Read O‘zbek tilidagi Muqaddas Kitob, 2013 Ishayo 52 Bible Online

Ishayo 52 - O‘zbek tilidagi Muqaddas Kitob, 2013 bible

Ishayo 52

¹Uyg‘on, uyg‘on, ey Quddus, Kuch–qudratga to‘lgin. Ajoyib kiyimlaringni kiygin, Ey Sion, muqaddas shahar! Mana endi sunnatsizlar, nopoklar Darvozalaringdan ichkari kirmaydi!

²Tuproqni qoqib tashla, tur! Ey Quddus, o‘z joyingda o‘tir! Bo‘yningdagi zanjirni uzib tashla, Ey asira qiz [1] Sion!

³Mana Egamiz shunday demoqda: “Sizlar bepul sotilgan edingiz, endi pulsiz qutqarilasiz.”

⁴Ha, Egamiz Rabbiy shunday demoqda: “Oldin xalqim Misrga bordi. U yerda musofir bo‘ldi. Keyin Ossuriyaliklar sababsiz ularga zulm o‘tkazdi.

⁵Bu nimasi? — demoqda Egamiz. — Xalqim behudaga bosib olindi. Hukmdorlari faryod qilmoqda, — demoqda Egamiz. — Mening nomim doimo, kun bo‘yi haqorat qilinmoqda.

⁶Shu bois xalqim nomimni bilib oladi. Ha, Men gapirayotganimni o‘sha kuni ular bilib oladi. Mana, Men O‘shaman.”

⁷Tog‘lar osha tinchlikni e’lon qilgan Xabarchining qadamlari naqadar go‘zal! U xushxabar olib kelmoqda, U najotni e’lon qilmoqda, U Quddusga [2]: “Xudoying hukmrondir”, demoqda.

⁸Quloq soling! Soqchilaringiz ovozini ko‘tarmoqda, Birgalikda ular shodlikdan kuylamoqda! Axir, Egamiz Quddusga qaytib kelganda Ular o‘z ko‘zlari bilan ko‘radi.

⁹Ey Quddus vayronalari! Birgalikda sevinch ila hayqiring. Egamiz O‘z xalqiga tasalli berdi, Quddusni qutqarib, O‘ziga oldi!

¹⁰Hamma xalqlarning ko‘z o‘ngida Egamiz muqaddas qo‘lini ko‘rsatdi. Xudoyimizning najotini Yerning to‘rt burchi ko‘radi.

¹¹Keting, keting, u yerdan chiqing! Harom bo‘lganlarga tegib ketmang! Ey Egamizning muqaddas ashyolarini ko‘taradiganlar [3], U yerdan chiqinglar, poklaninglar!

¹²Mana, siz shoshilmay yo‘lga chiqasiz, Qochishingizga aslo hojat qolmaydi. Axir, Egamiz oldingizdan bormoqda, Isroil xalqining Xudosi ortingizdan Sizni qo‘riqlamoqda.

¹³Egam aytar: “Mana, Mening qulim yashnaydi, U ko‘tarilib, yuksaladi, G‘oyat balandga ko‘tariladi.

¹⁴Ilgari uning qiyofasi shunday badbashara ediki, Inson zotiga o‘xshash joyi qolmagan edi. Shu bois ko‘plar uning [4] oldida dahshatga tushdi,

¹⁵Endi esa u ko‘p xalqlarni hayratda qoldiradi, Uni deb shohlar ham lol bo‘lib qoladi. Axir, ularga aytilmaganlarni ko‘radilar, Eshitmaganlarini ular anglab yetadilar.”