Read O‘zbek tilidagi Muqaddas Kitob, 2013 Voiz 7 Bible Online

Voiz 7 - O‘zbek tilidagi Muqaddas Kitob, 2013 bible

Voiz 7

¹Yaxshi nom qimmatbaho xushbo‘y moydan [1], o‘lim kuni esa tug‘ilgan kundan yaxshiroqdir.

²To‘y bo‘layotgan uyga borishdan ko‘ra, azador xonadonga borish yaxshiroq, chunki hammaning taqdiri bir, hayot bo‘lganlar buni unutmasinlar.

³Qayg‘u kulgidan yaxshiroqdir, qayg‘uli yuz yurakka yaxshi.

⁴Dononing qalbi azador uydagilar bilandir, nodon esa doimo xursandchilik haqida o‘ylaydi.

⁵Dono odamning tanbehini eshitish nodonning maqtovlaridan yaxshiroq,

⁶chunki nodonning maqtov kuyi qozonning ostida yonib turgan yantoqning chirsillashiga o‘xshaydi. Ammo bu ham behuda [2], chunki

⁷do‘q–po‘pisa dononi ham telba qiladi, pora esa yurakni egri qiladi.

⁸Hamma narsaning oxiri — boshidan, sabr–toqat — mag‘rurlikdan yaxshiroqdir.

⁹Jahldor bo‘lmagin, chunki jahl nodonlarning yuragida uy quradi.

¹⁰“Nima uchun o‘tmish kunlar hozirgilardan yaxshiroq edi?” — deb so‘ramagin, bu savolni so‘rash donolikdan emas.

¹¹Donolik xuddi meros kabi yaxshidir, bu dunyoda hayot bo‘lganlarga foydalidir.

¹²Donolik ham pul kabi vaqtinchalik orom beradi, donolik hayotga chidashga yordam beradi, ilm–ma’rifat foyda keltiradi.

¹³Xudo qilgan ishlarga qaragin, U egri qilgan narsalarni kim ham to‘g‘rilay olardi?!

¹⁴Baxtli kunlaringda quvongin, qayg‘uli kunlaringda esa shuni esingda tut, quvonchni ham, qayg‘uni ham Xudo yaratgan. Hech kim kelajakda nima bo‘lishini aytib bera olmaydi [3].

¹⁵Mana shu behuda hayotim davomida hamma narsani ko‘rdim. Solih insonlar solih bo‘lsalar ham halok bo‘ladilar, fosiqlar esa o‘z fosiqliklari bilan uzoq umr ko‘radilar.

¹⁶Qonunparast bo‘lma, donoligingga juda ham ishonaverma, nima uchun o‘zingni o‘zing halok qilishing kerak?! [4].

¹⁷Ammo shakkok yoki ahmoq ham bo‘lmagin, nima uchun ajaling yetmay turib vafot etishing kerak?!

¹⁸Bu nasihatlarning birini tutib, ikkinchisini unutma. Xudodan qo‘rqqan ikkisini ham esda tutadi.

¹⁹Donolik insonni shahardagi o‘nta hukmdordan qudratliroq qiladi.

²⁰Lekin bu dunyoda har doim solihlik qilib, umuman gunoh qilmaydigan inson yo‘qdir.

²¹Xizmatkoring seni yomonlayotganini eshitib qolmasliging uchun, odamlar gapirayotgan hamma narsaga ham e’tibor beravermagin.

²²O‘zing bilasan, sen o‘zing ham boshqalarni juda ko‘p yomonlagansan–ku!

²³Bularning hammasini donoligim bilan sinab ko‘rdim, o‘zimga: “Donolikka erishaman”, — dedim, lekin unga yeta olmadim.

²⁴Hamma sodir bo‘ladigan narsalarning ma’nosi juda chuqur, yetib bo‘lmasdir. Kim ham uni topa olardi?!

²⁵Shunda men donolikni qidirib topishga, har bir sodir bo‘lgan narsani tushunishga o‘zimni bag‘ishladim. Fosiqlik nodonlik ekanligini, ahmoqlik telbalik ekanligini o‘z hayotimda isbotlamoqchi bo‘ldim.

²⁶Men mana bu narsani bildim. Ahmoqlik bir ayolga o‘xshaydi. U o‘zi tuzoq, yuragi to‘r, qo‘llari esa zanjirdaydir. U o‘limdan ham achchiqroq ekan. Xudoga ma’qul keladigan ishlarni qiladiganlar undan qocha oladilar, lekin gunohkor uning qo‘llariga tushadi.

²⁷[27-28] Voiz [5] shunday dedi: “Bekorga har bir sodir bo‘lgan narsaning ma’nosini qidirib (bu ma’noni juda sinchkovlik bilan izlagan bo‘lsam ham), mana shu narsani tushunib yetdim: minglar orasida bitta solih kishini topdim, shularning orasidan bitta ham solih ayol topa olmadim.

²⁹Ammo mana bu bir narsani angladim, qarang, Xudo insonni to‘g‘ri qilib yaratgan, lekin u har xil qabih rejalar tuzadi.”