Read O‘zbek tilidagi Muqaddas Kitob, 2013 Ishayo 19 Bible Online

Ishayo 19 - O‘zbek tilidagi Muqaddas Kitob, 2013 bible

Ishayo 19

¹Misr haqida bashorat. Ana, Egam minib olgan uchqur bulutga, U keladi Misrga. Misrning behuda butlari Uning oldida titrar, Misrning yuragi esa orqaga tortar.

²“Misr xalqini bir–biriga sapchitaman. Aka–ukalaru do‘stlar, Shaharlaru shohliklar Bir–biriga qarshi chiqar.

³Misrdagi ruhlar bitta qolmay qochib ketadi. Men Misrning rejayu niyatlarini puchga chiqaraman. Ular qidirib qolar Behuda butlarniyu sehrgarlarni, Folbinlaru otalari ruhlarini.

⁴Men Misrni berahm xo‘jayinlarga topshiraman, Ha, kuchli shoh ularni boshqaradi”, — demoqda Sarvari Olam — Rabbiy.

⁵Nil suvi qurib qoladi, Daryo qurib boraveradi, U jizg‘anak yer bo‘ladi.

⁶Oqar suvlar badbo‘y hid chiqaradi, Misrdagi Nil pasayib, quriydi. Poyalaru qamishlar chiriydi.

⁷Nil qirg‘og‘idagi, daryo bo‘yidagi qamishlar, Nil bo‘yiga ekilgan hamma ekinlar Qurib ketadi, sovuriladi, Ulardan hech narsa qolmaydi.

⁸Baliqchilar aza tutar, Nilga qarmoq tashlaganlar yig‘lar, Suvga to‘r yoyganlar umidsiz bo‘lar.

⁹Zig‘ir tolasiga ishlov beradiganlar Sharmanda bo‘ladilar, Oq mato to‘qiydiganlar [1] Uyatga qolib ketadilar.

¹⁰Ularning dastgohlari ishdan chiqadi, Barcha ishchilari tushkunlikka tushadi.

¹¹Ey Zo‘van [2] shahzodalari, g‘irt ahmoqsiz axir, Ey Fir’avn maslahatchilari, sizning donoligingiz ham shunday. Maslahatlaringiz daf bo‘ladi. Qanday qilib siz fir’avnga: “Biz donolarning o‘g‘limiz, Qadim shohlar naslidanmiz”, deya ayta olasiz?!

¹²Ey Fir’avn, qani o‘sha dono odamlaringiz?! Sarvari Olam Misrga nima reja qilganini Ular sizga bildirsin, aytsin.

¹³Mana, Zo‘van shahzodalari ahmoq bo‘ldilar, Nuf [3] shahzodalari aldandilar. Misrni o‘z qabila boshliqlari yo‘ldan urdilar,

¹⁴Ularning aqlini Egam chalkashtirdi, Qusig‘iga dumalaydigan mast qanday bo‘lsa, Misrni ular shunday yo‘ldan ozdirar.

¹⁵Misrga hech kim yordam bera olmas, Na boshi, na quyrug‘i, na xurmosi, na qamishi.

¹⁶O‘sha kuni Misr xotin kishiga o‘xshab qoladi. Sarvari Olam unga qarshi qo‘lini ko‘taradi, shunda Misr titrab dahshatga tushadi.

¹⁷Yahudo Misrliklarni dahshatga soladi. Sarvari Olam ularni vahimaga solganini eslagan har bir odam dahshatga tushadi.

¹⁸O‘sha kunga kelib, Misrdagi beshta shahar ibroniy tilida [4] gapiradigan bo‘ladi. Ular Sarvari Olam oldida ont ichadilar. Bu shaharlardan biri “Quyosh shahri” [5], deb ataladi.

¹⁹O‘sha kuni Misrning o‘rtasida Egamiz uchun bir qurbongoh, chegarada bir muqaddas tosh o‘rnatiladi.

²⁰Bular Sarvari Olam uchun Misrda bir belgi va guvoh bo‘ladi. Xalq zolimlar dastidan yolvorganda, Egamiz ularni qutqaradigan bir himoyachi yuboradi. U xalqni qutqaradi.

²¹Egamiz O‘zini Misrliklarga zohir qiladi. Misrliklar ham o‘sha kuni Uni taniydilar. Egamizga qurbonliklar keltirib, nazrlar atab, sajda qiladilar. Unga va’da berib, va’dalarini ado etadilar.

²²Egamiz Misrliklarni xastalik keltirish bilan jazolaydi, keyin shifo beradi. Ular Egamizga yolvoradilar, Egamiz ularga shifo beradi.

²³O‘sha kuni Misr bilan Ossuriya o‘rtasida bir yo‘l bo‘ladi. Ossuriyalik Misrga, Misrlik Ossuriyaga borib kelaveradi. Ossuriyaliklar bilan Misrliklar birgalikda sajda qiladilar.

²⁴O‘sha kuni Misr bilan Ossuriya qatorida Isroil uchinchi xalq bo‘ladi. Uchalovi yer yuziga baraka bo‘ladi.

²⁵Ha, Sarvari Olam shunday degan: “Baraka topinglar! Ey xalqim Misr, qo‘llarimning ijodi Ossuriya, O‘zimning mulkim Isroil!”