Read O‘zbek tilidagi Muqaddas Kitob, 2013 Voiz 11 Bible Online

Voiz 11 - O‘zbek tilidagi Muqaddas Kitob, 2013 bible

Voiz 11

¹Noningni suvga tashla, bir necha kundan keyin uni yana topasan.

²Bu dunyoda qanday kulfat kelishini bilmaysan, shuning uchun narsalaringni yetti, hatto sakkiz kishiga bo‘lib bergin [1].

³Bulutlar to‘lganda, yerga yomg‘ir yog‘adi, daraxt shimol tomonga yoki janub tomonga yiqilsa ham, o‘sha yiqilgan joyida yotaveradi.

⁴Shamolni ko‘rib qo‘rqqan hech qachon urug‘ ekmaydi, yomg‘irdan xavfsirab, bulutni kuzatgan hech qachon hosil o‘rmaydi.

⁵Onaning bachadonidagi bolaga qanday qilib jon [2] kirishini bilmaganingdek, hamma narsani sodir qiladigan Xudoning ishlarini bilmaysan.

⁶Urug‘laringni ertalab ekkin, kechqurun ham qo‘llaring bo‘sh o‘tirmasin, chunki sen qaysi biri — unisimi yoki bunisimi yaxshi o‘sishini bilmaysan, balki ikkalasi ham yaxshi o‘sar.

⁷Yorug‘lik lazzatlidir, quyoshni ko‘rish ko‘zlar uchun ham yoqimlidir.

⁸Uzoq yillar yashaydiganlar ham har bir yashagan kunlaridan zavq olsin, hali ko‘p qorong‘ilik kunlari bo‘lishini esda tutsin. Hamma keladigan narsalar yelday o‘tib ketadi [3].

⁹Ey, yigit, yoshligingda rohatlan, yuraging seni zavqlantirsin. Ko‘ngling orzu qilgan, ko‘zlaring xohlagan ishni qilgin, lekin bilib qo‘y, har bir qilgan ishing uchun Xudo seni hukm qiladi.

¹⁰Qayg‘urmagin, tanang og‘riqni bilmasin, chunki yoshlik, hayot tongi yelday tez o‘tib ketadi.