Read O‘zbek tilidagi Muqaddas Kitob, 2013 Ishayo 44 Bible Online

Ishayo 44 - O‘zbek tilidagi Muqaddas Kitob, 2013 bible

Ishayo 44

¹Egam aytar: “Endi eshit, ey qulim Isroil! Ey Yoqub nasli! Men seni tanlaganman.

²Men, Egang, seni yaratganman, ona qornida senga shakl berganman. Sening madadkoring, Men, shunday aytmoqdaman: ‘Qo‘rqma, ey aziz Isroil! [1] Ey Yoqub nasli, Men seni tanlaganman.

³Chanqoq yerga Men suv beraman, Qaqragan tuproqda irmoqlar oqizaman. Naslingga Ruhimni beraman, Zurriyoting ustiga O‘z barakamni yog‘diraman.

⁴Ular oqar suv bo‘yidagi tol daraxti kabi, Maysalar orasidan o‘sib chiqadi.

⁵Biri: «Men Egamnikiman», deb aytadi, Boshqasi Isroil xalqiga [2] qo‘shilay, deb keladi. Yana biri qo‘liga: «Egamniki», deb yozadi–da, Isroil xalqining biriman, deb aytadi.’”

⁶Isroilning Shohi, uning Qutqaruvchisi, Sarvari Olam — Egamiz shunday aytmoqda: “Birinchiyu oxirgi Men O‘zimman, Mendan boshqa hech bir xudo yo‘q!

⁷Kim Menga o‘xshaydi? Qani, gapirsin–chi! Qadimiy xalqni yaratganimdan beri Nima bo‘lganlarini boshdan aytib bersin! Kelajakda nima bo‘lishini bildirsin.

⁸Vahimaga tushmang, qo‘rqmang! Sizga qadimdan e’lon qilib, bildirmadimmi?! Sizlar Mening guvohlarimsiz! Mendan boshqa xudo bormi?! Yo‘q, boshqa qoya yo‘q. Men boshqa hech birini bilmayman!

⁹But yasaydiganlarning hammasi hech narsadaydir. Xush ko‘rgan butlari hech foyda keltirmaydi. O‘sha butlarning guvohlari ko‘r, johildir. Shuning uchun ular sharmanda bo‘lib qoladi!

¹⁰Axir, kim foydasiz xudolarning tasvirlarini yasaydi!

¹¹Hali o‘sha butparast do‘stlarning hammasi sharmanda bo‘ladi. But tayyorlovchilarga qarang. Ular ham oddiy odamlar–ku! Qani, hammasi to‘plansin! Ular qo‘rquvga tushib, birgalikda sharmandayu sharmisor bo‘ladi.

¹²But yasaydigan temirchi asbobini oladi. Buyumni ko‘mir cho‘g‘i ustida qizdiradi. Bolg‘asi bilan uni yasaydi. Qo‘lining kuchi bilan ishlaydi. Qorni ochib, holdan toyadi. Tashnalikdan sillasi quriydi.

¹³Duradgor ip bilan yog‘ochni o‘lchaydi. Xohlagan shaklini chizib olib, randa bilan ishlov beradi. Uni inson shaklida yasaydi. Unga inson chiroyini beradi–da, sajdagohga o‘rnatadi.

¹⁴O‘rmonda sarv, eman daraxtlarini tanlaydi. U o‘zi uchun sadr daraxtlaridan kesib oladi. Yoki qarag‘ay daraxtini o‘tqazadi. Yomg‘ir esa o‘sha daraxtni o‘stiradi.

¹⁵Keyin bular odamga o‘tin bo‘ladi. Odam yog‘ochning ba’zilarini olib isinadi. Ba’zilarini esa yoqib, non yopadi. Yana o‘ziga xudo ham yasab, unga sajda qiladi. But yasab, unga muk tushib, ta’zim qiladi!

¹⁶U o‘tinlarning yarmini yoqadi. Olovda go‘sht pishirib, qornini to‘ydiradi. Isinib bo‘lgach: ‘Oh, oh, isinib oldim, olovning taftidan jonim orom olyapti’, — deydi.

¹⁷Yog‘ochning qolganidan esa xudosini, o‘zining butini yasaydi. ‘Meni o‘zing qutqar, axir, sen mening xudoyimsan!’ deb butga ibodat qiladi, muk tushib sajda etadi.

¹⁸Ular hech narsani bilmaydilar, tushunmaydilar. Ko‘zlariyu yuraklarida to‘siq bor, ular ko‘rmaydi, tushunmaydi.

¹⁹Birortasi ham o‘ylab ko‘rmaydi. ‘O‘tinning bir qismini yoqdim. Olovida non yopdim, go‘sht pishirib yedim. Endi qolganidan jirkanch narsa yasaymanmi?! Yog‘och g‘o‘lasiga ta’zim qilamanmi?!’ — deb aytishga aql–idrok yo‘q.

²⁰Eh, kul yeydiganlar! Aldangan qalbi uni adashtiradi. U o‘z jonini qutqara olmaydi. ‘Qo‘limdagi shu narsa soxta–ku!’ — deb o‘ziga aytmaydi.

²¹Ey Yoqub nasli! Ey Isroil xalqi! Bularni yodda tut! Sizlar Mening qulimsiz. Men sizlarni yaratdim, Ha, sizlar Mening qulimsiz! Ey Isroil, Men sizlarni unutmayman!

²²Gunohlaringizni bulutday haydadim, Ayblaringizni tumanday tarqatdim, Sizlarni qutqarganman, Menga qayting.”

²³Ey samolar, shodlikdan hayqiring! Mana, Egamiz ajoyib bir ish qildi! Hayqiring, ey zaminning tubsiz joylari! Shodlikdan hayqiring, ey tog‘lar, Ey o‘rmon, o‘rmondagi har bir daraxt! Ha, Egamiz Yoqub naslini qutqarib, O‘ziga oldi. U Isroil xalqi orasida ulug‘lanmoqda.

²⁴Qutqaruvchingiz, onangiz qornida sizga shakl bergan Egamiz shunday aytmoqda: “Hammasini yaratgan Men Egangizman, Yolg‘iz O‘zim samolarni yoyganman! [3] Bir O‘zim zaminni yaratganman!

²⁵Folbinlarning alomatlarini behudaga chiqaraman, Bashoratgo‘ylarni laqillataman, Donishmandlarga zarba berib, Bilgan narsalarini nodonlikka chiqaraman.

²⁶O‘z qulimning bashoratini ijro etaman, Elchilarimning aytganlarini qilaman. Men Quddus haqida: ‘Bu yerda yana inson yashaydi’, deb aytmoqdaman. Yahudo shaharlari haqida: ‘Ular qaytadan quriladi, Vayronalarini tiklayman’, deb aytmoqdaman.

²⁷Chuqur suvlarga shunday deyman: ‘Qurib bit! Daryolaringni quritaman.’

²⁸Shoh Kurush [4] haqida shunday deyman: ‘U Mening cho‘ponim. Mening barcha xohishimni u bajaradi.’ Kurush shunday deydi: ‘Quddus qayta qurilsin, Ma’bad yana tiklansin.’”