Read O‘zbek tilidagi Muqaddas Kitob, 2013 Ishayo 48 Bible Online

Ishayo 48 - O‘zbek tilidagi Muqaddas Kitob, 2013 bible

Ishayo 48

¹Eshiting buni! Ey Yoqub xonadoni! Ey Isroil nomi bilan ataladiganlar, Yahudo urug‘idan chiqqanlar! Sizlar Egamizning nomi bilan qasam ichasizlar, Isroil xalqining Xudosini tilga olasizlar, Ammo haqiqat va solihlik bilan emas.

²Ha, sizlar o‘zingizni muqaddas shahar [1] nomi ila atadingiz, Isroil xalqining Xudosiga tayandingiz, Axir, Uning nomi Sarvari Olamdir.

³Egamiz sizlarga shunday dedi: “Bo‘lib o‘tganlarni oldindan Men aytdim, Og‘zimdan chiqishi bilan bularni bildirdim, Birdaniga harakat qildim va ular sodir bo‘ldi.

⁴Axir, qaysarligingni Men bilaman–ku! Bo‘yning temirday, peshanang bronzaday qattiqdir!

⁵‘Bularni mening sanamim qildi, Quyma, o‘yma butlarim amr qildi’, deb Aytmagin, deya Men oldindan aytdim, Bajo bo‘lmasdan oldin, bo‘lib o‘tganlarni bildirdim.

⁶Bularning hammasini eshitding, Nahotki endi e’tirof etmasang?! Hozirdan boshlab yangilarini, O‘zing bilmagan yashirin narsalarni Senga eshittirdim.

⁷Bular hozir yaratildi, qadimda emas, Bu to‘g‘rida sen ilgari eshitmagansan. Yo‘q! Sen: ‘Men bularni bilaman–ku!’ — deb ayta olmaysan.

⁸Ha, eshitmagansan, bilmaysan ham, Hatto azaldan ham quloqlaring ochilmagandi. Men bilaman–ku xiyonatkor ekanligingni, Tug‘ilganingdanoq sen isyonkor deb atalgansan.

⁹O‘zimning ismim haqi g‘azabimni bosyapman, Sharafim haqi O‘zimni tutyapman, Bo‘lmasa, seni yo‘q qilgan bo‘lardim.

¹⁰Mana, Men seni pokladim, Ammo kumushday qilib emas. Seni kulfat o‘chog‘ida sinadim.

¹¹O‘z haqim, ha, O‘z haqim uchun shunday qilaman! Axir, nimaga Men badnom bo‘lishim kerak?! Shuhratimni birovga berib qo‘ymayman.

¹²Menga quloq tut, ey Yoqub xonadoni! O‘zim chaqirgan Isroil xalqi, eshit! Men O‘shaman! Boshi ham, oxiri ham Men O‘zimman.

¹³Ha, Mening qo‘lim zaminning poydevorini [2] qo‘ygan, Samolarni yoygan Mening qo‘limdir. Men ularni chaqirganimda Ular birgalikda turadi.

¹⁴Hammangiz to‘planib, eshiting! Butlarning qaysisi bularni bildirdi?! Kurushni [3] Men, Egangiz, yaxshi ko‘raman. U Bobilda Mening niyatimni bajo keltiradi. Mening qo‘lim Bobilliklarga [4] qarshi bo‘ladi.

¹⁵Men aytdim! Ha, Men O‘zim aytdim! Uni Men chaqirganman! Uni Men olib keldim, U g‘alabaga erishadi.

¹⁶Menga yaqinlashing! Bunga quloq soling! Azaldan hech narsani yashirmay aytdim, Boshidanoq Men o‘sha yerdaman.” Mana endi Egamiz Rabbiy meni Hamda O‘z Ruhini yubormoqda [5].

¹⁷Qutqaruvchingiz, Isroil xalqining muqaddas Xudosi — Egamiz shunday aytmoqda: “Men Egangiz Xudoman! Yaxshi bo‘ling, deb sizlarga yo‘l–yo‘riq ko‘rsataman, Yuradigan yo‘llaringizdan yetaklayman.

¹⁸Qani, endi amrlarimga quloq solganingizda! Farovonligingiz daryoday bo‘lardi, Zafaringiz dengiz to‘lqinlariday bo‘lardi.

¹⁹Urug‘ingiz qum kabi bo‘lardi, Naslingiz qum zarralariday son–sanoqsiz bo‘lardi. Ularning nomi o‘chib ketmagan bo‘lardi, Mening oldimdan yo‘qotilmagan bo‘lardi.”

²⁰Endi Bobildan chiqib keting, Bobilliklardan qoching. Shodlik hayqiriqlari ila e’lon qiling! Dunyoning to‘rt chetiga bu xabarni yetkazing! “Egamiz O‘z qullari, Yoqub naslini qutqardi”, deb ayting!

²¹Egamiz ularni sahrodan olib borganda, Ular tashnalikdan qiynalmadilar. Xudo ular uchun qoyadan suv chiqardi [6]. U qoyani yordi, suvlar pishqirib chiqdi.

²²“Yovuzlarga omonlik yo‘q”, deydi Egamiz.