Read O‘zbek tilidagi Muqaddas Kitob, 2013 Ishayo 47 Bible Online

Ishayo 47 - O‘zbek tilidagi Muqaddas Kitob, 2013 bible

Ishayo 47

¹Egam aytar: “Pastga tush, tuproqqa o‘tir, Ey bokira qiz [1]Bobil! Yerga o‘tir, endi taxting yo‘q, Ey Bobilliklar! [2] Mana, endi sen to‘g‘ringda: ‘Naqadar nozik, mayindir’, deb aytmaslar.

²Qani, tegirmon toshini ol, don yanchgin. Yopinchig‘ingni yech, etagingni yig‘ishtir, Boldiringni och, daryolardan kechib o‘t [3].

³Yalang‘och joylaring ochiladi, Sharmandaliging ko‘rinib qoladi. Men qasos olaman, Hech kimga shafqat qilmayman.”

⁴Qutqaruvchimiz Isroil xalqining muqaddas Xudosidir. Uning nomi Sarvari Olamdir.

⁵Egam aytar: “Jim o‘tir, qiz Bobil! [4] Zulmatga jo‘na! Endi seni: ‘Yurtlarning malikasi’, deb aytmaydilar.

⁶Men xalqimdan g‘azablandim, O‘z mulkimni harom qildim. Ularni sening qo‘lingga berdim. Sen esa ularga shafqat qilmading, Hatto keksalarning yelkasiga ham G‘oyat og‘ir bo‘yinturuq solding.

⁷Shunda: ‘Men to abad olamning malikasi bo‘laman’, deb aytding. Ammo bularning nima bilan tugashini O‘ylab ko‘rmading, aqlingga keltirmading.

⁸Endi bunga quloq sol! Ey hashamatni sevuvchi! Bexatar o‘tirib, o‘zingcha aytasan: ‘Mendan boshqa malika yo‘q, Tul qolmasman, farzand dog‘ini ko‘rmasman.’

⁹Mana shu ikkalasi ham Bir kunda boshingga tushadi: Ha, ko‘p sehr–jodular qilarding, Afsunlaringning kuchi ko‘p edi. Shunda ham tamomila bolalaringdan ayrilasan, Tul bo‘lib qolasan.

¹⁰O‘z yovuzligingga ishonding, ‘Meni hech kim ko‘rmaydi’, deding. Donoliging, biliming seni yo‘ldan adashtirdi, O‘zingga: ‘Mana, men! Mendan boshqasi yo‘q’, deding.

¹¹Mana, boshingga kulfat tushadi, Uni sehr–jodu bilan daf qilolmaysan. Boshingga baxtsizlik yog‘iladi, Sen uni qaytara olmaysan. Halokat senga birdaniga keladi, Bu tushingga ham kirmagan.

¹²Qani, sehr–joduingni ishga sol, Ko‘proq afsungarlik qil, Axir, yoshligingdan bunday ishlarga Sen odatlangansan. Balki biron narsaga erisharsan, Balki birontasini qo‘rqitarsan.

¹³Olgan maslahatlaring ko‘pligidan Sen charchab qolding. Qani, endi o‘sha munajjimlaring, ta’birchilaring? Har yangi oy chiqqanda taqdiringdan bashorat qiladiganlar qani? Ular kelsin–chi! Endi o‘shalar seni qutqarsin.

¹⁴Ana, hammalari somonga o‘xshab qoldi–ku! Olov ularni yamlamay yutadi! Jonlarini olovdan qutqarolmaydi. Isinish uchun ko‘mirlari bo‘lmaydi. Oldida o‘tiray, desa olovi bo‘lmaydi [5].

¹⁵Yoshligingdan sen bilan oldi–berdi qilgan har bir odam, Sen bilan birga ishlaganlarning hammasi shunday bo‘lib qoladi. Ular o‘z yo‘liga qarab ketadi! Seni qutqaradigan biror kimsa bo‘lmaydi.”