Read O‘zbek tilidagi Muqaddas Kitob, 2013 Ishayo 46 Bible Online

Ishayo 46 - O‘zbek tilidagi Muqaddas Kitob, 2013 bible

Ishayo 46

¹Egam aytar: “Bel tiz cho‘kdi, Navo [1] bukildi. Ularning butlari molu hayvonga yuk bo‘ldi. Oldin ko‘tarib yurganlaringiz Endi toliqqanga yuk bo‘ldi.

²Ular egildi, birga tiz cho‘kdi, Ular endi yukni qutqara olmaydi, O‘zlari esa asir bo‘lib ketadi.

³Ey Yoqub xonadoni! Menga quloq soling! Ey Isroil xonadonining omon qolganlari! Ey xalqim! Tug‘ilganingdan beri seni onaday ko‘tarib yurdim, Ha, dunyoga kelmasingdan oldin Men tayanching bo‘ldim.

⁴Keksayguningcha ham Men O‘shaman, Soching oqarganda ham seni ko‘tarib yuraman. Men seni yaratganman, O‘zim seni ko‘taraman. O‘zim seni ko‘tarib, qutqaraman.

⁵Meni kimga o‘xshatasan?! Kimga tenglashtirasan?! Meni kimga taqqoslaysan?! Nima, Men o‘shalar bilan teng bo‘lib qoldimmi?!

⁶Mana, odamlar hamyondan tilla chiqaradilar. Kumushni tarozilarda tortadilar. Usta yollab, xudo yasatadilar. Ular o‘sha xudosiga ta’zim qiladilar. Ha, unga sajda qiladilar.

⁷O‘sha xudosini opichlab olib boradilar, Uni joyiga o‘rnatib, turg‘izib qo‘yadilar. U joyidan qimirlamay turaveradi. Kimdir unga yolvorganda, javob bermaydi, Mashaqqatidan xalos qila olmaydi.

⁸Buni yodda tuting, mahkam bo‘ling! Ey isyonkorlar, buni esga olib turing!

⁹Azaldan bo‘lganlarni yodda tuting! Axir, Men Xudoman, boshqasi yo‘q! Men Xudoman, Menga o‘xshagani yo‘q!

¹⁰Oxirida nima bo‘lishini boshidayoq aytaman. Yuz bermaganlarni oldindan bildiraman. ‘Niyatlarim bajo bo‘ladi, Barcha istaklarimni ijro etaman’, deb aytmoqdaman.

¹¹Sharqdan yirtqich qushni chaqiryapman. Ha, xohishimni bajaradiganni Uzoq yurtdan chaqiryapman [2]. Men O‘z aytganimni bajo qilaman! Ha, o‘ylaganimni amalga oshiraman!

¹²Menga quloq soling, ey o‘jarlar! G‘alaba uzoq, deb o‘ylaganlar!

¹³Mana, g‘alaba keltiraman. U uzoqda emas, najotim kechikmaydi. Men Quddusga [3] najot ato qilaman, Isroilga O‘z ulug‘vorligimni beraman.”