Read O‘zbek tilidagi Muqaddas Kitob, 2013 Voiz 10 Bible Online

Voiz 10 - O‘zbek tilidagi Muqaddas Kitob, 2013 bible

Voiz 10

¹O‘lik pashshalar xushbo‘y moyni sasitib yuboradi, shuningdek, ozgina ahmoqlik ko‘p donolikdan og‘irroq chiqadi.

²Dononing yuragi o‘ngga — to‘g‘ri ishlarni qilishga, nodonniki esa chapga — fosiqlikka tortadi.

³Ahmoqlarning aqli yetmay, qilgan qiliqlari bilan ham hammaga ahmoqligini ko‘rsatadi.

⁴Agar hukmdorning sendan jahli chiqsa, joyingni tashlab ketmagin, chunki vazminlik tufayli xafagarchiliklar ham bosilib ketadi.

⁵Mana men bu dunyoda ko‘rgan fojia, hukmdordan boshlangan katta xato:

⁶ahmoqlar baland lavozimga ko‘tariladi, boylar esa pastda o‘tirishadi.

⁷Men yana shuni ko‘rdim: zodagonlar xuddi qullarday piyoda yurganda, qullar otda yurardi.

⁸Chuqur qaziganning o‘zi unga tushishi, devorni buzganni esa ilon chaqishi mumkin.

⁹Tosh kesgan o‘ziga zarar yetkazishi, xoda yorgan esa og‘riqqa duchor bo‘lishi mumkin.

¹⁰Agar bolta o‘tmas bo‘lsa–yu, uni o‘tkirlamasang, uni ishlatish uchun ko‘proq kuch kerak bo‘ladi. Mana, donolikdan qanday foyda bor ekan.

¹¹Ammo ilon o‘ynatilmasdan oldin chaqib olsa, ilon o‘ynatuvchiga donishmandlikning nima foydasi bor?!

¹²Donolarning so‘zlari ularga hurmat keltiradi, nodonlarning so‘zlari esa o‘zlarini halok qiladi.

¹³Ularning so‘zlari ahmoqlik bilan boshlanib, g‘irt telbalik bilan tugaydi,

¹⁴shunda ham ahmoqlar gapiraveradilar. Hech kim nima bo‘lishini bilmaydi, kim bizga kelajakni aytib bera oladi?!

¹⁵Nodonning harakatlari uni juda charchatadi, chunki u shunchalik ahmoqki, shaharga boradigan yo‘lni ham qayta topa olmaydi.

¹⁶Ey, shohi yosh bo‘lgan, hukmdorlari ertalabdan ziyofat qiladigan yurt, senga afsus–nadomatlar bo‘lsin.

¹⁷Shohi asilzoda bo‘lgan, hukmdorlari mastlik uchun emas, kuch to‘plash uchun o‘z vaqtida ziyofat qiladigan yurt baxtlidir.

¹⁸Dangasalikdan uyning tomi cho‘kadi, Yalqovlik tufayli tomdan chakki o‘tadi.

¹⁹Ziyofat berilganda ko‘ngil shodlikka to‘ladi, Sharob insonni xushnud etadi. Lekin ikkalasi uchun ham pul kerak.

²⁰Hatto sirdosh do‘stlaring orasida ham shohni la’natlama, o‘z yotoqxonangda ham boylarni yomonlama. Yaxshi gapning ham, yomon gapning ham qanoti bordir. Osmondagi qush so‘zlaringni yetkazib borishi mumkin.