Read O‘zbek tilidagi Muqaddas Kitob, 2013 Ishayo 22 Bible Online

Ishayo 22 - O‘zbek tilidagi Muqaddas Kitob, 2013 bible

Ishayo 22

¹[1-2] Vahiy vodiysi [1] haqida bashorat. Ey shovqin–surondan shod bo‘lgan shahar ahli, Nima bo‘ldi sizga, tomlarga chiqib oldingiz? [2] Orangizdan o‘lganlar qilichdan emas, Ular jang qilib o‘lgan emas.

³Yo‘lboshchilaringiz yoyini tashlab, Hammasi asirga tushdi. Ular uzoqqa qochgandi, Ammo hammasi asirga tushdi.

⁴Shunda men dedim: “Yolg‘iz qoldiring meni, Achchiq–achchiq yig‘layin. Tasalli berishga urinmang menga, Axir, uchradi xalqim qirg‘inga!”

⁵Zotan, Sarvari Olam — Rabbiy bir kun belgiladi, U kuni Vahiy vodiysida qiy–chuv, zulm va sarosima hukm suradi. Devorlar qulayotir, Odamlar tog‘larga qarab faryod qilayotir.

⁶Elam [3] lashkari o‘qdonlarini tayyorladi, Jang aravalari, otliqlari bilan keldi, Xir lashkari qalqonlarini ochdi.

⁷Mana, go‘zal vodiylaringiz jang aravalari bilan to‘ldi, Otliqlar shahar darvozalari oldiga yig‘ildi.

⁸Evoh, Yahudo himoyasiz qoldi! O‘sha kuni sizlar “Lubnon O‘rmoni” degan uydagi [4] qurollarga ishondingiz.

⁹Dovud qal’asi devorlarining yoriqlari juda ko‘p. Buni ko‘rib sizlar Quyi hovuzdan suv to‘pladingiz.

¹⁰Quddusdagi uylarni sanab chiqdingiz. Shahar devorlarini mustahkamlash uchun uylarni buzdingiz.

¹¹Eski hovuz suvlarini to‘plash uchun ikki devor o‘rtasida [5]sardoba qurdingiz. Ammo buni ilgaridan reja qilgan Xudoni yodga olmadingiz. Amalga oshiradigan Xudoni xayolingizga ham keltirmadingiz.

¹²O‘sha kuni Sarvari Olam — Rabbiy: “Yig‘lang, aza tuting”, deb aytdi. “Sochlaringizni kesib, qanorga o‘raning [6]”, dedi U.

¹³Ammo buni qarang! Shodligu kayfu safo! “Erta–indin o‘lib ketamiz, Kelinglar, yeb–ichib qolaylik”, deb Sizlar buqa, qo‘ylar so‘ydingiz, Go‘sht yeb, mayxo‘rlik qildingiz.

¹⁴Shunda Sarvari Olamning O‘zi menga shunday dedi: “Bu gunohlaringiz kechirilmas o‘lguningizgacha.” Ha, buni Sarvari Olam — Rabbiy aytmoqda.

¹⁵Sarvari Olam — Rabbiy shunday aytmoqda: “Qani, shohning o‘ng qo‘l vaziri, saroy a’yoni Shavnaning [7] oldiga borib, shunday deb ayt:

¹⁶‘Bu yerda nima ishing bor?! Bu yerda sening kiming borki, o‘zingga qabr qazibsan?! Yuksakda o‘zingga qabr qazibsan, qoyada o‘zingga maskan qilibsan?!

¹⁷Mana, Men, Egang, seni uloqtiraman. Ey kuchli inson! Men seni chirpirak qilib shiddat bilan uloqtiraman.

¹⁸Men seni aylantirib–aylantirib, to‘p kabi keng bir yurtga uchirib yuboraman. Sen o‘sha yerda o‘lib ketasan. Ulug‘vor jang aravalaring o‘sha yerda qolib ketadi. Xo‘jayining xonadoniga sen sharmandalik keltirasan!

¹⁹Men seni o‘z joyingdan qo‘zg‘ataman. Sen o‘z lavozimingdan olinasan.

²⁰O‘sha kuni Xilqiyoning o‘g‘li qulim Eliyaqimni [8] chaqiraman.

²¹Sening liboslaringni unga kiydiraman. Kamaringni unga bog‘lab, sening butun hukmronligingni unga beraman. U Quddus aholisiga, Yahudo xalqiga ota bo‘ladi.

²²Dovud xonadonining kalitini [9] unga beraman. U ochganda, hech kim berkitolmaydi. U berkitganda, hech kim ocholmaydi.

²³Men uni mustahkam joyga qoqilgan qoziq qilaman, u o‘z urug‘i uchun shuhrat taxti bo‘ladi.

²⁴Urug‘idan chiqqan har kim, kosadan piyolalargacha bo‘lgan har bir kichik idish o‘sha qoziqqa yuklanadi.’

²⁵O‘sha kuni mustahkam joyga qoqilgan qoziq joyidan chiqib, sinib ketadi, — demoqda Sarvari Olam. — Unga osilgan yuk ham yo‘q bo‘lib ketadi.” Egamiz shunday deb aytdi.