Read O‘zbek tilidagi Muqaddas Kitob, 2013 Ishayo 14 Bible Online

Ishayo 14 - O‘zbek tilidagi Muqaddas Kitob, 2013 bible

Ishayo 14

¹Ammo Yoqub xonadoniga Egam shafqat qiladi, U yana Isroil xonadonini tanlab oladi. Yoqub nasliga o‘z yerida orom beradi, Birlashadi musofirlar ular bilan, Qo‘shiladi Yoqub xonadoni bilan.

²Xalqlar o‘z yurtlariga Isroilni boshlab boradi, Ular Isroil xonadonining mulki bo‘ladi. Isroil Egamning yerida xalqlarni qul, cho‘ri qiladi. O‘zini asir qilganlarni Isroil xalqi asir qiladi, Zolimlar ustidan u hukmronlik qiladi.

³Egam sizni qayg‘u, qiy–chuvdan qutqarganda, sizga azob bergan og‘ir ishdan xalos qilganda,

⁴Bobil shohiga qarshi bu so‘zlarni qo‘llaysiz: “Mana, zolimning kuni bitdi–ya! Zo‘ravon [1] tamom bo‘ldi–ya!

⁵Egam sindirdi fosiqlarning tayog‘ini, Hukmdorlarning hassasini!

⁶Bu hassa xalqlarni rosa urardi, To‘xtovsiz kaltaklardi, Xalqlarga g‘azab ila hukmronlik qilardi, Shafqat qilmay ta’qib qilardi.

⁷Jamiki zamin tinch, osuda, Ular sevinch ila qo‘shiq aytmoqda.

⁸Hatto sarv daraxtlari halokatingdan mamnun, Lubnon sadrlari ham aytar: ‘Endi sen chuqurda yotibsan, Hech kim bizni kesgani kelmas.’

⁹O‘liklar diyori [2] jonlanib qoldi: Ana, keldi, kutib olaylik, deya. Qara, uyg‘ondi seni deb Yer yuzi yo‘lboshchilarining ruhlari. Taxtlaridan oyoqqa qalqidi Jamiki xalqlarning shohlari.

¹⁰Ey Bobil shohi! Hammalari senga qarab aytadi: ‘Hatto sen ham bizday nochor bo‘lding–a, Bizning kunimiz tushdi sening boshingga.’

¹¹Ulug‘vorliging, kayfu safolar tovushi Uloqtirildi o‘liklar diyoriga! Ostingdagi qurtlar ko‘rpachangdir, Chuvalchanglar sening to‘shagingdir.

¹²Qanday qilib tushib ketding samodan, Ey Zuhra yulduz, Tong o‘g‘li?! Xalqlarni yerga uloqtirgan eding! Yerga qulab tushding–ku o‘zing!

¹³Ha, o‘zingcha aytgan eding: ‘Men chiqib boraman samolarga, Taxtimni ko‘taraman Xudoning yulduzlari tepasiga. O‘tiraman xudolar yig‘iladigan tog‘da, Shimolning eng chekkasida.

¹⁴Bulutlar tepasiga chiqib boraman, Xudoyi Taoloday bo‘laman.’

¹⁵Ammo sen uloqtirilgansan o‘liklar diyoriga, Chuqurlikning tub–tubiga.

¹⁶Ko‘rganlar senga tikilib qoladi, Ko‘ngillarida shunday o‘y kechadi: ‘O‘sha odammi bu zaminni titratgan, Shohliklarni larzaga solgan?!

¹⁷Shumi olamni sahroga aylantirgan?! Shaharlarni yer bilan yakson qilgan, Asirlarni qo‘yib yubormagan?!’

¹⁸O‘zlarining qabrlarida har biri, Xalqlarning shohi bo‘lganlarning hammasi Hurmat bilan yotibdi.

¹⁹Ammo sen uloqtirilgansan Jirkanch chirik shoxchaday qabringdan. Tosh chuqurga tushadigan jasadlar, Qilichdan qulagan jasadlar Bo‘lar sening kafaning.

²⁰Axir, o‘z yurtingni vayron qilgansan, Xalqingni o‘zing o‘ldirgansan. Endi ular qatori dafn qilinmassan. Ey fosiq, sening nasling To abad tilga olinmas!

²¹Otasining [3] gunohlari uchun O‘g‘illarini jallodga topshiring. Ular aslo ko‘tarilmas. Endi yerga egalik qilmas, Yer yuzida shaharlar barpo qilmas.”

²²Quyidagilar Sarvari Olamning so‘zidir. “Men Bobilga qarshi qo‘zg‘alaman. Men Bobildagilarning nomini ham, qolgan–qutganini ham, urug‘–aymog‘ini ham yo‘q qilaman”, — deb aytmoqda Egamiz.

²³“Men Bobilni tipratikanlarga mulk qilib beraman. Uni botqoqqa aylantiraman. Xarobazor qilib, supurib tashlayman”, — deb aytmoqda Sarvari Olam.

²⁴Sarvari Olam ont ichib aytdi: “Ha, Mening belgilaganim bajo bo‘ladi, Mening rejalashtirganim yuz beradi.

²⁵Ossuriya xalqini O‘z yerimda sindiraman, Tog‘larimda uni oyoq osti qilaman. Uning bo‘yinturug‘i yurtimdan olinadi, Yuki Isroilning yelkalaridan uloqtiriladi.

²⁶Butun olam uchun shu rejani tuzdim, Butun xalqlarga qarshi qo‘limni ko‘tardim.”

²⁷Sarvari Olam reja qilgan! Qani, buni kim bekor qila oladi?! Uning qo‘li ko‘tarilgan! Qani, uni kim ortiga qaytara oladi?!

²⁸Shoh Oxoz vafot etgan yili [4] bu bashorat ayon qilindi:

²⁹“Bizni urgan tayoq [5] sindi”, deb Sevinmangiz, ey Filistlar! Axir, ilonning tuxumidan qora ilon chiqadi! Uning bolasi vahimali ajdar bo‘ladi!

³⁰Mana, qashshoqlarning to‘ng‘ichi to‘yyapti, Muhtojlar eson–omon yotibdi. Ammo sizning ildizingizni ochlikdan quritaman, Qolgan–qutganlaringiz esa qirilib ketasiz.

³¹Ey Filistlar, hammangiz Azadan adoyi tamom bo‘lasiz. Faryod qil, ey darvoza! Yig‘la, ey shahar! [6] Shimoldan [7] urush hidi chiqayotir, O‘sha lashkar safdan chiqmay kelayotir.

³²Xalqlarning elchilariga qanday javob berilar? “Egamiz Quddusni [8] barqaror qildi. O‘z xalqi orasida muhtoj bo‘lganlar U yerda panoh topadi”, — javob shudir.