Read O‘zbek tilidagi Muqaddas Kitob, 2013 Ishayo 35 Bible Online

Ishayo 35 - O‘zbek tilidagi Muqaddas Kitob, 2013 bible

Ishayo 35

¹Cho‘lu biyobon shod bo‘ladi, Sahro quvonib, atirgulday gullaydi.

²Hamma yoqda gul–chechaklar ochiladi, Cho‘l shodlanib, quvonchdan hayqiradi. Lubnonning chiroyi, Karmil tog‘ining, Sharon tekisligining [1] ulug‘vorligi Unga beriladi. Ular Egamizning shuhratini, Xudoyimizning ulug‘vorligini ko‘radi.

³Qo‘llari charchaganlarga dalda bergin, Tizzalari bukilganlarga madad bergin.

⁴Qo‘rqoq yuraklarga shunday deb aytgin: “Dadil bo‘ling, qo‘rqmang! Mana, Xudoyingiz! Qasos kelmoqda ilohiy intiqom ila, Uning O‘zi sizlarga najot beradi.”

⁵O‘sha paytda ko‘rlarning ko‘zlari ochiladi, Karlarning quloqlari esa eshitadi.

⁶Cho‘loq ham ohuday sakraydi, Soqov til shodlikdan hayqiradi. Mana, axir, sahroda suv sharillab oqmoqda, Cho‘l joylar esa irmoqlarga to‘la.

⁷Qizib yotgan qum hovuzga aylanadi, Qaqragan yer qaynayotgan buloq bo‘ladi. Oldin chiyabo‘rilar yashagan maskanlarda Endi maysa, qamish, papiruslar o‘sadi.

⁸O‘sha yerdan katta yo‘l o‘tadi, Muqaddas Yo‘l deb atalgan yo‘l bo‘ladi. Nopoklar u yo‘lga qadam bosmaydi, Bu yo‘l mana shu yo‘ldan yuradiganlarnikidir. Bu yo‘ldan yuradiganlar, Hatto idroksizlar ham adashmaydi [2].

⁹O‘sha yerda sher bo‘lmaydi. Yirtqich hayvon yurmaydi. Ular bu yerda topilmaydi. Ha, faqat najot topganlar o‘sha yerda yuradi.

¹⁰Egamiz qutqarganlar qaytib keladi, Ular qo‘shiq aytib, Quddusga [3] kiradi. Boshlarida abadiy shodlik toji bo‘ladi, Shod–xurramlik ularni qamrab oladi, Qayg‘u, g‘amlar yo‘q bo‘lib ketadi.