Read O‘zbek tilidagi Muqaddas Kitob, 2013 Ishayo 30 Bible Online

Ishayo 30 - O‘zbek tilidagi Muqaddas Kitob, 2013 bible

Ishayo 30

¹Egam aytar: “Eh, itoatsiz xalqim! Ularning holiga voy! Mensiz maslahatlar qilishadi. Sulhlar tuzadi, lekin Mening Ruhim yo‘q–ku ularda! Ha, xalqim gunoh ustiga gunoh orttiraveradi.

²Axir, Mendan so‘ramasdan Misrga boryaptilar, Fir’avndan panoh so‘ryaptilar, Misrdan boshpana istayaptilar.

³Ammo fir’avnning himoyasi ularga sharmandalik bo‘ladi, Misrning boshpanasi ularni uyatga qoldiradi.

⁴Mana, xalqimning a’yonlari Zo‘vanga yetib keldilar, Elchilari Xanesga [1] kirib keldilar.

⁵Lekin ularning hammasi sharmanda bo‘ladi, Axir, Misr ularning xalqiga yordam bermaydi. Hech qanday madad, foyda yo‘q, Ular sharmanda bo‘lib, ta’na tagida qoladi.”

⁶Nagav cho‘lidagi hayvonlar haqida bashorat: Eshagu tuyalarga xazinalarini ortib, Misrga olib ketmoqda. Vahimali sahro bo‘ylab sekin Misr tomon bormoqda. Ular bormoqdalar sherlaru zaharli ilonlar Yashaydigan sahro bo‘ylab. Ammo Misr ularga yordam bermaydi.

⁷Misr bergan madad bekor, foydasiz, Shu bois Men Misrni “Jim o‘tirgan Rahob [2]”, deb atayman.

⁸Egam aytar: “Endi bor, so‘zlarimni bir lavhaga yozib, Bu xalq uchun kitob qilib ber. Bu kelgusi vaqtlar uchun bo‘lsin, Yozilganlar to abad bo‘lsin.”

⁹Ular isyonkor xalq, yolg‘onchi bolalar! Egasining yo‘l–yo‘riqlariga Quloq solishni rad etgan bolalar ular.

¹⁰Ular valiylarga aytar: “Endi vahiy ko‘rmanglar.” Ular payg‘ambarlarga aytar: “Bizlarga haqiqiy bashoratlarni aytmanglar. Bizga shirin so‘zlaru soxta vahiylar ayting.

¹¹Bu yo‘ldan yurmang endi! Qayting bu yo‘ldan. Isroil xalqining muqaddas Xudosi haqida endi Eshitmaylik hech bir narsa!”

¹²Shu bois Isroil xalqining muqaddas Xudosi aytar: “Sizlar Mening so‘zlarimni rad qildingiz, Zulmga, yolg‘onga umid bog‘ladingiz, Ularga ishondingiz.

¹³Shu bois sizlar uchun bu gunohingiz Yorilgan, shishib ketgan devor kabi bo‘ladi. Birdan, bir lahzada qulab tushadi.

¹⁴Sopol idish kabi u parcha–parcha bo‘lib ketadi. Shunchalik ezilib ketadiki O‘choqdan cho‘g‘ yoki hovuzdan suv olgani Biron parchasini ham topib bo‘lmaydi.”

¹⁵Egamiz Rabbiy, Isroil xalqining muqaddas Xudosi shunday demoqda: “Menga qaytsangiz najot topasiz, Halovatli bo‘lsangiz qutqarilasiz. Sokinligu ishonchingiz sizning kuchingiz bo‘ladi. Ammo sizlar buni xohlamadingiz.

¹⁶Aytdingizki: ‘Yo‘q, otlarga minib uchib ketamiz’, Mana, endi otlarga minib uchib ketasiz! Aytdingizki: ‘Uchqur otlarga minib ketamiz’, Endi esa sizni ta’qib qiladiganlar uchqur bo‘ladi!

¹⁷Qaranglar, xalqingizdan besh–oltitasi qolmaguncha Bir kishining tahdidi mingtangizni qochiradi. Besh kishining tahdidi sizlarni qochiradi. Ammo qolganlar tepalikdagi bayroq dastasiday bo‘ladi. Ular tog‘ cho‘qqisidagi bayroq kabi ishora bo‘ladi.”

¹⁸Shuning uchun Egam kutmoqda, Sizlarga shafqat ko‘rsatay, deb. Mana U qo‘zg‘almoqda, O‘z mehrini ko‘rsatay, deb. Axir, Egam adolatli Xudodir. Unga umid bog‘laganlar baxtiyordir.

¹⁹Ey Quddusda makon qilgan Sion xalqi! Sizlar endi yig‘lamaysizlar. Faryodingizni eshitib, Egam albatta marhamat ko‘rsatadi. Ovozingizni eshitib, javob beradi.

²⁰Rabbiy sizlarga kulfatni non qilib, qayg‘uni suv qilib bersa ham, endi O‘sha Ustozingiz O‘zini yashirmaydi. Sizlar o‘z ko‘zlaringiz bilan Uni ko‘rasizlar.

²¹Sizlar o‘ngga yoki chapga burilganingizda, shunday ovozni eshitasizlar: “Mana yo‘l, shu yo‘ldan yuringlar.”

²²Keyin hamma kumush butlar, oltin tasvirlaringizni yo‘q qilib tashlaysiz. Siz o‘sha narsalarni iflos latta–puttaday uloqtirib tashlaysiz. “Ey, daf bo‘l ko‘zimdan!” deysiz o‘sha narsalarga.

²³Egam yerga ekkan urug‘ingizga yomg‘ir beradi. Yerdan keladigan oziq–ovqat mo‘l, barakali bo‘ladi. O‘sha kuni chorvangiz keng yaylovlarda o‘tlaydi.

²⁴Tuproqqa ishlov bergan ho‘kiz, eshaklar eng yaxshi yemni yeydilar.

²⁵O‘sha kuni, dushmanlaringiz o‘ldirilgan, minoralar qulagan kuni har bir tog‘dan, har bir tepalikdan irmoq oqib tushadi.

²⁶Oy quyoshga o‘xshab nur sochadi. Quyosh esa yetti barobar ko‘proq nur beradi, yetti kunlik yorug‘ligini sochadi. Egam O‘z xalqining yaralarini bog‘lab, O‘zi keltirgan jarohatlarga shifo bergan kun shunday bo‘ladi.

²⁷Ana, Egamizning O‘zi uzoqdan kelmoqda, Qalin bulut ichida [3], g‘azabga minib kelmoqda. Lablari g‘azabga to‘la, Tili — yamlamay yutadigan olovday.

²⁸Uning nafasi bo‘yingacha keladigan Toshqin daryoga o‘xshar, U xalqlarni halokat elagida elaydi. U elatlarning og‘ziga suvluq soladi–da, Ularni yo‘ldan adashtiradi.

²⁹Sizlar esa muqaddas bayram [4] oqshomidagiday qo‘shiqlar kuylaysiz. Egamizning tog‘iga [5], Isroil xalqining Qoyasiga nay sadolari ostida borayotganlarday yuraklaringiz shodlikka to‘ladi.

³⁰Egamiz O‘z ulug‘vor ovozini eshittiradi. Ha, qo‘lining zarbasi og‘irdir. Uning kuchli g‘azabi, yamlamay yutay degan olovga o‘xshaydi. Ha, Uning g‘azabi bo‘ronu dovul, momaqaldiroq kabidir.

³¹Egamiz hassasi bilan Ossuriyani uradi. O‘z ovozi bilan uni dahshatga tushiradi.

³²Egamiz qayta–qayta Ossuriyani doira va arfa sadolari ostida hassasi bilan jazolaydi. Egamiz O‘z qo‘lining zarbi bilan jang qilib, ular bilan urishadi.

³³Tofat [6] allaqachon tayyorlangan. Ha, u hatto Ossuriya shohi uchun ham tayyor turibdi. Bu keng chuqurda alangayu o‘tin mo‘l–ko‘l. U yerda Egamizning nafasi vulqondan chiqqan olov kabi yondiradi.