Read O‘zbek tilidagi Muqaddas Kitob, 2013 Ishayo 38 Bible Online

Ishayo 38 - O‘zbek tilidagi Muqaddas Kitob, 2013 bible

Ishayo 38

¹O‘sha kunlari Hizqiyo qattiq kasal bo‘lib qoldi. Omiz o‘g‘li Ishayo uning huzuriga kelib, shunday dedi: “Egamiz shunday aytmoqda: ‘Tayyorgarligingni ko‘rib qo‘yaver, tuzalmaysan endi, o‘lasan.’”

²Hizqiyo yuzini devorga burib, Egamizga yolvordi:

³“Ey Egam! Esla! Doimo sodiqlik va butun qalbim bilan huzuringda yurdim! Ko‘z o‘ngingda o‘sha yaxshi ishlarni qildim.” Shunday deb achchiq–achchiq yig‘ladi.

⁴Shundan keyin Ishayoga Egamizning quyidagi so‘zi ayon bo‘ldi:

⁵“Borib, Hizqiyoga shunday deb ayt: ‘Bobong Dovudning Xudosi — Egamiz shunday aytmoqda: «Iltijolaringni eshitdim, ko‘z yoshlaringni ko‘rdim. Umringni yana o‘n besh yilga uzaytiraman.

⁶O‘zingni va bu shaharni Ossuriya shohining qo‘lidan xalos qilaman. Ha, bu shaharni himoya qilaman.

⁷Ey Hizqiyo! Mana senga Mendan nishona. Men, Egang, bergan va’damni bajaraman.

⁸Mana qara! Botayotgan quyosh Oxozning zinapoyasiga [1] soya tushirib turibdi. O‘sha soyani o‘n qadam orqaga surdiraman».’” Shunday qilib, soya o‘n qadam orqaga ketdi.

⁹Shoh Hizqiyo sog‘aygandan keyin quyidagi she’rni yozdi:

¹⁰Men aytdim: “Hayotim cho‘qqisida O‘liklar diyoriga [2] boramanmi? Umrimning qolgani xazon bo‘lsinmi?

¹¹Men Egamni ko‘rmayman. Ha, Uni ko‘rmasman bu yorug‘ yer yuzida. Tirik zotlarni endi ko‘rmayman. Bu dunyodagilar bilan bo‘lmayman.

¹²Cho‘ponning chodiri yig‘ilganiday Mening umrim uzildi, Mendan tortib olindi. Umrim to‘quvchining matosi kabi bitdi. Uning dastgohidagi ipday Mening umrim ham qirqildi. Ey Rabbiy, tunu kun meni qiynaysan.

¹³Tonggacha faryod qildim, Sherday hamma suyaklarimni sindirasan. Ey Rabbiy, tunu kun meni qiynaysan.

¹⁴Qaldirg‘ochu turnaday nola qildim, Musichaday oh–voh qildim. Yuqoriga qarayverib, ko‘zlarim toldi, Ey Rabbiy, ezildim, yordam ber menga!

¹⁵Endi men nima desam ekan?! Egam menga nima aytgan bo‘lsa, Uning O‘zi o‘shani qildi. Jonim tortgan bu azoblar tufayli Umrim bo‘yi itoat etib yuraman [3].

¹⁶Ey Rabbiy, Sening tarbiyang yaxshidir, Chunki u hayotu sog‘likka yetaklaydi. Sen menga sog‘ligimni qaytarding, Menga qayta hayot baxsh etding.

¹⁷Mana, hamma qiyinchiligim Yaxshilikka aylandi. Qabrdan meni saqlading [4], Hamma gunohlarimni kechirding.

¹⁸Axir, o‘liklar diyori [5] Senga shukr qilmaydi, O‘lim Senga hamdu sano aytmaydi. Qabrga boradiganlar Sening sadoqatingdan umid qilmaydi.

¹⁹Mana, men senga shukr aytmoqdaman. Axir, tiriklar, faqatgina tiriklar Senga shukr aytadilar–ku! Otalar o‘zlarining farzandlariga Sening sadoqatingni bildiradilar.

²⁰Egam meni qutqaradi. Butun umrimiz bo‘yi torli asboblar ila Egamning uyida biz kuylaymiz.”

²¹Ishayo: “Anjir shirasini olib kelib, yaraning ustiga qo‘yinglar. Shunda Hizqiyo sog‘ayadi”, — degan edi.

²²Hizqiyo esa: “Egamizning uyiga borishimni qanday bilaman? Buni nima isbotlaydi?” — deb so‘ragandi [6].