Read O‘zbek tilidagi Muqaddas Kitob, 2013 Qo‘shiq 5 Bible Online

Qo‘shiq 5 - O‘zbek tilidagi Muqaddas Kitob, 2013 bible

Qo‘shiq 5

¹Ey jonim, kelinchagim, bog‘imga kelib, Mirra va ziravorlarimni to‘playman. Asalari mumini hamda asalimni yeyman, Sut va sharobimni ichaman. To‘yguningcha yegin, sevgilim, Sevgidan ichib, qoniqqin.

²Uxladim, lekin yuragim uyg‘oq edi. Ana, sevgilim chaqirmoqda: “Ochgin eshigingni, jonim, sevgilim, Kabutarim, komilim. Boshim ho‘ldir shudringdan, Sochlarim esa tun shabnamidan.”

³Kiyimlarimni yechib qo‘yganman, Qanday qilib yana kiyaman?! Oyoqlarim yuvilgan, Ularni kir qilaymi?!

⁴Sevgilim qo‘lini eshik teshigidan kirgizganda, Butun vujudim titrab ketdi.

⁵Sevgilimni kirg‘izay, deya turdim. Qo‘llarimdagi mirra, Eshikning tutqichlariga oqib tushdi.

⁶Sevgilimga eshikni ochdim, Lekin u ketib qolibdi. U ketganiga yurak–bag‘rim ezildi. Qidirib, uni topa olmadim, Chaqirdim, lekin u javob bermadi.

⁷Shaharni aylanib yurgan qo‘riqchilar Meni ko‘rib qoldilar. Ular meni urib yaraladilar. O‘sha shahar qo‘riqchilari Ustimdagi ro‘molimni olib qo‘ydilar.

⁸Ey Quddus qizlari, va’da beringlar, Sevgilimni topsangiz, aytib qo‘yinglar, Uning ishqi dardida yonmoqdaman.

⁹Ey ayollar go‘zali, Sevgilingning boshqalardan nimasi ortiq?! Uning boshqalardan nimasi ortiqki, Sen bizga, va’da beringlar, deb aytasan?!

¹⁰Sevgilim qo‘hlik, chiroylidir, O‘n mingtaning ichida ajralib turar.

¹¹Boshi eng a’lo tilladay go‘zal, Jingalak sochlari qarg‘aday qop–qoradir.

¹²Ko‘zlari esa buloqlar bo‘yidagi kabutarlarday, Chashmalar bo‘yidagi, sutga cho‘mdirilgan kaptarlardaydir.

¹³Uning yonoqlari muattar hidli Ziravor bog‘lari kabi juda xushbo‘ydir. Lablari esa mirra oqib turgan Nilufarlar kabi shirindir.

¹⁴Qo‘llari tilladan yasalib, Topaz toshlar bilan bezatilganga o‘xshaydi. Tanasi esa zangori yoqutlar o‘rnatilgan Tep–tekis fil tishiday chiroylidir.

¹⁵Oyoqlari tilla taglikka o‘rnatilgan Marmar ustunlari kabi kuchlidir. Uning qiyofasi ulug‘vor Lubnonday, Qudratli a’lo sadr daraxtlaridaydir.

¹⁶Uning ovozi juda shirin, O‘zi esa har jihatdan maftunkor. Ey Quddus qizlari, mana shunday yigit Mening sevgilim, do‘stimdir.