Read O‘zbek tilidagi Muqaddas Kitob, 2013 Ishayo 29 Bible Online

Ishayo 29 - O‘zbek tilidagi Muqaddas Kitob, 2013 bible

Ishayo 29

¹Egam aytar: “Holingga voy, ey Dovud yashagan shahar! Ey Oriyol [1], Oriyol! Yillar ortidan yillar o‘taveradi, Bayramlarni nishonlashaveradi.

²Ammo boshingga kulfat keltiraman, Faryod qilib, nola chekasan, Seni qurbongoh [2] qilaman.

³Atrofingda senga qarshi lashkar to‘playman, Qamal inshootlarini o‘rnataman. Minoralar qurib, seni o‘rab olaman.

⁴Yerning ostidan sen gapirasan, Tuproq ostidan so‘zlaring keladi, Ovozing sharpa ovoziday yer ostidan chiqadi, Gaplaring tuproq ostidan shivirlab keladi.

⁵Ammo shunda shafqatsiz dushmanlaring Birdaniga chang kabi uchib ketadi, To‘satdan bo‘rondagi xas–cho‘pday Ular to‘zib ketadi.

⁶Keladi Men, Sarvari Olam, gumbur–gumbur, Zilzila, shovqin–suron, dovul, Bo‘ronu yutib yuboruvchi alanga bilan.

⁷Ey Quddus [3], sizga qarshi chiqqan xalqlar yo‘q bo‘lib ketadi. Sizning qal’angizga hujum qilgan vahshiy elatlar Tundagi tush kabi o‘tib ketadi.

⁸Ha, och odam tushida ovqat yesa ham, Uyg‘onganda, ochligicha qolaveradi. Chanqagan odam tushida suv ichadiyu Chanqog‘i qonmasdan uyg‘onadi. Ey Sion tog‘i, sizga qarshi chiqqan Jamiki elatlar ham shu ahvolga tushadi.”

⁹O‘zingizni kar qiling, dong qotib qoling, O‘zingizni ko‘r qiling, ko‘rmas bo‘ling, Mast bo‘ling, ammo sharobdan emas, Gandiraklab yuring, ammo bo‘zadan emas.

¹⁰Egam sizni qattiq uxlatib qo‘ydi, Ey payg‘ambarlar, Egam ko‘zlaringizni uyquga bostirdi. Ey valiylar, Egam boshu ko‘zlaringizni o‘rab qo‘ydi.

¹¹Mana, bu vahiyning hammasi sizlar uchun muhrlangan o‘rama qog‘ozday [4] bo‘lib qoldi. Bu o‘rama qog‘oz o‘qiy oladiganlarga berilib: “Buni o‘qing!” deb buyurilsa, ular: “Yo‘q, muhrlangan ekan”, deydilar.

¹²U o‘qiy olmaydiganlarga berilib: “Buni o‘qing”, deb aytilgan bo‘lsa, ular: “Biz o‘qishni bilmaymiz”, deb javob beradilar.

¹³Ha, Rabbiy aytdi: “Bu xalq faqat so‘zdagina Menga yaqinlashadi, Tildagina Meni izzat qiladi, Yuraklari esa Mendan uzoqdir. Inson yaratgan qoidalar orqali Menga sajda qiladi.

¹⁴Mana, Men yana shunday bir ish qilamanki, Bu xalq hayratda qoladi, Lol bo‘lib, dong qotadi. Donolari donolikdan mahrum bo‘ladi, Idroklilari idrokidan ayriladi.”

¹⁵Holingizga voy! Egamizdan rejalaringizni yashiryapsiz, Ishlaringizni qorong‘ilikda qilyapsiz. “Kim bizni ko‘rardi, kim bizni bilardi?” deysiz.

¹⁶Hammasini ag‘dar–to‘ntar qilyapsiz, Axir, kulolni loyga tenglashtirib bo‘ladimi?! Nahotki buyum o‘zini yaratganga: “Meni yaratganing yo‘q”, deb aytsa?! Nahotki idish kulolga: “Sen tushunmaysan”, deb aytsa?!

¹⁷Mana, qisqa vaqt ichida Lubnon o‘rmoni [5] dalaga aylanadi. Dala esa qalin o‘rmon bo‘ladi.

¹⁸O‘sha kuni kitobdagi so‘zlarni karlar eshitar, Ko‘rlarning ko‘zlari zulmatda nur ko‘rar.

¹⁹Bechoralarga Egam yangi quvonch ato etadi, Isroil xalqining muqaddas Xudosi tufayli Muhtojlar shod bo‘ladi.

²⁰Zolimlar to abad yo‘q bo‘ladi, Mazaxchilar halok bo‘ladi, Yomonlik istovchilar qirib tashlanadi.

²¹Ular odamlarga tuhmat yog‘dirar, Hakamlarga tuzoq qo‘yar, Solihlarni adolatdan mahrum qilar.

²²Shu bois Ibrohimni qutqargan Egam Yoqub xonadoniga shunday deb aytmoqda: “Yoqub nasli endi hech qachon sharmanda bo‘lmaydi, Qo‘rquvdan uning rangi oqarmaydi.

²³Men yaratganlarni, ha, farzandlarini Isroil xalqi o‘zining orasida ko‘rganda, Mening nomimni muqaddas deb biladi, Men, Yoqub naslining Xudosini muqaddas deb biladi. Ha, Isroil xalqining Xudosi — Mening oldimda hayratda turadi.

²⁴Yo‘lidan adashganlar o‘shanda tushunib yetadi, Noliganlar yo‘l–yo‘riqlarimni o‘rganadi.”