Read O‘zbek tilidagi Muqaddas Kitob, 2013 Ishayo 34 Bible Online

Ishayo 34 - O‘zbek tilidagi Muqaddas Kitob, 2013 bible

Ishayo 34

¹Ey elatlar, yaqinroq keling, quloq soling! Ey xalqlar, diqqat qiling! Eshiting, ey zamin, zamindagi bor jonzot! Olamu uning mahsuli, eshiting!

²Ha, Egamiz butun elatlardan g‘azabda, Ularning lashkarlariga qahri keldi. Egamiz ularni tamomila qirib tashlaydi. Ularni bo‘g‘izlashga hukm etgan.

³Murdalari ko‘milmay qolib ketadi, Jasadlaridan qo‘lansa hid anqiydi, Ularning qoni qirlarda daryo bo‘lib oqadi.

⁴Samodagi hamma yulduzlar chirib ketadi, Osmon o‘rama qog‘ozday [1] eshilib ketadi. Tokdan qurib tushgan barglar singari, Daraxtidan to‘kilgan anjir singari Samoviy jismlar to‘kilib ketadi.

⁵Egam aytar: “Ha, samolarda qilichim Mening paydo bo‘ldi [2]. Mana, u Edomga [3], Men halokatga hukm qilgan xalqning boshiga tushadi.”

⁶Egamizning qilichi qonga bulg‘angan. Qo‘zilar, echkilar yog‘iga, qoniga, Qo‘chqor buyragining yog‘iga to‘ygan. Ha, Bozrax shahrida [4] Egamizga qurbonlik bor, Edom yurtida katta qirg‘in boshlandi.

⁷Yovvoyi buqalar, novvoslar, katta ho‘kizlar ham Ular bilan birga qulaydi. Ularning yeri qon bilan sug‘oriladi, Tuprog‘i yog‘ni shimib oladi.

⁸Ha, bu kun Egamizning qasos kunidir. Quddus [5] uchun Egamiz qasos oladigan yildir bu.

⁹Edom irmoqlari qatronga aylanadi, Tuprog‘i oltingugurtga aylanadi, Butun yurt esa alanga ichida qoladi.

¹⁰Alanga kechayu kunduz o‘chmaydi, Tutun abadiy ko‘tarilaveradi. Bu yurt avlodlar osha Vayrona bo‘lib qolaveradi. Hech kim uni to abad bosib o‘tmaydi.

¹¹U yer boyqushlaru kirpilarning mulki bo‘ladi, Ukkiyu [6] qarg‘alar u yerda makon qiladi. Ha, Egamiz bu yurtni o‘lchab, Vayronayu xarobaga loyiq topdi.

¹²Bu yurtda aslzodalar yo‘q endi, U yerdan birorta shoh chiqmaydi, Barcha shahzodalari yo‘q bo‘lib ketadi.

¹³Qal’alarida tikanlar o‘sadi, Saroylarida yantoqlar, qushqo‘nmas butalar bitadi. U yer chiyabo‘rilarga maskan bo‘ladi, Tuyaqushlarning boshpanasi bo‘ladi.

¹⁴Yovvoyi mushuklaru sirtlonlar Bir–biriga duch keladi, Yovvoyi echkilar bir–birini chaqirib ma’raydi, U yerda tun sharpalari dam oladi, O‘sha yer ularga oromgoh bo‘ladi.

¹⁵Ilonlar [7] u yerda in qurib, tuxum qo‘yadi, Soya joylarda bolalarini yig‘adi. Quzg‘unlar u yerda juftlanib to‘planadi.

¹⁶Mana, Egamizning kitobidan [8] topib, o‘qing: Ulardan birontasi yo‘q bo‘lmaydi, Hammasi juft–juft bo‘ladi, Egamizning O‘zi shunday amr etgan, Uning Ruhi hammasini to‘pladi.

¹⁷Egamiz qur’a tashlab, har birining ulushini berdi, Arqon bilan o‘lchab, yurtni ularga bo‘lib berdi. Bu yurt to abad ularning mulki bo‘ladi, Avlodlar osha ular bu yerda yashaydi.