Read O‘zbek tilidagi Muqaddas Kitob, 2013 Ishayo 26 Bible Online

Ishayo 26 - O‘zbek tilidagi Muqaddas Kitob, 2013 bible

Ishayo 26

¹O‘sha kuni Yahudo yurtida ushbu qo‘shiq kuylanar: “Mana, shahrimiz qudratlidir! Egamiz bizning qal’amizdir, Uning O‘zi bizga najot beradi.

²Oching shahar darvozalarini! Sadoqatli solih xalq ichkari kirsin!

³Ey Egamiz, Senga ishonib, Fikri–zikri Sendan uzilmaydiganga O‘zing komil tinchlik ato qilasan.

⁴Egamizga to abad ishon, Uning O‘zi [1] abadiy Qoyamizdir.

⁵Yuksalganlarni U yiqitdi, Takabbur shaharni vayron qilib, Yer bilan bitta qildi.

⁶O‘sha shaharni mazlumlar oyoq osti qildi, U bechoralarning qadamlari ostida ezildi.”

⁷Solihning yo‘li tekisdir, To‘g‘ri yo‘lni Sen unga tayyorlaysan.

⁸Ey Egamiz, yo‘l–yo‘riqlaring ila Senga umid qilamiz. Sening nomingni sharaflash Ko‘nglimiz istagidir.

⁹Tun bo‘yi yuragim Seni qo‘msaydi, Ha, men Senga intilaman. Yer yuzida Sening hukming bo‘lganda, Olam ahli adolatni biladi.

¹⁰Fosiqlar marhamat ko‘rganda Ular aslo solihlikni o‘rganmas. Haqqoniylik o‘rniga ular egrilik qilaveradi, Sening ulug‘vorligingni ular ko‘rmaydi.

¹¹Ey Egamiz, qo‘ling ko‘tarilgan, Jazolashga tayyor, Ammo ular buni ko‘rmaydi. Xalqingni deb jon kuydirganingni ko‘rib, Ular sharmanda bo‘lsin. G‘animlaringga atalgan olov ularni yutsin.

¹²Ey Egamiz, bizga Sen tinchlik ato etasan, Qilgan ishlarimizning barchasiga Yetishganmiz Sening qudrating ila.

¹³Ey Egamiz Xudo, sendan boshqalar Ustimizdan hukmronlik qildilar, Ammo biz yolg‘iz Sening nomingni tilga olamiz.

¹⁴O‘liklar yashamaslar, Ular aslo qaytib kelmas. Ularni Sen jazolab, qirib tashlading, Ularni tamomila xotiradan o‘chirding.

¹⁵Ey Egamiz, xalqimizni Sen ko‘paytirding, Xalqni ko‘paytirib, O‘zing yuksalding, Yurtning barcha chegaralarini kengaytirding.

¹⁶Ey Egamiz, kulfatda qolganlarida Ular Senga yuz burdilar, Sening tanqidlaring ostida egildilar.

¹⁷To‘lg‘oq tutayotgan ayol og‘riqdan qichqirganday, To‘lg‘onib, dod–faryod qilganday, Biz ham Sening oldingda shunday bo‘ldik, ey Egamiz!

¹⁸Homilador bo‘lib, dard tortdik, Ammo shamoldan boshqa hech narsa ko‘rmadik. Na yer yuzida biz g‘olib bo‘ldik, Na avlodlar dunyoga keltirdik.

¹⁹Ammo Sening o‘lik xalqing tiriladi, Tanalari o‘rnidan turadi. Ey tuproq ostida yotganlar, qo‘zg‘aling, Shodlikdan hayqiring! Ey Egamiz, shabnaming tonggi shabnamga o‘xshaydi, Zamin murdalariga hayot bag‘ishlaydi.

²⁰Keling, ey xalqim, bir oz yashirinib turing! Egamizning g‘azabi bosilguncha, Kiring ichkariga, Ortingizdan eshiklarni yopib qo‘ying!

²¹Ana, Egamiz kelayotir maskanidan Zamin ahlini gunohlari uchun jazolagani. Yer to‘kilgan qonlarni fosh etadi, Qotillik qurbonlarini endi yashirmaydi.