Read O‘zbek tilidagi Muqaddas Kitob, 2013 Qo‘shiq 8 Bible Online

Qo‘shiq 8 - O‘zbek tilidagi Muqaddas Kitob, 2013 bible

Qo‘shiq 8

¹Qaniydi, onam emizgan akamday bo‘lsang edi. Ko‘chada ko‘rganimda, seni o‘pgan bo‘lardim, Hech kim meni bu uchun ayblamagan bo‘lardi.

²Men seni onamning uyiga boshlab kelardim. Menga o‘git bergan onamning yotog‘iga olib kirardim, Senga xushbo‘y sharobu anorlarim sharbatini berardim.

³Mana, sevgilimning chap qo‘li boshim ostidadir, O‘ng qo‘li bilan esa meni quchoqlaydi!

⁴Ey Quddus qizlari, va’da beringlar, Vaqt–soati kelmaguncha, Sevgini qo‘zg‘atmang, uyg‘otmang.

⁵O‘z sevgilisi bilan quchoqlashib, Cho‘l tarafdan kelayotgan kim? Olma daraxti ostida men seni uyg‘otdim. Onang shu yerda senga homilador bo‘lgan, Mana shu yerda seni dunyoga keltirgan.

⁶Qo‘lingdagi muhr uzugingday, Meni ham yuragingga muhrlab olgin. Axir, sevgi o‘limday kuchli, Ishq ajalday shiddatlidir. Sevgining uchqunlari olov uchqunlariday, Lovullagan alangadaydir.

⁷Suv sevgini o‘chirolmaydi, To‘fonlar uni cho‘ktirolmaydi. Birortasi sevgi uchun Uyidagi bor boyligini bersa ham, Mazaxdan boshqa hech narsaga erishmaydi.

⁸Bizning bir singlimiz bor, Uning ko‘kraklari hali bo‘rtmagan. Uni so‘rab kelishsa, Biz nima qilamiz?

⁹Agar u devor bo‘lsa, Uning atrofida kumushdan qal’a quramiz. Agar u eshik bo‘lsa, Uni sadr yog‘ochlari bilan to‘sib qo‘yamiz.

¹⁰Men ham devorday edim. Endi esa ko‘kraklarim minoralardaydir. Shuning uchun sevgilim meni To‘liq yetilgan, deb biladi.

¹¹Sulaymonning Baal–Homonda uzumzori bor edi. Uzumzorini bog‘bonlarga ishonib topshirdi. Ularning har biri uzumzor uchun Ming kumush tanga to‘lashlari kerak edi.

¹²Sulaymon, sen ming tanga ol, Qorovullarga esa ikki yuz tangadan berilsin. Mening uzumzorim o‘zimnikidir.

¹³Ey bog‘larda yashovchi qiz, Do‘stlarim ovozingni eshitishni kutmoqda. Qani, men ham ovozingni bir eshitay.

¹⁴Xuddi kiyikday, yosh ohuday bo‘lgin, Ziravorlar tog‘lariga tezroq kelgin, sevgilim.