Read O‘zbek tilidagi Muqaddas Kitob, 2013 Voiz 6 Bible Online

Voiz 6 - O‘zbek tilidagi Muqaddas Kitob, 2013 bible

Voiz 6

¹Bu dunyoda shunday bir fojiani ko‘rdim, u inson zotini toshday bosib turadi:

²Xudo ba’zilarga boylik, mulk va obro‘ beradi, bu insonlar ko‘ngli xohlagan narsaga ega bo‘ladi. Lekin Xudo ularga bu narsalardan zavq olishga yo‘l bermasa, bir begona bu narsalarning rohatini ko‘radi. Bu behuda [1], qayg‘uli fojiadir.

³Inson yuzta farzandli bo‘lishi ham mumkin, uzoq umr ko‘rishi ham mumkin, lekin u qancha ko‘p yashasa ham, mana shu hayotning rohatini ko‘rmasa yoki hurmat bilan ko‘milmasa, menimcha, o‘lik tug‘ilgan bolaning taqdiri unikidan yaxshiroqdir.

⁴Bu bola behuda dunyoga kelib, olamdan o‘tadi. Hech kim uni bilib tanimaydi.

⁵[5-6] U quyosh yuzini ko‘rmagan, hayot nimaligini bilmagan. Shunday bo‘lsa ham, ikki ming yil yashab hayotning rohatini ko‘rmagan kishidan ko‘ra, ko‘proq o‘sha bola orom oladi. Baribir hamma bir joyga [2] boradi–ku!

⁷Insonning barcha mehnatiyu intilishlari o‘z qornini to‘ydirish uchundir, shunda ham u hech qachon qoniqmaydi.

⁸Donolarning nodonlardan qanday ustunligi bor? Kambag‘allar bu hayotni uddalab yashashga aqllari yetsa ham, ularga bundan nima foyda bor?!

⁹Ko‘z oldingda turgan narsa havas qilingandan yaxshiroqdir. Doimo mol–mulkim ko‘paysin, deb havas qilish behudadir, shamolning orqasidan quvishdaydir.

¹⁰Dunyoda nima bo‘lsa, hammasi allaqachon belgilangan, insonning taqdiri ham ma’lum, hech bir kishi hammadan kuchli bo‘lgan Xudo bilan bahslasha olmaydi.

¹¹Qancha ko‘p bahslashsang, shuncha behudadir, senga hech qanday foydasi yo‘q.

¹²Hayot yelday o‘tib ketar [3], inson uchun nima yaxshiligini kim biladi?! Xudo hayotimizni o‘tib ketadigan soyadek qilib qo‘ygan, kim ham bizga kelajakda nima bo‘lishini aytib bera olardi?!