Read O‘zbek tilidagi Muqaddas Kitob, 2013 Ishayo 32 Bible Online

Ishayo 32 - O‘zbek tilidagi Muqaddas Kitob, 2013 bible

Ishayo 32

¹Ana, shoh solihlik bilan hukmronlik qiladi, Hukmdorlar adolat bilan boshqaradi.

²Har bir odam shamoldan asraydigan panohday bo‘ladi, Bo‘rondan saqlaydigan boshpana kabi bo‘ladi. Ular sahrodagi suv o‘zaniga o‘xshaydi, Tashna yerdagi ulkan qoyaning soyasiday bo‘ladi.

³Ko‘radiganlarning ko‘zlari endi yumilmaydi, Eshitadiganlar endi quloq soladi.

⁴Idroksizning aqli anglaydigan bo‘ladi, Duduq odamning tili ravon bo‘ladi.

⁵Ahmoqni endi aslzoda deb chaqirmaydilar, Yaramasni, hurmatga sazovor, deb aytmaydilar.

⁶Mana, ahmoq kaltafahmlik bilan gapiradi, Fikri–zikri esa yovuzlik bilan band. Qilganlari — nopoklik, Egam haqida xato gapiradi. Och odamni u ochligicha qoldiradi, Chanqaganga suv bermaydi.

⁷Battolning usullari yovuzdir, U yomonliklar rejalashtiradi, Faqirlarning iltijolari to‘g‘ri bo‘lsa ham, Yolg‘on gap–so‘zlar bilan ularni vayron qiladi.

⁸Olijanob odamlar esa yaxshi rejalar tuzadi, Yaxshi niyat qilib, o‘z so‘zida turadi.

⁹Ey siz, beg‘am ayollar, Turinglar, Menga quloq solinglar! Ey siz, o‘ziga ishongan qizlar, Mening gaplarimni eshitinglar!

¹⁰Ey sizlar, beparvo yurganlar, Bir yil o‘tar–o‘tmas titray boshlaysiz. Uzum hosili yaxshi bo‘lmaydi, Meva hosili bo‘lmaydi.

¹¹Qo‘rqing, ey siz, beg‘am ayollar, Qaltirang, ey o‘ziga ishongan qizlar! Tavba qilib, kiyimingizni yechib tashlang. Qanorga o‘ranib, belingizni bog‘lang!

¹²Ko‘kragingizga urib yig‘lang Ajoyib dalalaringiz, Serhosil uzumzorlaringiz uchun!

¹³Xalqimning yeri uchun yig‘lang! U yerni tikan, yantoq butalari bosib ketadi. Ha, shodlikka to‘la bo‘lgan uylar uchun, Quvnoq shahar uchun aza tuting!

¹⁴Mana, saroy tashlandiq bo‘lib qoldi, Gavjum shahar sahroga aylandi. Qal’ayu minora to abad Yovvoyi eshaklar yayraydigan joy, Chorva uchun yaylov bo‘ldi.

¹⁵Toki yuqoridan ustimizga Ruh yog‘ilmaguncha shunday bo‘ladi. Undan keyin sahrolar serhosil dalaga aylanadi, Serhosil dala o‘rmon sifat bo‘ladi.

¹⁶Shunda odillik sahroda makon qiladi, Solihlik serhosil dalada maskan qiladi.

¹⁷Solihlik mevasi tinchlik bo‘ladi, Solihlik samarasi to abad xotirjamlik, ishonch bo‘ladi.

¹⁸Xalqim yashaydi sokin joylarda, Bexavotir uylarda, xotirjam maskanlarda.

¹⁹O‘sha o‘rmonni do‘l yakson qiladi, U shahar esa tamomila yo‘q bo‘ladi.

²⁰Shunday bo‘lsa ham, naqadar baxtlisiz! Irmoqlar bo‘yida ekin ekasiz. Chorvayu podangiz yaylovlarni kezib yuradi.