Read O‘zbek tilidagi Muqaddas Kitob, 2013 Ishayo 40 Bible Online

Ishayo 40 - O‘zbek tilidagi Muqaddas Kitob, 2013 bible

Ishayo 40

¹“Yupating, xalqimni yupating, — demoqda Xudoyingiz. —

²Quddusning ruhini ko‘tarib, unga ayting: ‘Azob kosang to‘lib bo‘ldi, Ayblaring uchun jazo olib bo‘lding. Hamma gunohlaring evaziga Men, Egangdan ikki karra olding.’”

³Bir ovoz shunday hayqirmoqda: “Sahroda [1]Egamizga yo‘l hozirlang, Cho‘lda Xudoyimizga to‘g‘ri yo‘l oching.

⁴Har bir jarlik yuksaladi, Har bir tog‘u tepalik pasayadi. O‘nqir–cho‘nqir joylar tekis bo‘ladi, O‘ydim–chuqur yer tekislik bo‘ladi.

⁵O‘shanda Egamizning ulug‘vorligi zohir bo‘ladi, Butun jonzot birgalikda buni ko‘radi. Ha, Egamiz O‘z og‘zi bilan shuni aytdi.”

⁶Bir ovoz: “E’lon qil!” deb aytdi, Ikkinchisi: “Nimani e’lon qilaman?” deb so‘radi [2]. Birinchi ovoz shunday dedi: “Inson zotining hammasi maysaday, Ularning barcha sodiqligi dala guli kabidir.

⁷Ularning ustidan Egamizning nafasi esganda O‘tlar quriydi, gullar so‘lib qoladi. Mana, bu xalq maysaning o‘zi.

⁸O‘tlar quriydi, gullar so‘lib qoladi, Xudoyimizning kalomi esa abadiy turadi.”

⁹Ey xushxabar keltirgan Quddus, Baland toqqa chiq! Ey xushxabar keltirgan Sion [3], Baland ovozda e’lon qil! Qo‘rqmagin, jar solgin! Yahudo shaharlariga: “Mana sizning Xudoyingiz”, deb aytgin.

¹⁰Mana, Egamiz Rabbiy qudrat ila keladi, Qudrati ila hukmronlik qiladi. Uning O‘zi taqdirlaydi, Mukofotini O‘zi bilan olib kelmoqda.

¹¹Cho‘pon kabi U O‘z suruvini boqadi, Qo‘zilarni qo‘llarida ko‘taradi. Ularni ko‘tarib, bag‘riga bosadi, Qo‘zilari bilan birga ona qo‘yni Ehtiyotlab haydab boradi.

¹²Kim hovuchi ila suvlarni o‘lchagan?! Kim qarichlab osmonni o‘lchagan?! Zamin tuprog‘ini o‘lchagan bormi?! Kim tog‘larni tarozida tortib ko‘rgan?! Tepaliklarni tarozi pallasida tortgan?!

¹³Kim Egamizning Ruhiga [4] yo‘l ko‘rsatadi?! Kim Unga maslahat beradi?!

¹⁴U kimga maslahat solgan?! Kim Unga nasihat bergan?! Kim Unga adolat yo‘lini o‘rgatgan?! Unga bilim bergan bormi?! Idrok yo‘llarini Unga ko‘rsatgan bormi?!

¹⁵Axir, elatlar chelakdagi bir tomchi suvdaydir, Ular tarozi pallasidagi chang kabidir. Mana, orollarni ham Egamiz changday ko‘taradi.

¹⁶Lubnon yurtidagi hayvonlar qurbonlikka ozlik qiladi, O‘rmonlarining daraxtlari esa yetarli o‘tin bo‘lmaydi.

¹⁷Jamiki elatlar Egamiz oldida hech nima emas, Egamiz nazarida ular arzimas, bo‘shliqdir.

¹⁸Xo‘sh, Xudoni kimga o‘xshatasiz?! Unga qanday qiyofani berasiz?!

¹⁹Hunarmand yasagan butnimi?! Axir, usta uni oltin bilan qoplagan. Unga kumush zanjirlar yasab bergan.

²⁰Unday qilishga qurbi yetmagan esa Chirimaydigan yog‘och topadi. Mohir usta tanlab, Yiqilib tushmaydigan but yasatadi.

²¹Bilmaysizmi?! Eshitmaganmisiz?! Boshidan sizga aytilmaganmi?! Dunyo poydevoriga qarab ham tushunib yetmaysizmi?!

²²Xudo osmon gumbazi ustida o‘tiradi, Zamin ahli chigirtka kabidir. Xudo osmonni parda kabi yoygan, Odamzod makon qilsin, deya chodir kabi qurgan.

²³Shahzodalarni U pastga uradi, Zamin hukmdorlarini yo‘qqa chiqaradi.

²⁴Evoh, ular ekilishi bilanoq qurib qoladi. Yerga o‘tqazilishi bilanoq so‘lib qoladi. Ildiz otishi bilanoq qurib qoladi. Ha, Egamizning nafasi ularni quritadi. Bo‘ron ularni somonday uchirib ketadi.

²⁵“Meni kimga qiyoslaysiz? Kim Menga teng kela olar?” — deb aytadi muqaddas Xudo.

²⁶Ko‘zlaringizni osmonga tiking, qarang: Axir, bularni kim yaratgan? Xudo osmonga yulduzlarni terib qo‘ygan–ku! Uning O‘zi har biriga nom bergan–ku! O‘zining buyuk kuchi, ulug‘ qudrati bilan Har birini o‘z joyiga chiqarmay qo‘ymaydi.

²⁷Ey Yoqub nasli, nima uchun sen: “Boshimga tushganni Egamiz ko‘rmaydi”, deysan? Ey Isroil xalqi, nima uchun sen: “Mashaqqatlarimni Xudoyim unutgan”, deb aytasan?

²⁸Nahotki bilmaysan? Nahotki eshitmagansan? Egamizning O‘zi abadiy Xudo–ku! Butun olamni U yaratgan–ku! U charchamaydi, holdan toymaydi, Uning donoligini bilib bo‘lmaydi.

²⁹U toliqqanga kuch beradi, Zaifning kuchiga kuch qo‘shadi.

³⁰Hatto yoshlar charchaydi, holdan toyadi, Yigitlar qoqilib, yiqiladi.

³¹Xudodan umid qilganlar esa Yangidan kuch oladi, Burgut singari qanot qoqadi. Ular yugurib, charchamaydi, Yurib ham hech toliqmaydi.