Read O‘zbek tilidagi Muqaddas Kitob, 2013 Ishayo 41 Bible Online

Ishayo 41 - O‘zbek tilidagi Muqaddas Kitob, 2013 bible

Ishayo 41

¹Egam aytar: “Mening oldimda sukut saqlang, Ey dengiz ortidagi yurtlar! Xalqlarning kuchi qayta tiklansin. Ular yaqinroq kelib, gapirsinlar. Hukm qilishga birga yig‘ilaylik.

²Kim sharqdan g‘olib shohni [1] chaqirdi? Kim uni o‘z xizmatiga chaqirdi? Kim unga elatlarni bo‘ysundiradi? Kim shohlarni oyog‘i ostida ezadi? Qilichi bilan ularni chopib tashlaydi, Yoyi bilan ularni somonday uchiradi.

³Ularni ta’qib qiladi, Oyoq bosmagan yo‘ldan yuradi, O‘sha joylardan eson–omon o‘tadi.

⁴Bularni qiladigan kim, bajaradigan kim?! Boshidan avlodlarni dunyoga keltirgan kim?! Men emasmi?! Azaldan Men sizning Egangizman, Oxirgacha ham Egangiz bo‘laman.

⁵Dengiz ortidagi yurtlar Buni ko‘rib, qo‘rqadi. Yer yuzining to‘rt burchidan titrab, Ular yaqinlashib keladi.

⁶‘Qo‘rqmagin’, deya hamma Bir–biriga dalda beradi.

⁷Mana, hunarmand odam Tilla ustasiga dalda beradi. ‘Ha, yaxshi chiqdi’, deb misgar Temirchiga dalda beradi. Yiqilib tushmasin, deb butni mixlab qo‘yadi.

⁸Ammo sen–chi, ey qulim Isroil, Ey O‘zim tanlagan Yoqub nasli, Do‘stim Ibrohimning avlodi!

⁹Seni yerning to‘rt burchidan olib keldim, Yerning olis burchaklaridan chaqirdim. Aytdimki: ‘Sen Mening qulimsan, Seni tanladim, rad etmadim.’

¹⁰Qo‘rqma, Men sen bilan birgaman, Vahimaga tushma, Men sening Xudoyingman. Senga kuch beraman, O‘zim yordamga kelaman, G‘olib o‘ng qo‘lim bilan seni qo‘llayman.

¹¹Ha, senga qarshi bo‘lganlarning hammasi Sharmandayu sharmisor bo‘lib qoladi, Dushmanlaring yo‘q bo‘ladi, nobud bo‘ladi.

¹²Urush qiladiganlarni izlab ham topa olmaysan, Sen bilan jang qilganlar tamomila tugab bitadi.

¹³Men O‘zim, Egang Xudo, o‘ng qo‘lingni kuchaytiraman, Senga: ‘Qo‘rqma, O‘zim yordamga kelaman’, degan Menman.”

¹⁴Egamiz shunday aytmoqda: “Qo‘rqma, ey Isroil xalqi, Yoqub nasli! Sen kichkina bir chuvalchangdaysan. Ammo O‘zim senga yordam beraman. Men, Isroil xalqining muqaddas Xudosi, Sening Qutqaruvchingman.

¹⁵Sendan bug‘doy yanchadigan xo‘ptir [2] yasayman, Yangi, o‘tkir, tishli xo‘ptir qilaman, Sen tog‘larni yanchasan, ezasan, Tepaliklarni [3] somon qilasan.

¹⁶Sen ularni sovurib tashlaysan, Ularni shamol uchirib ketadi. Bo‘ron ularni to‘zg‘itadi, Sen esa Men, Egang, tufayli sevinch topasan, Isroil xalqining muqaddas Xudosi ila maqtanasan.

¹⁷Qashshoqlaru muhtojlar suv izlar, Ammo suv yo‘q. Og‘izlari chanqoqdan qurib ketgan. Men, Egangiz, ularga javob beraman, Men, Isroil xalqining Xudosi, ularni tark etmayman.

¹⁸Yalang‘och tepaliklar ustidan daryolar o‘tkazaman, Vodiylar o‘rtasida buloqlar ochaman. Sahrolarni suv to‘la hovuzlarga aylantiraman, Qaqragan yerda buloqlar ochaman.

¹⁹Cho‘lda sadr, akas, zaytun daraxtlarini, Hamda mirta butalarini o‘stiraman, Sahroda sarv, archa, qarag‘ay daraxtlarini o‘stiraman.

²⁰Mana, hamma ko‘rib bilsin, Bularni Men, Egasining qo‘li qilganini tushunsin. Men, Isroil xalqining muqaddas Xudosi, Bularni yaratganimni ular anglab yetsin.”

²¹Yoqub naslining Shohi — Egamiz, shunday deydi: “Da’volaringizni ayting, Isbotingizni keltiring.

²²Qani, butlaringizni olib keling, Kelajakda nima bo‘lishini Butlaringiz aytib bersin. O‘tmishda bo‘lganlarni tushuntirsin–chi! O‘shalar haqida o‘ylab ko‘raylik. Oxiri nima bo‘lishini bilaylik. Ha, bo‘ladiganlarni bizga aytsin.

²³Ey butlar! Kelajakni bizga bildiring, Shunda xudo ekanligingizni bilamiz. Biron yaxshilik yoki yomonlik qilib ko‘ring–chi, Ko‘rib, birgalikda vahimaga tushaylik.

²⁴Axir, sizlar hech nima emassiz, Ishlaringiz esa undan ham battar. Sizni tanlaganning o‘zi jirkanchdir.

²⁵Men shimoldan bir yetakchi [4] chaqirdim. Ana, u keladi. Sharqdan kelib, Mening nomimga shuhrat keltiradi. Hukmdorlarni u tuproqday oyoq osti qiladi, Kulolning loyiday qilib tepkilaydi.

²⁶Kim buni oldindan aytibdiki, biz bilibmiz?! Kim buni ilgari bildiribdiki, ‘U haq edi’, deb aytsak?! Sizlar gapirganingizni hech kim eshitmadi, Hech kim aytmadi, xabar bermadi.

²⁷Quddusga bashorat qilinganlar, Qarang, mana o‘shalar! Ha, Sionga yana xushxabar elchisini Men yubordim.

²⁸Qaradim, lekin birontasi yo‘q, Orasida birorta maslahatchi yo‘q, So‘raganda javob beradigani yo‘q.

²⁹Qarang, butlarining hammasi soxta, Qilgan ishlari hech nima emas, Hamma butlari shamolday behuda.”