Read O‘zbek tilidagi Muqaddas Kitob, 2013 Qo‘shiq 2 Bible Online

Qo‘shiq 2 - O‘zbek tilidagi Muqaddas Kitob, 2013 bible

Qo‘shiq 2

¹Men Sharon atirguliman, Vodiylar nilufaridirman.

²Mening sevgilim qizlar orasida, Tikanlar orasidagi nilufar gulidaydir!

³Mening sevgilim yigitlar orasida, O‘rmon daraxtlari orasidagi olma daraxtiday ajralib turar. Men uning soyasida o‘tirib zavq olaman, Uning mevasi juda shirindir.

⁴U meni o‘z mehmonxonasiga olib kirdi, Meni o‘z sevgisi bilan qopladi.

⁵Mayizlar yedirib, menga kuch bergin, Olmalar bilan quvvatga to‘ldirgin, Axir, sevgilimning ishqi dardida yonmoqdaman.

⁶Uning chap qo‘li boshim ostidadir, O‘ng qo‘li bilan esa meni quchoqlaydi!

⁷Ey Quddus qizlari, Kiyigu yovvoyi ohular haqi ont iching. Vaqt–soati kelmaguncha, Sevgini qo‘zg‘atmang, uyg‘otmang.

⁸Sevgilim ovozi eshitilyapti, Ana qaranglar, u kelyapti. Tog‘laru qirlar osha kelyapti.

⁹Sevgilim ohuday, yosh kiyikdaydir. Mana, u devor ortida turibdi. Oynalardan mo‘ralab, Panjaralar orasidan qarab turibdi.

¹⁰Sevgilim menga shunday deydi: “Tura qol, sevgilim, oppog‘im, Men bilan yurgin.

¹¹Mana qish o‘tdi, yomg‘irlar to‘xtadi.

¹²Yer yuzi gullar bilan qoplanmoqda, Yurt bo‘ylab kabutarlar kuyi eshitilmoqda, Qo‘shiq kuylash vaqti yetib keldi.

¹³Anjir meva tugishni boshladi, Toklar ham gulga kirdi. Ular xushbo‘y hidlarini taratmoqda. Tura qol, sevgilim, oppog‘im, Men bilan yurgin.”

¹⁴Sevgilim, sen tog‘larda yashaydigan, Qoyalarda yashirinadigan kabutardaysan. Yuzingni ko‘rsatgin, ovozingni eshitay. Ovozing juda shirin, yuzing go‘zaldir.

¹⁵Qarang, uzumzorimiz gullab yotibdi, Kichkina tulkilarni ushlanglar. Axir, ular uzumzorlarni vayron qiladi.

¹⁶Sevgilim menikidir, men esa unikiman, U nilufarlar terib, o‘z bog‘idan zavq oladi.

¹⁷Tong otmay turib, boraqol jonim. Baland tog‘larda sakraydigan ohu, kiyikday bo‘lib, Qorong‘ulik chekinmasdan oldin, qaytib keta qol.