Read O‘zbek tilidagi Muqaddas Kitob, 2013 Ishayo 23 Bible Online

Ishayo 23 - O‘zbek tilidagi Muqaddas Kitob, 2013 bible

Ishayo 23

¹Tir [1] haqida bashorat. Ey Tarshish [2] kemalari, faryod qiling! Endi yo‘q boshpanangiz! Kipr [3] sohilida eshitgan xabarlar. Mana, ularning hammasi ravshan.

²Sukut saqlang, ey orol xalqi! Ey Sidon [4] savdogarlari! Bir paytlar kemalarga to‘la edingiz.

³Shixor [5] doni, Nilning hosili Tirning daromadi bo‘lgan edi, U elatlardan foyda qilardi.

⁴Uyat senga, ey Sidon! Axir, Tir, dengiz bo‘yidagi qal’a shunday demoqda: “Na to‘lg‘oq azobin chekdim, na tug‘dim, Na o‘g‘illar, na qizlar ulg‘aytirdim.”

⁵Tir to‘g‘risida eshitganda, Misrning yuragi qinidan chiqay deydi.

⁶Tarshishga jo‘nang, ey qirg‘oq aholisi, Faryod qiling!

⁷Qadimda barpo bo‘lgan, Takabbur shahringizning holi ne bo‘ldi? Endi darbadar bo‘lasiz, Uzoq, begona yurtni vatan qilasiz.

⁸Tirga qarshi kim bunday qaror chiqardi? Bu shahar shohlarga toj kiydirgandi, Savdogarlari hukmdor edi, Butun dunyo ularni izzat qilardi.

⁹Sarvari Olam qabul qildi bu qarorni: “Takabburligi, ulug‘vorligi yo‘q bo‘lsin, Butun olam izzat qilganlar yerga urilsin.”

¹⁰Ey Tarshish ahli! Nil bo‘yidagi dehqonlar kabi Yerlaringga ishlov ber [6]. Axir, bandargohing yo‘q endi [7].

¹¹“Kan’on qal’alari vayron bo‘lsin”, deb Egamiz amr berdi. Ha, U dengizga qarshi qo‘l ko‘tardi, Shohliklarni titratdi.

¹²Egamiz shunday dedi: “Zulm chekkan, ey Sidon ahli, Endi xursandchilik bilmay o‘tasan. Qani, Kiprga jo‘na, U yerda rohat nimaligin bilmay o‘tasan.”

¹³Ana Bobil [8] yurtiga boq, endi uning xalqi yo‘q. Ossuriyaliklar qurshov minoralari qurdilar, Bobilliklarning saroylarini yakson qildilar. Yurtni vayronaga aylantirdilar, yovvoyi hayvonlarga berdilar.

¹⁴Faryod qiling, ey Tarshish kemalari, Endi yo‘q boshpanangiz! [9]

¹⁵Shundan keyin Tir shahri bir shohning umricha — yetmish yilga unutiladi. Yetmish yil o‘tgandan keyin, Tir ham quyidagi qo‘shiqda aytilgan fohishaday bo‘ladi.

¹⁶Arfangni ol, shahar bo‘ylab kez, Ey hamma unutgan fohisha! Qani, go‘zal qilib chal–chi! Qo‘shiq ketidan qo‘shiq kuyla–chi! Balki seni eslab qolarlar.

¹⁷Yetmish yil o‘tgach, Egamiz Tir bilan yana aloqada bo‘ladi. Ammo Tir pul uchun yana fohishalik qila boshlaydi. Dunyoning hamma shohliklariga fohisha bo‘ladi.

¹⁸Shahar tijoratdan va fahshdan olgan daromadlarini Egamizga ataydi. Daromadlar yig‘ilmaydi ham, saqlanmaydi ham. Tijoratdan olganlarini to‘yguncha yesinlar, chiroyli kiyinsinlar, deb daromad Egamizning huzurida yashayotganlarga beriladi.