Read O‘zbek tilidagi Muqaddas Kitob, 2013 Ishayo 57 Bible Online

Ishayo 57 - O‘zbek tilidagi Muqaddas Kitob, 2013 bible

Ishayo 57

¹Egam aytar: “Solih odamlar o‘lib ketyapti, Hech kim bu haqda fikr yuritmaydi. Taqvodorlar yo‘q bo‘lyapti. Yovuzlikdan qutqarilsin, deb Solihlar olamdan o‘tadi. Hech kim bu haqda o‘ylab ko‘rmaydi.

²Solih insonlar tinchlikka erishadi, To‘g‘ri yurganlar o‘limda ham orom topadi.

³Sizlar esa, ey folbinning o‘g‘illari, Yaqinroq keling! Bu yoqqa keling, ey zinokor, fohishalar urug‘i!

⁴Xo‘sh, sizlar kimning ustidan kulyapsiz? Kimga qarshi og‘iz ochyapsiz? Kimga qarab tilingizni chiqaryapsiz? Axir, itoatsizlarning bolalarisiz–ku! Yolg‘onchining urug‘idan kelib chiqqansizlar–ku! Shunday emasmi?!

⁵Har bir yam–yashil daraxt ostida [1] Shahvat bilan gunohga berildingiz! [2] Daryo bo‘ylarida, qoyalar kovagida O‘z farzandlaringizni qurbonlik qildingiz!

⁶Sizlar sevgan butlar daryoning silliq toshlari orasidadir! Ha, o‘sha butlarga sizlar ko‘ngil qo‘ygansiz! Ana o‘shalarga ichimlik nazrlari berdingiz, Ularga don nazrlarini atadingiz. Xo‘sh, bular Meni qondirsinmi?!

⁷Baland, buyuk tog‘da yotoq qurasiz, Qurbonlik keltiray, deb o‘sha yerga chiqasiz.

⁸Eshiklaringiz orqasiga, Eshiklaringizning kesakisi [3] ortiga Jirkanch tamg‘alaringizni qo‘ydingiz. Ha, Mendan yuz o‘girdingiz, Yalang‘och bo‘lib yotog‘ingizga kirdingiz, O‘ynashlaringiz bilan ahd tuzdingiz, Ular bilan yotishni juda yoqtirib qoldingiz. Ularning yalang‘och badanidan ko‘z uzmadingiz.

⁹Zaytun moyi bilan ko‘pgina xushbo‘y atirlar olib, O‘z shohingizga [4] hadyalar qildingiz. Uzoqlarga, hatto o‘liklar diyoriga [5] Elchilaringizni yubordingiz.

¹⁰U yoqdan–bu yoqqa yuraverib, toliqdingiz, Ammo shunda ham umidingizni uzmadingiz. Qaytadan kuch tikladingiz, Shu bois hech zaiflashmadingiz.

¹¹Kim sizlarni vahimaga soldi? Kim sizlarni shunchalik qo‘rqitdi? Yolg‘on gapirdingiz. Meni eslamadingiz! Men haqimda o‘ylab ham ko‘rmadingiz! Uzoq sukut saqlaganim sababli Mendan qo‘rqmay qo‘ydingiz!

¹²Mana endi, o‘zingizcha to‘g‘ri, deb bilgan O‘sha ishlaringizni ochib tashlayman. Ular sizga bitta ham foyda keltirmaydi.

¹³Yordam so‘rab, faryod qilganingizda Atrofingizdagi butlar sizlarni qutqarsin! Ularning hammasini shamol supurib ketadi, Shabada ularni uchirib ketadi. Mendan panoh topganlar esa yurtni mulk qilib oladi, Ular Mening muqaddas tog‘imga [6] egalik qiladi.”

¹⁴Egam shunday aytmoqda: “Tuproq yig‘ib, yo‘lni tayyorlang, Xalqim yo‘lidagi to‘siqlarni olib tashlang.”

¹⁵Yuksak, yuqori bo‘lgan, abadiy yashaydigan Egamiz, Nomi muqaddas Egamiz shunday aytmoqda: “Men yuksakda, muqaddas maskanda yashayman. Kamtarlar ruhini qayta tiklay, deb Itoatkorlar qalbini jonlantiray, deb Ruhi kamtar, itoatkor odamlar bilan birgaman.

¹⁶Axir, Men to abad da’volashmayman, Abadiy qahr–g‘azabda bo‘lmayman. Aks holda Men yaratgan tirik jonzot, Inson zoti oldimda tura olmasdi.

¹⁷Ularning gunohu hasadgo‘yligi tufayli G‘azablanib, ularni jazoladim. Qahr bilan ulardan yuz o‘girdim, Ammo baribir istagan yo‘llaridan ketdilar.

¹⁸Ularning yurgan yo‘llarini ko‘rdim, Mayli, endi shifo berib, yo‘l ko‘rsataman, Ularga ham, aza tutayotganlarga ham O‘zim tasalli beraman.

¹⁹Ularning tillarini madhiyaga to‘ldiraman. Uzog‘u yaqindagilarga tinchlik bo‘lsin! — demoqda Egamiz. — Men ularga shifo beraman.

²⁰Fosiqlar esa to‘lqinlangan dengizdaydir. Ha, ular tinch tura olmaydigan dengizga o‘xshaydi. O‘sha dengizning suvlari loy, balchiq keltiradi.”

²¹Xudoyim shunday deydi: “Yomonlarga tinchlik yo‘q.”