Read O‘zbek tilidagi Muqaddas Kitob, 2013 Ishayo 33 Bible Online

Ishayo 33 - O‘zbek tilidagi Muqaddas Kitob, 2013 bible

Ishayo 33

¹Ey talanmagan talonchi! Holingga voy! Ey xiyonatni tatimagan xiyonatkor! Holingga voy! Rosa talab bo‘lganingdan so‘ng, O‘zingni talon–taroj qiladilar. Xiyonatni bas qilganingda, Senga xiyonat qiladilar.

²Ey Egamiz, bizga marhamat qil, Biz Senga umid bog‘laymiz. Bizga har kun kuch ato qil, Kulfat chog‘i esa bizga najot ber.

³Gumburlagan ovozingdan xalqlar tarqab ketar, Sen qo‘zg‘alganingda elatlar qochib ketar.

⁴Chigirtkalar [1] yig‘ilganday o‘ljalaring yig‘ilar, Chigirtkalar uyumi kabi o‘ljalaringni talon–taroj qilishar.

⁵Egamiz yuksalgandir. Ha, Uning maskani yuksakda. To‘ldirgandir U Quddusni [2] adolatu solihlik ila.

⁶Ey Quddus, U kunlaringiz tinchligini mahkam tutadi, Uning O‘zi najot, ilm–ma’rifat, donolikning boy manbaidir. Egamizdan qo‘rqish sizlarning xazinangizdir.

⁷Ana qarang! Yahudoning jasur yigitlari Ko‘chalarda faryod qiladi, Tinchlik elchilari [3] achchiq–achchiq yig‘laydi.

⁸Katta yo‘llar huvullab qolgan, Bu yo‘llardan yurmaydi hech kimsa, Ahdlar buzildi, shaharlar vayron bo‘ldi [4], Inson o‘z qadrini yo‘qotdi.

⁹Yurt aza tutdi, azob chekdi. Lubnon o‘rmonlari isnodga qolib, qurib qoldi. Sharon tekisligi [5] sahroga o‘xshab qoldi, Bashan [6], Karmil tog‘idagi daraxtlarning yaproqlari qolmadi.

¹⁰“Endi qo‘zg‘alaman, — demoqda Egamiz. — Endi Men yuksalaman, Ha, O‘zimni baland ko‘taraman.

¹¹Sizlar esa somonga homilador bo‘lganday, Foydasiz poyalar tuqqanday bo‘lasiz. Ruhingiz sizlarni olov kabi yeb bitiradi.

¹²Xalqlar yonib, kul bo‘ladi, Kesilib, olovga tashlangan tikanday bo‘ladi.

¹³Ey uzoqdagilar, Mening qilganlarimni eshiting, Ey yaqindagilar, qudratimni bilib oling!”

¹⁴“Oramizda kim yamlamay yutadigan olov bilan tura oladi? Oramizdagi kim yonib bitmas alanga yonida qola oladi?” deya Quddusda gunohkorlar vahimaga tushdi, Nopoklarni qo‘rquv egallab oldi.

¹⁵Mana, qarang solih yashayotganlarga! Ular to‘g‘ri gapni gapiradi, Tamagirlik foydasidan yuz o‘giradi, Pora olishdan qo‘llarini tiyadi. Qotillarning fitnalariga qo‘shilmaydi, Ko‘zlarini yovuzlik jalb qila olmaydi.

¹⁶Ha, shundaylarning maskani yuksaklarda bo‘ladi, Tog‘lardagi qoyalar boshpanasi bo‘ladi. Nonu suvi hech qachon yetmay qolmaydi.

¹⁷Mana, ko‘zlaringiz ulug‘vor shohni, Keng yoyilgan yurtni ko‘radi.

¹⁸Shunda o‘tmishdagi qo‘rquvni eslab, deysiz: “Qani ekan o‘sha bosh lashkarboshi? Qani o‘sha o‘ljalarni o‘lchagan odam? Qani endi minoralarni sanaganlar?”

¹⁹Sizlar tillarini tushunmaydigan, Gaplarini anglamaydigan, O‘sha takabbur xalqni endi ko‘rmaysiz!

²⁰Mana, qarang Quddusga! Bayramlarimiz shahriga boqing. O‘z ko‘zlaringiz bilan Sionni, O‘sha osuda maskanni ko‘rasiz. Bu chodir hech qachon ko‘chmaydi, Uning qoziqlari surilmaydi, Bironta arqoni uzilmaydi.

²¹Ha, u yerda qudratli Egamiz bizning shohimiz bo‘ladi, U yerda keng daryolaru irmoqlar bo‘ladi. Eshkakli urush kemalari kechib o‘ta olmaydi, Yelkanli jang kemalari ham u yerda suza olmaydi.

²²Axir, Egamiz hukmronlik qiladi, Uning O‘zi qonun–qoidani o‘rnatadi. Egamiz bizning shohimizdir, Uning O‘zi bizga najot beradi.

²³Kemangizning machtasi mustahkam emas, Uning arqonlari zaiflashgan, Uning yelkani yoyilmaydi [7]. So‘ng mo‘l–ko‘l o‘lja bo‘linadi, Hatto cho‘loq ham o‘ljaga sherik bo‘ladi.

²⁴Orangizda hech kimsa, “Men xastaman”, demaydi, Quddusdagilarning gunohlari kechiriladi.