Read O‘zbek tilidagi Muqaddas Kitob, 2013 Voiz 9 Bible Online

Voiz 9 - O‘zbek tilidagi Muqaddas Kitob, 2013 bible

Voiz 9

¹Bularning hammasini yuragimga joylab, ular haqida yaxshilab o‘yladim: solihlar ham, donolar ham, ularning ishlari ham Xudoning qo‘lida ekan, hatto ularning sevgisi ham, nafrati ham Xudoning qo‘li ostida ekan. Hech kim kelajakda nima bo‘lishini bilmaydi.

²Hammaning taqdiri bir xil, solihning ham, fosiqning ham, yaxshining ham, yomonning [1] ham, halolning ham, haromning ham, qurbonlik qiladiganlarning ham, qurbonlik qilmaydiganlarning ham taqdiri birdir. Gunohkorlarga nima bo‘lsa, yaxshilarga ham shunday bo‘ladi, xudojo‘ylik bilan nazr qiladiganlarning ham, chin ko‘ngildan nazr qilmaydiganlarning ham qismati bir.

³Bu dunyoda bo‘layotgan hamma ishlarning qayg‘uliligi shundadir: hammaning taqdiri bir xil. Shuning uchun hammaning yuragi g‘azabu alamga to‘la, hayotliklarida yuragi telbalik bilan to‘la. Keyin esa ular bu olamdan o‘tadilar.

⁴Lekin hayot bo‘lganning umidi bor, axir: “Tirik it o‘lik sherdan yaxshiroq”, — deyishadi–ku.

⁵Hayot bo‘lganlar hech bo‘lmasa o‘lishlarini biladilar, marhumlar esa hech narsani bilmaydilar. Marhumlar uchun hech qanday mukofot yo‘q, vaqti kelib hech kim ularni yodga ham olmaydi.

⁶Ular sevgan, nafratlangan va jon kuydirgan narsalarning hammasi o‘tib ketgan. Bundan keyin ular hech qachon bu dunyoda bo‘layotgan narsalarga qo‘shila olmaydilar.

⁷Marhamat, noningizni shodlik bilan yeyavering, sharobingizni quvnoq yurak bilan ichavering, chunki Xudo shunday qilishingizni ma’qul ko‘rgan.

⁸Kiyimlaringiz har doim oppoq bo‘lsin, boshingizdan xushbo‘y moy arimasin.

⁹Bu dunyodagi sizga berilgan umr davomida o‘z sevgan xotiningiz bilan tez o‘tib ketadigan [2] bu hayotdan zavqlaning. Hayotingiz va dunyoda qiladigan mehnatlaringiz davomida sizga shunday imkoniyatni Xudo bergan.

¹⁰Nima qilsangiz ham bor kuchingiz bilan qiling, chunki siz borayotgan joy — o‘liklar diyorida [3] hech qanday ish, fahm–idrok, ilm–ma’rifat yoki donolik yo‘qdir.

¹¹Men yana bir narsani tushundim, bu dunyoda: Musobaqada g‘alaba doimo tez yugurganga, Jangda g‘alaba doim kuchliga nasib etmas ekan. Mol–mulk doimo donoga, Boylik ham doim uddaburonga nasib etmas ekan. Omad doimo bilimdonga kelavermas ekan. Ha, kuni kelib, hammaning ham omadi ketadi.

¹²Kulfat qachon kelishini hech kim bilmaydi. To‘rga tushib qolgan baliq va tuzoqqa ilingan qushlarday, insonlar ham boshlariga kulfat tushganda birdaniga tutilib qoladilar.

¹³Bu dunyoda men donolik haqida quyidagi berilgan namunani ko‘rdim. Menimcha bu juda ham muhim edi.

¹⁴Kichkina bir shaharcha bo‘lgan ekan, unda yashovchilarning soni ham ko‘p emas ekan. Bir qudratli shoh bostirib kelib, mana shu shaharchani qurshovga olibdi. Shaharchani qo‘lga kiritish uchun katta tayyorgarliklar ko‘rib, baland qurilmalar yasabdi.

¹⁵Bu shaharda bir kishi yashar ekan. O‘zi kambag‘al, lekin dono ekan. U o‘zining donoligi bilan shaharni qutqarib qolishi mumkin edi, lekin bu kambag‘al kishini hech kim esga olmadi [4].

¹⁶Men o‘zimga: “Donolik qudratdan yaxshiroq bo‘lsa ham, kambag‘al kishining donoligini hech kim qadrlamaydi, uning so‘zlariga quloq solmaydi”, — dedim.

¹⁷Shunday bo‘lsa ham, Dono kishining xotirjamlik bilan aytgan so‘zlari nodon hukmdorning baland ovoz bilan aytgan so‘zlaridan afzalroqdir.

¹⁸Donolik urush qurollaridan yaxshiroqdir, lekin bir befarosat ko‘p yaxshilarni buzadi.