Read O‘zbek tilidagi Muqaddas Kitob, 2013 Ishayo 31 Bible Online

Ishayo 31 - O‘zbek tilidagi Muqaddas Kitob, 2013 bible

Ishayo 31

¹Holingizga voy! Ey Misrdan yordam so‘rab borayotganlar! Holingizga voy! Ey otlarga ishonayotganlar! Ular jang aravalarining ko‘pligiyu Kuchli otliqlarga umid bog‘laydilar. Isroil xalqining muqaddas Xudosiga esa Nazar ham tashlamaydilar, Unga yuz burmadilar.

²Axir, Egam ham dono. U kulfat olib keladi. So‘zlarini U qaytib olmaydi, Fosiqlarning xonadoniga qarshi qo‘zg‘aladi, Badkirdorlarga yordam berganlarga qarshi turadi.

³Misrliklar Xudo emas, insonlardir, Ularning otlari ruh emas, tanadir. Egam ularga qarshi qo‘l ko‘targanda, Madadkor qoqiladi, Madadga zor yiqiladi. Ikkovi birgalikda halok bo‘ladi.

⁴Ha, Egam menga aytmoqda: “Kuchli sher qo‘yni bo‘g‘izlaganda, Cho‘ponlar shovqin–suroniga e’tibor bermas, Ularga hatto nazar ham tashlamas. Shu singari, Men, Sarvari Olam, Sion tog‘i, o‘sha tepalikda Jang qilishga kelaman.

⁵O‘z ini ustida uchayotgan qush kabi, Men, Sarvari Olam, Quddusni qo‘riqlayman. Men Quddusni qo‘riqlab, ozod qilaman, Himoya qilib, najot beraman.”

⁶Ey Isroil xalqi! Garchi sizlar shu qadar fosiq isyonchi bo‘lsangiz ham, endi Egamizga qayting!

⁷Ha, o‘sha kuni har biringiz oltin butlar va kumush tasvirlarni rad etasiz. Ularni gunohkor qo‘llaringiz bilan yasagan edingiz.

⁸Ossuriya vayron bo‘ladi, ammo insonning qilichidan emas. Xudoning qilichi Ossuriyaliklarni uradi. Ossuriyaliklar vahimaga tushib qochadilar. Kuchli, yosh yigitlarini qul qilib olib ketadilar.

⁹Ossuriyaning suyangan qoyasi [1] vahima ichida qochadi, Lashkarboshilari jangovar bayroqdan qo‘rqib, qochib ketadi. Ha, Egamizning alangasi Quddusda, Uning o‘chog‘i Siondadir. Egamizning kalomi shudir.