Read O‘zbek tilidagi Muqaddas Kitob, 2013 Ishayo 11 Bible Online

Ishayo 11 - O‘zbek tilidagi Muqaddas Kitob, 2013 bible

Ishayo 11

¹Essayning [1] tomiridan novda o‘sib chiqadi, Ha, uning ildizidan ko‘chat yoyiladi.

²Uning ustida bo‘ladi Egamizning Ruhi. Bu donolik hamda aql–idrok, Nasihat va kuch–qudrat Ruhidir, Egamizni bilish va Undan qo‘rquv Ruhidir.

³O‘sha Essay farzandi Egamizdan qo‘rqishdan zavq olar, Hukm qilmas ko‘zlari ko‘rgani ila, Ajrim qilmas eshitganlari ila.

⁴U adolat ila bechorani hukm qiladi, To‘g‘rilik ila yer yuzi mazlumlarini ajrim qiladi. Bir og‘iz so‘zi bilan zolimni jazolaydi, Nafasi ila fosiqni o‘ldiradi.

⁵Adolat uning belidagi kamar bo‘ladi, Haqqoniyat uning belidagi belbog‘ bo‘ladi.

⁶Shunda bo‘ri qo‘zi bilan yashar, Sirtlon bilan uloqcha birga yotar, Buzoq, sher, bo‘rdoqi birgadir, Yosh bola ularni yetaklab yurar.

⁷Sigir bilan ayiq birga o‘tlaydi, Bolalari ham birga yotadi, Sher ho‘kizga o‘xshab somonni yeydi.

⁸Go‘dak qora ilon uyasi ustida o‘ynar, Chaqaloq qo‘lini ilon iniga suqar.

⁹Muqaddas tog‘imning [2] gir atrofida Ular zarar keltirmas yo chaqmas. Ha, suvlar to‘ldirganiday dengizni, Yer yuzi to‘liq biladi Egamizni.

¹⁰Mana, Essayning ildizidan chiqqan [3] shoh o‘sha kuni xalqlarga bayroq bo‘lib turadi. Elatlar uni izlab keladilar, Uning maskani ulug‘vorlikka to‘ladi.

¹¹O‘sha kuni Rabbiy qo‘lini ikkinchi marta uzatadi. U O‘z xalqidan qolganlarini qutqaradi. Ularni Ossuriyadan, Misrning shimoliy va janubiy hududlaridan [4], Habashistondan [5] yig‘ib keladi. Elamdan [6], Bobildan [7], Xomatdan [8] va dengiz sohillaridan olib keladi.

¹²Elatlarga U belgisini ko‘rsatib, Isroilning quvilganlarini to‘playdi. Yer yuzining to‘rt burchagidan yig‘adi Yahudoning tarqalib ketganlarini.

¹³Efrayimning [9] hasadgo‘yligini qirqadi, Yahudoning xusumatini to‘xtatadi, Efrayim Yahudoga hasad qilmas, Yahudo Efrayimga xusumat qilmas.

¹⁴G‘arbda ular filistlarga changal soladi, Birgalikda Sharq xalqini talaydi, Edom, Mo‘ab [10] ularga bo‘yin egadi, Ommon xalqi [11] tiz cho‘kadi.

¹⁵Egamiz tamomila qirib yuborar Qizil dengizning qo‘ltig‘ini [12]. Furot daryosiga qarshi qo‘l ko‘taradi. Garmsel keltirib, jizg‘anak qilib, Daryoni yetti sayoz irmoqqa bo‘lib tashlaydi, Irmoqlardan bir–bir hatlab o‘tsa bo‘ladi.

¹⁶Ha, Isroil Misrdan chiqqanda, Ularga yo‘l ochilganiday Egamizning xalqidan qolganlarga Ossuriyadan katta yo‘l ochiladi.