Read O‘zbek tilidagi Muqaddas Kitob, 2013 Ishayo 10 Bible Online

Ishayo 10 - O‘zbek tilidagi Muqaddas Kitob, 2013 bible

Ishayo 10

¹Ey siz, yovuz farmonlar chiqaradiganlar, Qonunlar yozib, jabr keltiradiganlar.

²Kambag‘alni adolatdan mahrum qilyapsiz, Mazlum xalqimni talayapsiz, Ovingiz bo‘layotir bevalar, O‘ljangiz bo‘layotir yetimlar.

³Qiyomat kuni kelganda, siz nima qilasiz? Uzoqdan balo kelganda, nima qilasiz? Yordam so‘rab kimga qochib borasiz?! Boyligingizni qayerga olib ketasiz?!

⁴Yo‘q, asir bo‘lib yiqilib qolasiz, Yo jasadlar tagida qolib ketasiz. Ammo shunday bo‘lsa ham, Egam tushmas g‘azabidan, Uning qo‘li hamon Isroilga qarshi ko‘tarilgan.

⁵Egam aytar: “Mana Ossuriya! [1] G‘azabimning hassasi! Uning qo‘lidadir qahrimning tayog‘i!

⁶Men uni shakkok elga qarshi yuboraman, G‘azabimni o‘sha xalqqa qarshi sochaman, Ovlab, o‘lja qil, deb unga amr qilaman. Xalqlarni loyday oyoq osti qiladi u.

⁷Uning fikri–yodi Xalqlarni qirib tashlashdir, Bitta qo‘ymay ularni yo‘q qilishdir. Ammo Ossuriya faqat buni xayol qilmagan, Bular haqida o‘ylamas ham.

⁸Ossuriya shohi shunday o‘ylaydi: ‘Lashkarboshilarim shohlar emasmi?!

⁹Xalno shahrini Karxamish shahriday vayron qilmadikmi?! Xomat ham Arpadday [2] quladi–ku! Samariya Damashq [3] kabi emasmi?!

¹⁰Olganimday behuda butlar shohliklarini, Olaman Quddusu Samariyaning sanamlarini.

¹¹Ne qilgan bo‘lsam Samariya va uning sanamlarini, Shunday qilaman Quddusu uning butlarini.’”

¹²Ammo Sion tog‘ida va Quddusda Rabbiy hamma ishlarini tugatib bo‘lganda, shunday deydi: “Ossuriya shohi bilan uning takabburligi, kiborlarcha boqishlari natijasiga qarab, hisob–kitob qilaman.

¹³Ossuriya shohi shunday degan edi: ‘O‘z kuchim bilan bularni amalga oshirdim, Donoligim bilan qildim, axir, idrokliman. Xalqlarning chegarasini yo‘q qildim, Ularning xazinalarini o‘lja qilib oldim. Qudratli shohlarini taxtdan uloqtirdim.

¹⁴Qush iniga qo‘l suqib tuxum yiqqan kabi, Xalqlarning boyliklarini to‘pladim. Tashlab ketilgan tuxumlarni qanday to‘plasalar, Jamiki yurtlarni men shunday yig‘ib oldim. Yo qanot qoqqan, og‘zin ochgan, Yo ovozin chiqargan birov bo‘lmadi.’”

¹⁵Bolta maqtanarmi uni ishlatganga?! Arra o‘zini maqtaydimi uni qo‘lga olganga?! Kaltak ushlaganni kaltakning o‘zi ko‘taradimi?! Hassa o‘zini ushlaganni ko‘taradimi?!

¹⁶Shu bois Sarvari Olam — Rabbiy Og‘ir xastalikni yuborar pahlavonlaringiz orasiga. Ular avjda ekan, badanidan o‘t chiqadi, Ular go‘yo lov–lov etib yonadi.

¹⁷Shunda Isroilning nuri yolqin bo‘ladi, Isroil xalqining muqaddas Xudosi olov bo‘ladi. Olov yondirib, tikanzoru changalzorlarini Bir kunda yamlab yutadi.

¹⁸Uning o‘rmonlarining faxri Va unumdor dalalari Og‘ir xastalikka yo‘liqqan insonday, Tamomila xarob bo‘ladi.

¹⁹Shunchalik oz qolarki o‘rmonidagi daraxtlar, Hattoki yosh bola ham ularni sanay oladi.

²⁰O‘sha kuni Isroilning qolgan–qutgani, Yoqub xonadonining qutulganlari Boshqa suyanmaydi o‘z zulmkorlariga [4], Ular sadoqat bilan tayanadi Isroil xalqining muqaddas Xudosi — Egamga.

²¹Yoqub naslining qutulganlari, omon qolganlari Qaytadi [5] Qudratli Xudoga.

²²Ey Isroil, sening xalqing Dengiz qumiday ko‘p bo‘lgan bo‘lsa ham, Endi ulardan bor–yo‘g‘i sanoqli odamlar qaytadi. Zero, “Qirg‘in bo‘lsin”, deya qaror qilingan, Xudo odil hukmni O‘z xalqining boshiga soladi.

²³Shubhasiz, butun yer yuzida qiyomat bo‘ladi, zotan, Sarvari Olam — Rabbiy shunday qaror qilgan.

²⁴[24-25] Shu bois Sarvari Olam — Rabbiy shunday aytmoqda: “Ey xalqim, Quddus [6] ahli! Misrliklar kabi Ossuriyaliklar sizlarga tayoq ko‘taradilar, sizlarni qamchi bilan uradilar. Ammo hademay g‘azabimni bosaman, ulardan qo‘rqmanglar. Endi Ossuriyaliklarga qahrimni sochib, ularni qiraman.

²⁶Ha, Midiyonlarni Oriv qoyasida shunday qirgan edim [7]. Hassamni ko‘tarib, Misr lashkarini dengizda g‘arq qildim [8]. Endi xuddi shunday qilib, Men, Sarvari Olam, ularga qarshi qamchimni ko‘taraman.

²⁷O‘sha kuni Ossuriyaning yukini yelkangizdan uloqtiraman. Uning bo‘yinturug‘i bo‘yningizdan olib tashlanadi. Ha, bo‘yinturuq yo‘q qilinadi, chunki sizlar kuchga to‘ldingiz [9].”

²⁸Ossuriya lashkari Oyaz shahriga [10] keldi, Migron bo‘ylab o‘tdi, Qurol–aslahasini Mixmashda shay qildi.

²⁹Ular G‘ibo so‘qmog‘ini kesib o‘tdilar–u, Rama xalqi vahimaga tushib qoldi, Ular Shoulning shahri Givoda omonat to‘xtadi–yu, Shahar ahli qochib ketdi.

³⁰Faryod qiling, ey Galim ahli! Eshit, ey Laysho! Ey sho‘rlik Onoto‘t!

³¹Madmenax ahli qochib ketdi, Gebim ahli, panoh topay, deb uchib ketdi.

³²O‘sha kuni u Nav shahrida turadi. Quddus shahri joylashgan tepalik — Aziz Sion tog‘iga qarab qo‘l ko‘taradi.

³³Qara, Sarvari Olam — Rabbiy Qudratli kuchi ila shoxlarni kesib tashlaydi, Baland daraxtlarni qirqib tashlaydi, Yuksalganlarini yerga uradi.

³⁴U bolta bilan kesib tashlaydi o‘rmondagi changalzorni, Qudratli Xudo qulatib yuboradi Lubnon daraxtlarini.