Read O‘zbek tilidagi Muqaddas Kitob, 2013 Ishayo 54 Bible Online

Ishayo 54 - O‘zbek tilidagi Muqaddas Kitob, 2013 bible

Ishayo 54

¹Egam aytar: “Ey bola ko‘rmagan bepusht ayol! Shodlikdan hayqir! Ey to‘lg‘oq og‘rig‘ini bilmagan ayol! Sevinchdan hayqir! Axir, tashlab ketilgan ayolning bolalari Eri bor xotinnikidan ham ko‘proq bo‘ladi.

²Chodiring joyini kengaytirgin, Chodiring pardalarini keng cho‘zdirgin! Hech narsani ayama! Arqonlaringni uzun tashlagin, Qoziqlaringni mahkam qoqqin!

³Axir, mulking o‘ngu so‘lga kengayib ketadi. Avloding xalqlarni mulk qilib oladi, Ular tashlandiq shaharlarni to‘ldiradi.

⁴Qo‘rqma, uyatga qolmaysan, Uyalma, sharmanda bo‘lmaysan! Axir, sen yoshligingdagi sharmandalikni unutasan, Bevaligingdagi sharmandalikni boshqa eslamaysan.

⁵Zotan, Men, Yaratuvching, sening ering bo‘laman. Mening nomim Sarvari Olamdir! Men, Isroil xalqining muqaddas Xudosi, Qutqaruvchingman, Men butun yer yuzining Xudosi, deb atalaman.

⁶Ey Isroil! Sen tashlab ketilgan, Ruhi azoblangan ayoldaysan. Rad etilgan, yosh xotindaysan. Ammo Men, Egang, seni chaqirib olaman, — demoqda Xudoying. —

⁷Qisqa vaqtga Men seni tark etgandim, Buyuk shafqat ila seni qaytarib olaman.

⁸Qattiq g‘azabda sendan bir lahzaga yuz o‘girgandim, Endi tuganmas mehr bilan senga rahm qilaman, — demoqda Qutqaruvching — Egamiz. —

⁹Ha, Men uchun bu Nuh davri kabidir. Endi yer yuzini Nuh to‘foni kabi, Hech qachon suv bosmaydi, deb ont ichganman. Xuddi shunday qilib, yana ont ichaman: ‘Hech qachon sendan g‘azablanmayman, Senga jahl qilmayman!’

¹⁰Tog‘lar o‘rnidan qo‘zg‘alsa ham, Tepaliklar tebransa ham, Mening sodiq sevgim sendan ketmaydi, Mening tinchlik ahdim o‘zgarmaydi, — demoqda seni sevguvchi — Egamiz. —

¹¹Ey mazlum shahar! Bo‘ronlarda qolding, ammo hech kim seni yupatmadi! Mana, Men firuza toshlar ishlatib, seni qayta quraman. Zangori yoqut toshlardan senga poydevor qo‘yaman.

¹²Minoralaringni yoqutlardan quraman, Darvozalaringni gavharlardan qilaman, Barcha devorlaringni qimmatbaho toshlardan quraman.

¹³Hamma bolalaringga Men, Egang, ta’lim beraman, Farzandlaringning tinchligi buyuk bo‘ladi.

¹⁴Men seni dushmanlaringdan xalos qilganimda Sen bexatar bo‘lasan. Zulm sendan uzoqda bo‘ladi, Halokatdan qo‘rqmaysan, Chunki u senga yaqinlashmaydi.

¹⁵Agar kimdir senga hujum qilsa, Bilginki, uni Men qilmagan bo‘laman. Senga hujum qilgan har kim mag‘lub bo‘ladi.

¹⁶Temirchiga qara! U toshko‘mir cho‘g‘ini puflaydi, Ishi uchun asboblarini yasaydi. Uni Men yaratganman. Vayron qilsin, deb Bosqinchini ham Men yaratdim.

¹⁷Senga qarshi yasalgan Hech qanday qurol g‘alaba qilmaydi. Sen bilan da’volashgan har bir odamning Da’volarini sen yo‘qqa chiqarasan. Ana shular Mening qullarimning ulushidir, Ularni Men oqlayman.” Egamizning kalomi shudir.