Read O‘zbek tilidagi Muqaddas Kitob, 2013 Qo‘shiq 7 Bible Online

Qo‘shiq 7 - O‘zbek tilidagi Muqaddas Kitob, 2013 bible

Qo‘shiq 7

¹Qaytgin, qaytib kelgin, ey Shulamlik qiz! Qaytib kel, seni yana bir bor ko‘raylik. Nima uchun bu Shulamlik qizga qaraysizlar?! U ikki qator qizlar orasida raqsga tushyaptimi?!

²Ey malikaga o‘xshagan qiz! Kafsh kiygan oyoqlaring qanday chiroyli! Dumaloq sonlaring javohirlarday, Xuddi mohir ustaning qo‘li bilan ishlanganday!

³Doimo xushbo‘y sharobga to‘la bo‘lgan, Dum–dumaloq kosadaydir sening kindiging. Yumaloq qorning esa nilufarlar bilan o‘ralgan, Tillarang bug‘doy uyumi kabidir.

⁴Ko‘kraklaring egizak kiyiklardaydir.

⁵Fil suyagidan qurilgan minoraday go‘zaldir bo‘yning, Batrabim darvozasi yonidagi Xashbon buloqlariday yorqindir ko‘zlaring. Burning esa Damashq shahriga qaragan Lubnon minorasiday tekisdir.

⁶Boshing Karmil tog‘iday baland turadi, Soching kimxobday go‘zal, Hatto shoh ham unga asirdir.

⁷Qanday go‘zal va xushro‘ysan, Huzurbaxsh sevgilim mening.

⁸Palma daraxtiday savlatlisan, Ko‘kraklaring uning mevalariday to‘liqdir.

⁹Men shunday dedim: “Palma daraxtiga chiqib, Mevalaridan ushlayman.” Ko‘kraklaring men uchun uzumday mazali, Nafasing esa olmalarday shirin bo‘lsin.

¹⁰O‘pichlaring eng a’lo sharobday shirindir, Bunday sharob lab va tishlar orasidan tekis o‘tadi.

¹¹Men sevgilimnikiman, U faqat meni qo‘msaydi.

¹²Kelgin, sevgilim, dalalarga boraylik. Xina gullar orasida yotib qolaylik.

¹³Vaqtli turib, uzumzorlarga kiraylik. Ular gulga kirdimikin?! Toklaru anorlar gullaganmikin?! O‘sha yerda men senga o‘z sevgimni to‘la ko‘rsataman.

¹⁴Mehrigiyolar hid taratib turibdi. Eshigimiz tepasiga har xil mevalardan osib, Sen uchun saqlab qo‘ydim, sevgilim.