Read O‘zbek tilidagi Muqaddas Kitob, 2013 Ishayo 2 Bible Online

Ishayo 2 - O‘zbek tilidagi Muqaddas Kitob, 2013 bible

Ishayo 2

¹Omiz o‘g‘li Ishayoga vahiyda Yahudo va Quddus haqida ayon bo‘lgan bashorat.

²Shunday kunlar keladiki, Egamizning uyi turgan tog‘ Tog‘larning eng yuksagi bo‘lib, qaror topadi. Bu tog‘ hammasidan ham baland bo‘ladi, Hamma xalqlar u yerga daryoday oqib keladi.

³Ko‘plab ellar keladi, Ular shunday deb aytadi: “Qani, yuringlar! Chiqaylik Egamizning tog‘iga! [1] Qani, yuringlar! Boraylik Yoqub naslining Xudosi uyiga! Toki U bizga o‘rgatsin O‘zining yo‘llarini, Toki yuraylik bizlar Uning so‘qmoqlaridan.” Axir, Egamizning kalomi kelib chiqar Quddusdan, Ha, Xudoning ta’limoti kelib chiqar Siondan.

⁴Egamiz hukm qiladi xalqlarning orasida, Ajrim qiladi ko‘p millatlar orasida. Qilichlarini aylantirishadi omochga, Nayzalarini esa tok qaychilariga. Qilich ko‘tarmaydi bir–biriga xalqlar, Hech qachon jang qilmaydi ular.

⁵Ey Yoqub xonadoni! Kelinglar, Egamizning nurida yuraylik.

⁶Ey Yoqub xonadoni! Xalqingizning yo‘llarini siz tark etdingiz! [2] Bu yurt sharqdan kelgan bashoratgo‘ylarga [3], Filistlar yurtiga [4] o‘xshab folbinlarga to‘la. Ular begona xalqlar bilan hamtovoq bo‘ldilar.

⁷Qarang, Yoqub xonadoni to‘la kumush, oltinga, Chek–chegarasi yo‘q xazinalarining, Ularning yurti to‘ladir otlarga, Chek–chegarasi yo‘q jang aravalarining.

⁸Ularning yurti to‘la behuda butlarga! Ular ta’zim etarlar Qo‘llarining ijodiga, O‘zlari yasab, yaratganlarga.

⁹Evoh, mana inson past bo‘ldi, Shu tariqa odamzod tiz cho‘ktirildi, Ularning qaddini ko‘tarma, ey Egam!

¹⁰Egamdan qo‘rqib qochinglar, Qoyaning ichiga kirib olinglar, Tuproq ostiga yashirininglar, Egamning ulug‘vorligi buyukdir!

¹¹Ha, insonning mag‘rurligi yerga uriladi, Odamzodning yuksakligi past bo‘ladi, Yolg‘iz Xudo o‘sha kuni yuksaladi.

¹²Zotan, Sarvari Olamning bir kuni bor, Qarshi chiqar U jamiki kibor, kekkayganlarga. O‘sha mag‘rurlarga qarshi bo‘lar, Ularning har birini yerga urar.

¹³Qarshi bo‘lar U barcha yuksak, mag‘rurlarga! Ha, o‘sha Lubnon sadrlariyu Bashan [5] emanlarining hammasiga.

¹⁴Qarshi bo‘lar U hamma baland tog‘larga, Hamma yuksak tepaliklarga.

¹⁵Qarshi bo‘lar U har bir baland minoraga, Har bir mustahkam qal’aga.

¹⁶Qarshi bo‘lar o‘sha mashhur Tarshish [6] kemalariyu Inson yaratgan barcha ajoyibotlarga.

¹⁷Ha, yerga uriladi o‘sha odamzod faxri, Past bo‘ladi insonning yuksakligi! Yolg‘iz Xudo o‘sha kuni yuksaladi!

¹⁸Behuda butlar tamomila yo‘q bo‘lib ketadi.

¹⁹Egamiz qo‘zg‘alganda Yerni larzaga solay, deya Inson kirib ketar qoyalardagi g‘orlarga Egamizdan qo‘rqqanidan, Kirib ketar yerdagi chuqurlarga Uning buyuk ulug‘vorligidan.

²⁰Odam, o‘zim sajda qilay, deb yasagan Oltinu kumush butlarini Berar o‘sha kuni yumronqoziq Hamda ko‘rshapalaklarga.

²¹Ha, Egamiz qo‘zg‘alganda Yerni larzaga solay, deya Inson qoyalardagi g‘orlarga kirar Egamizdan qo‘rqqanidan, Cho‘qqilarning yoriqlariga yashirinar Uning buyuk ulug‘vorligidan.

²²Endi uzoqda yuring Tuproqdan yaratilganlardan. Bormi ularning biron qiymati?!