Read O‘zbek tilidagi Muqaddas Kitob, 2013 Ishayo 43 Bible Online

Ishayo 43 - O‘zbek tilidagi Muqaddas Kitob, 2013 bible

Ishayo 43

¹Endi ey Yoqub nasli, seni yaratgan Egamiz gapirmoqda! Ey Isroil xalqi, seni barpo qilgan Egamiz shunday aytmoqda: “Men seni qutqardim, Sening ismingni aytib chaqirdim, Sen Menikisan, qo‘rqma!

²Suvlardan o‘tganingda Men sen bilan birga bo‘laman. Daryolardan o‘tganingda Suvlar seni ko‘mmaydi. Olovdan o‘tganingda yonmaysan, Olov seni kuydirmaydi.

³Ha, Men sening Egang Xudoman, Isroil xalqining muqaddas Xudosi — Qutqaruvchingman. Sen uchun to‘lov qilib Misrni berdim, Habashiston [1], Savo [2] yurtlarini sening o‘rningga berdim.

⁴Ko‘z oldimda azizsan, qadrlisan, Men seni sevaman. Shu bois sening evazingga odamni, Joning evaziga xalqlarni beraman.

⁵Qo‘rqma, Men sen bilan birgaman, Naslingni sharqdan olib kelaman, Sizlarni g‘arbdan yig‘ib kelaman.

⁶Shimolga: ‘Ularni ber’, deyman. Janubga: ‘Ularni ushlab qolma’, deb aytaman. O‘g‘illarim uzoqlardan, Qizlarim yerning chetlaridan kelsin.

⁷Menga tegishli bo‘lganlarni O‘z shuhratim haqi yaratdim, O‘zim ijod qilib, ularni bino qildim.”

⁸O‘sha xalqni ozod qilgin. Ko‘zi bor, ammo ko‘r bo‘lgan, Qulog‘i bor, ammo kar bo‘lgan O‘sha xalqni ozod qilgin.

⁹Jamiki elatlar birga yig‘ildi. Qani, xalqlar kelib qo‘shilsin. Ularning orasidan kim buni aytib beradi?! O‘tib ketgan narsalarni kim bizga bildiradi?! Guvohlarini chaqirib, haqligini isbotlasin, Boshqalar eshitib: “Bu to‘g‘ri”, deb aytsin.

¹⁰Egamiz shunday aytmoqda: “Sizlar mening shohidimsizlar, Sizlar mening qulimsizlar. Meni bilsin, Menga ishonsin, deb Tanho Xudo Men ekanligimni bilsin, deb Sizlarni tanladim. Mendan oldin biron xudo bo‘lmagan, Mendan keyin ham bo‘lmaydi.

¹¹Men Egangizman! Yolg‘iz Men Egangizman, Mendan boshqa qutqaruvchi yo‘q.

¹²Men O‘zim aytdim, qutqardim, bildirdim, Orangizda boshqa biron xudo yo‘q.” Egamizning kalomi shudir: “Men Xudoman, sizlar Mening shohidimsiz.

¹³Ha, azaldan buyon Men O‘shaman, Hech kim Mening qo‘limdan qutqara olmaydi. Men qilganimni kim bekor qila oladi?!”

¹⁴Isroil xalqining muqaddas Xudosi, Qutqaruvchingiz — Egamiz shunday demoqda: “Sizlarni deb Bobil ustiga lashkar yuboraman, O‘zlari faxrlangan kemalarda Bobilliklar [3] qochishga majbur bo‘ladilar.

¹⁵Men muqaddas Xudoyingiz — Egangizman, Isroil xalqining Yaratuvchisi — Shohingiz Menman.”

¹⁶Egamiz shunday demoqda: “Men dengizni bo‘lib, yo‘l qildim, Bahaybat suvlar ichra so‘qmoq ochdim [4].

¹⁷Jang aravalariyu otlarni, Lashkaru jangchilarni olib chiqdim. Ana ular yotibdilar, turmaydilar. Pilikday miltirab, o‘chib qolganlar.

¹⁸O‘tmishdagilarni yodga olmang, Qadimgilarni o‘ylayvermang.

¹⁹Mana, Men yangi bir ish qilyapman. Shu paytning o‘zidayoq sodir bo‘lyapti! Ko‘rmayapsizmi?! Men sahroda yo‘llar ochaman, Ha, cho‘lda daryolar yarataman.

²⁰Hatto yovvoyi hayvonlar Meni ulug‘laydi, Chiyabo‘ri, tuyaqushlar ham Meni sharaflaydi. Zotan, tanlagan xalqimga suv beray, deya Sahroga suvlar yubordim, Cho‘lda daryolar yaratdim.

²¹Bu xalqni O‘zim uchun yaratganman. Ular Menga hamdu sano aytsinlar.

²²Sen esa, ey Yoqub nasli, Menga sajda qilmading! Ey Isroil xalqi! Sen Mendan bezor bo‘lding.

²³Kuydiriladigan qurbonlik qilib, Qo‘ylaringni Menga olib kelmading. Qilgan qurbonliklaring bilan Meni ulug‘lamading. Don nazrlarini og‘ir yuk qilmadim–ku! Tutatqilar so‘rab, seni charchatmadim–ku!

²⁴Menga xushbo‘y hidli qamish sotib olmading. Qurbonliklar yog‘i bilan Meni to‘ydirmading. Evoh, gunohlaring bilan Menga yuk bo‘lding, Ayblaring bilan Meni charchatding.

²⁵O‘zimning haqi–hurmatim Ayblaringni kechiradigan Menman. Gunohlaringni yodga olmayman.

²⁶Qani, birga da’volashaylik. Gapir! Aybsizligingni isbotla–chi! Yodimga sol–chi!

²⁷Axir, eng katta bobong [5] gunoh qilgandi. Payg‘ambaru ruhoniylaring Menga qarshi chiqqandi.

²⁸Shu bois muqaddas maskanning Boshliqlarini harom qilaman. Ha, Yoqub naslini halokatga, Isroil naslini haqoratga hukm etaman.”