Read O‘zbek tilidagi Muqaddas Kitob, 2013 Ishayo 56 Bible Online

Ishayo 56 - O‘zbek tilidagi Muqaddas Kitob, 2013 bible

Ishayo 56

¹Egamiz shunday aytmoqda: “Adolatni himoya qiling, To‘g‘ri ishlarni qiling. Zotan, najotim yaqinda keladi, Adolatim tez orada zohir bo‘ladi.

²Shabbat kunini tahqirlamay, Unga rioya qiladigan inson baxtlidir! Har qanday yovuzlikdan qo‘lini tiyib, Barqaror bo‘lgan inson baxtlidir!”

³Begona xalqdan bo‘la turib, O‘zini Egamizga bag‘ishlagan odam: “Egamiz meni albatta O‘z xalqidan ajratadi”, deb aytmasin. Bichilgan erkak ham: “Men qurigan daraxtman”, deb aytmasin.

⁴Zotan, Egamiz o‘sha erkaklarga shunday aytmoqda: “Shabbat kuniga rioya qiling. Meni mamnun qiladiganlarni tanlang. Mening ahdimga sodiq bo‘ling.

⁵Shunda sizlarga uyimda O‘g‘ilu qizlarimnikidan ham ko‘ra, Yaxshiroq nom, xotira beraman. Bu nom yo‘qolmaydigan, abadiy bir nom bo‘ladi.”

⁶Egamizni sevib, xizmat qiladigan, Shabbat kuniga rioya etadigan, Egamizning ahdiga sodiq bo‘lgan, Begona xalqdan bo‘lib turib, O‘zini Egamizga bag‘ishlaganlarga Egamiz shunday demoqda:

⁷“Men sizlarni muqaddas tog‘imga [1] olib kelaman. Ma’badimda sizlarni mamnun qilaman. Kuydiriladigan qurbonliklaru nazrlaringiz Qurbongohimda qabul bo‘ladi. Mening uyim, barcha xalqlarning Ibodat uyi, deb ataladi.”

⁸Tarqalib ketgan Isroil xalqini yig‘adigan Egamiz Rabbiy aytmoqda: “Uyimda yig‘ilganlar yoniga Men yana boshqalarni yig‘ib kelaman.”

⁹Ey dashtdagi hamma hayvonlar, Ey o‘rmondagi barcha hayvonlar! Kelinglar, xalqimni yeb bitiringlar!

¹⁰Isroilning soqchilari ko‘rdir! Ularning hammasi idroksiz, Vovullamaydigan tilsiz itlar kabidir. Yotib olib, tush ko‘radilar, Ular uyquni yaxshi ko‘radilar.

¹¹Ular to‘yganini bilmagan Ochko‘z itlarga o‘xshar, Bu cho‘ponlar idroksiz! O‘z foydasini ko‘zlab, Har biri o‘z yo‘lidan ketdi.

¹²Ular shunday deydi: “Qani, kelinglar, sharob ichaylik, Ichkilikka rosa to‘yaylik. Erta ham bugun kabi bo‘ladi, Hatto undan ham yaxshiroq bo‘ladi.”