Read O‘zbek tilidagi Muqaddas Kitob, 2013 Hikmatlar 8 Bible Online

Hikmatlar 8 - O‘zbek tilidagi Muqaddas Kitob, 2013 bible

Hikmatlar 8

¹Donolik [1] chorlamaydimi?! Idrok ovozini baland qilib chaqirmaydimi?!

²Qir–adirlarda, yo‘l bo‘ylarida, chorrahalarda,

³shahar darvozalarida [2], eshiklar oldida turib jar soladi:

⁴“Ey, insonlar, sizlarni chaqiryapman, odamzodga gapirmoqdaman.

⁵Soddalar [3], fahm–farosatli bo‘ling, siz, nodonlar, esa idrokli.

⁶Quloq soling, men a’lo gaplarni gapiraman, rostini aytaman.

⁷Chunki tilim haqiqatni gapiradi, fosiqlikdan esa nafratlanadi.

⁸Hamma so‘zlarim to‘g‘ridir, ularda na egrilik, na buzuqlik bor.

⁹Farosatlilarga ravshan, bilim oladiganlarga esa to‘g‘ridir.

¹⁰Kumush o‘rniga nasihatlarimni, oltin o‘rniga esa ilm–ma’rifatni tanlang.

¹¹Chunki donolik qo‘hinurdan a’loroqdir, hech qanday shodlik U bilan tenglasha olmaydi.

¹²Men, Donolik [4], aql–idrok bilan yashayman, bilim va fahm–farosat mendadir.

¹³Egamizdan qo‘rqish [5] yomonlikdan nafratlanish demakdir. Men mag‘rurlik va manmanlikdan, yovuzlik va buzuq tildan nafratlanaman.

¹⁴Menda maslahat va haqiqat bor, Men idrokman, quvvatu kuch ham Mendadir.

¹⁵Shohlar men orqali hukm suradilar, hukmdorlar to‘g‘ri qonunlar chiqaradilar.

¹⁶Men orqali rahbarlar boshqaradilar, amaldor va barcha odil hakamlar hukm chiqaradilar.

¹⁷Kim Meni sevsa o‘shani sevaman, astoydil izlaganlar Meni topadilar.

¹⁸Boylik, shuhrat, bitmas–tuganmas xazina, farovonlik Mendadir.

¹⁹Mening hosilim toza oltindan ham, tanlangan kumushdan ham yaxshiroq.

²⁰Men to‘g‘ri yo‘ldan, adolat so‘qmoqlaridan yuraman.

²¹Meni sevganlar boylikni meros qilib oladilar, ularning xazinasini to‘ldiraman.

²²Egamiz ishini boshlamasidan oldin, O‘z ishlarining boshida Menga ega edi.

²³Qadimdayoq, eng boshida, dunyo yaratilmasdan oldin, Men tayinlangan edim.

²⁴Tubsiz dengizu, bepoyon ummon, yo birorta buloq ko‘z ochmay turib, Men dunyoga keltirilganman.

²⁵Tog‘u tosh, qir–adir barpo bo‘lmasdan oldin Men tavallud topganman.

²⁶U hali na yer, na dalalarni, na yerning tuprog‘ini yaratgan edi.

²⁷Xudo osmonni yaratganda, bepoyon ummon uzra falakni barpo etganda, Men o‘sha yerda edim.

²⁸Osmonga bulutlarni joylab, dengizlarni suv bilan to‘ldirgan chog‘da,

²⁹U suv toshib ketmasin deb amr berganda, yerga asos solganda [6],

³⁰Men uning yonida musavvir edim, qoshida kundan–kunga zavqlanib, doimo quvonardim.

³¹Dunyoda, Uning yerida odamzod bilan xursand bo‘lardim.

³²O‘g‘illarim, menga quloq solinglar, yo‘limdan yurganlar baxtlidir.

³³Pand–nasihatlarimni tinglab dono bo‘linglar, uni rad etmanglar.

³⁴Har kun ostonamda kutib, eshigimni poylab, so‘zlarimga quloq soladigan baxtlidir.

³⁵Chunki Meni topgan hayot topadi, Egamizning marhamatiga sazovor bo‘ladi.

³⁶Ko‘zdan yo‘qotgan o‘ziga zarar yetkazadi, Mendan nafratlangan o‘limni sevadi.”