Read O‘zbek tilidagi Muqaddas Kitob, 2013 Qo‘shiq 6 Bible Online

Qo‘shiq 6 - O‘zbek tilidagi Muqaddas Kitob, 2013 bible

Qo‘shiq 6

¹Sevgiling qayerga ketdi, Ey go‘zallarning go‘zali? Ayt–chi, qaysi tomonga yo‘l oldi, Biz sen bilan uni qidiraylik.

²Sevgilim o‘z bog‘iga, Xushbo‘y ziravorlar bog‘iga keldi. U nilufar gullar terib, O‘z bog‘idan zavq olgani keldi.

³Men sevgilimniki, sevgilim esa menikidir! U nilufarlar terib, o‘z bog‘idan zavq oladi.

⁴Sen Tirza shahriday go‘zaldirsan, sevgilim, Quddus shahriday xushro‘ydirsan, Bayroqlari ko‘tarilgan qo‘shinday savlatlisan.

⁵Ko‘zlaringni olib qoch mendan, Ular meni maftun qilganlar. Gilad qirlaridan yoyilib tushayotgan Qop–qora qo‘ylardaydir sening sochlaring.

⁶Yuvib–taralgan oppoq Echkilardaydir sening tishlaring. Har birining egizi bor, O‘rni hech bo‘sh qolmagan.

⁷Chachvoning ortidagi yonoqlaring esa Anorlarday qip–qizil.

⁸Ana, oltmishta malika, saksonta kanizak, Son–sanoqsiz qizlar!

⁹Ammo mening kabutarim, Komil sevgilim o‘zgachadir. Onasining erkasi, Tuqqan onasining yagonasidir. Qizlar uni ko‘rib, u baxtlidir, deyishadi, Malikayu kanizaklar uni ko‘rib, maqtashadi.

¹⁰Mahbubamning nigohlari tongdaydir. O‘zi esa to‘lin oyday go‘zal, quyoshday yorqin, Bayroqlari ko‘tarilgan qo‘shinday savlatlidir.

¹¹Men bodomzorga, Vodiy chechaklarini ko‘rishga bordim. Toklaru anorlar gullaganmikin, deya bordim.

¹²Shohona aravada o‘tirganday, Hayajondan titrar edim.