadim.

¹⁷Mirra, dolchin, xushbo‘y atirlar sepdim.

¹⁸Qani, yur, tongga qadar kuyov–kelinday rohat qilaylik, huzur–halovat qilaylik.

¹⁹Erim hozir uyda emas, uzoq safarga ketgan.

²⁰Bir hamyon kumush tanga olib ketgan, oy to‘lmaguncha qaytib kelmaydi.”

²¹Ko‘p shirin so‘zlar va muloyim gaplar bilan u yigitni yo‘ldan urdi.

²²Yigit o‘sha zahotiyoq, qushxonaga ketayotgan ho‘kizday, tuzoqqa oyoq qo‘yayotgan kiyikday [4] uning orqasidan ergashdi.

²³U tuzoqqa kirayotgan qushday, nayza jigariga tegmaguncha hayotini yo‘qotishini bilmaydi.

²⁴O‘g‘illarim, menga quloq solib, so‘zlarimga e’tibor beringlar.

²⁵Yuragingiz o‘sha ayolning yo‘liga burilmasin, uning so‘qmoqlarida adashmang.

²⁶U ko‘plarni halok qildi, qurbonlari ham ko‘p.

²⁷Uning uyi o‘liklar diyoriga [5] yetaklovchi yo‘ldir, o‘limga olib boradi.