Read O‘zbek tilidagi Muqaddas Kitob, 2013 Ishayo 28 Bible Online

Ishayo 28 - O‘zbek tilidagi Muqaddas Kitob, 2013 bible

Ishayo 28

¹Ey ulug‘vorlik toji bo‘lgan shahar! Holingga voy! Efrayim [1], mast–alastlarining ulug‘vorligi eding sen! Eh, ajoyib, go‘zal shahar eding! Shuhrating gulday so‘lmoqda! Serhosil vodiydagi unumdor shahar eding. Tubanlashding sharobdan!

²Mana, Rabbiyning kuchli bir bahodiri bor [2]. U selga, vayron keltiradigan quyunga o‘xshaydi. Yuvib ketadigan, toshqin jalalarga o‘xshaydi. O‘z qo‘llari bilan u Efrayimni yakson qiladi.

³Eh, Efrayim mast–alastlarining ulug‘vorlik toji! Ana endi oyoq ostida toptaladi!

⁴Serhosil vodiydagi unumdor shahar edi! Endi ularning shuhrati gullar kabi so‘nadi. Ular ilk pishgan anjirlarga o‘xshaydi, Pishgan zahoti yulinib, yutib yuboriladi.

⁵O‘sha kuni Sarvari Olam O‘zining xalqidan qolganlari uchun Shuhrat tojiyu ajoyib gulchambar bo‘ladi.

⁶Hukm kursisida o‘tirganlarga U adolat ruhini beradi. Darvozadan dushmanga zarba beradiganga U jasorat manbayi bo‘ladi.

⁷Ruhoniy, payg‘ambarlar sharob tufayli, O‘tkir ichimliklardan gandiraklab yuradi. Ha, sharob, bo‘zalardan ularning boshi aylanadi, May dastidan ular yo‘llaridan adashadi, O‘tkir ichimlikdan gandiraklab yuradi. Ular vahiy ko‘rganlarida xato qiladi, Qiladigan hukmlarida adashadi.

⁸Ularning dasturxoni qusuqqa to‘la, Birorta ham toza joy yo‘q.

⁹Xo‘sh, Xudo kimlarga o‘rgatyapti? Kimga xabarini tushuntiryapti? Mana shu xalqqa! Endi ko‘krakdan ajratilgan, Sutdan ayrilgan go‘daklarga!

¹⁰Ha, ular tushunarsiz gaplar, Mazmunsiz so‘zlar [3] eshitadilar. Ozgina u yerda, ozgina bu yerda.

¹¹Xudo bu xalqqa begona tillarda, Tushunarsiz tilda [4] gapiradi.

¹²Ularga shunday degan: “Mana, orom! Charchaganlarga dam bering. Mana shu rohat, axir.” Ammo ular eshitishdan bosh tortdi.

¹³Egam so‘zi ular uchun tushunarsiz gaplar, Mazmunsiz so‘zlarday bo‘ladi. Ozgina u yerda, ozgina bu yerda. Shunday qilib, yuray deganingizda Orqaga yiqilib, yaralanasiz, Tuzoqqa tushib, olib ketilasiz.

¹⁴Shu bois Egamdan kelgan bu xabarni eshiting, Ey Quddusdagi masxaraboz hukmdorlar!

¹⁵Sizlar shunday dedingiz: “Biz O‘lim bilan ahd qilganmiz, O‘liklar diyori [5] ila bitim tuzganmiz. Dahshatli ofat kelib boshimizga tushmaydi. Axir, yolg‘onni panoh qilib olganmiz, Soxtalikni chodir qilib olganmiz.”

¹⁶Shu bois Egamiz Rabbiy aytmoqda: “Mana, Men joylashtiryapman Quddusda [6] Sinalgan bir toshni, poydevor toshini. Bu qadrli tamal toshi [7], ishonchli poydevordir. Ha, unga tayanganlar hech qachon umidsiz bo‘lmaydi.

¹⁷Men adolat bilan hukm qilaman, To‘g‘rilik o‘lchovim bo‘ladi. Soxta panohingizni do‘l yuvib ketadi, Chodiringizni sellar yuvib ketadi.

¹⁸O‘lim bilan tuzgan ahdingiz bekor bo‘ladi, O‘liklar diyori ila qilgan bitimingiz barbod bo‘ladi. Dahshatli ofat yurtdan o‘tayotganda, Sizlar yer bilan yakson bo‘lasiz.

¹⁹Ha, har tongda, tunu kun O‘sha to‘fon sizni yuvib ketadi.” Eshitganingizni anglab yetganingizda, Bu xabar g‘oyat katta xavfdan darak beradi:

²⁰Yotgani to‘shagingiz kaltalik qiladi, Yopingani ko‘rpangiz ensizlik qiladi [8].

²¹Perazim tog‘idagiday [9] O‘z ishimni qilay, deb Egam qo‘zg‘aladi. Givon vodiysidagiday [10] U g‘azabga minadi. Ha, U O‘zining ajoyib ishini qiladi. Uning ishlari hayratda qoldiradi.

²²Masxaralashni bas qiling endi, Bo‘lmasa zanjirlaringiz yana og‘irlashadi. Sarvari Olam — Rabbiy menga: “Butun yurtni vayron qilaman”, deb aytdi.

²³Tinglang, ovozimga quloq soling, Diqqat qiling, gaplarimni eshiting!

²⁴Dehqonlar ekish uchun yerga ishlov beraveradimi?! Tuproq kovlayveradi–yu, hech qachon ekmaydimi?!

²⁵Yo‘q, ular yerni tekislaydi, Keyin ukrop, zira urug‘ini sepadi. Belgilangan joylariga Har turli bug‘doy, arpa urug‘ini ekadi.

²⁶Ha, dehqonlar nima qilishini biladi, Xudo ularga aql–idrok bergan!

²⁷Axir, ukropni bolg‘a bilan yanchmaydi, Zirani arava g‘ildiragi bilan ezmaydi. Mana, ukropni kaltak bilan yanchib oladi, Zirani tayoq bilan ezib oladi.

²⁸Bug‘doydan un qilinadi, Ammo u to abad yanchilmaydi [11]. Arava g‘ildiragi bug‘doy ustidan Chang bo‘lguncha yurg‘izilmaydi.

²⁹Bu donolik kelar Sarvari Olamdan, Uning maslahatlari ajoyib, donoligi buyukdir.