Read O‘zbek tilidagi Muqaddas Kitob, 2013 Ishayo 58 Bible Online

Ishayo 58 - O‘zbek tilidagi Muqaddas Kitob, 2013 bible

Ishayo 58

¹Egam aytar: “O‘zingni tutmay, qattiq hayqirgin, Karnayga o‘xshab, ovozingni baland ko‘tar. Xalqimga itoatsizligini aytgin, Yoqub xonadoniga gunohkorligini ko‘rsat.

²Xuddi to‘g‘ri yo‘ldan yurgan xalqqa o‘xshab, Ular har kun Menga intilganday bo‘ladi. Xudosining amrlarini unutmagan xalqday, Yo‘llarimni bilmoq istaydi. Mendan odil hukm so‘raydi, Men, Xudoga yaqinlashishni istaganga o‘xshaydi.

³Ey xalqim, sizlar Menga: ‘Ro‘za tutyapmiz–ku, Sen ko‘rmayapsan, Senga itoat qilyapmiz–ku, nega bilmaysan?!’ deb aytasizlar. Axir, ro‘za tutgan kuningizda xohlaganingizni qilyapsiz, Ishchilaringizdan og‘ir mehnat talab etyapsiz.

⁴Mana, ro‘za tutsangiz ham Janjal, g‘avg‘o qilaverasiz. Zo‘ravonlik bilan qo‘l ko‘taraverasiz. Bunday ro‘zalaringiz bilan Ovozingizni samolarga yetkaza olmaysiz!

⁵Ro‘za tutganingizda o‘zingizni qiynaysiz, Egilgan qamishday boshingizni egib yurasiz, Qanor yoyib, kul sochib ustiga yotasiz [1]. Shuni ro‘za deb ataysizmi?! Mana shular Men, Egangizni mamnun qiladi, deb o‘ylaysizmi?!

⁶Men istagan ro‘za quyidagidaydir: Adolatsizlik kishanlarini parchalang, Bo‘yinturuq arqonlarini uzib tashlang, Mazlumlarni ozodlikka chiqaring, Har qanday bo‘yinturuqni sindiring!

⁷Ovqatingizni ochlar bilan baham ko‘ring, Uysizlarga uyingizdan joy bering. Yalang‘ochni ko‘rganingizda kiyim bering, Yaqinlaringizdan yordamingizni ayamang.”

⁸Shunda nuringiz tong kabi porlaydi, O‘zingiz tezda shifo topasiz. Egamiz doim oldingizda yurib, sizlarni asraydi, Ortingizdan Uning ulug‘vorligi sizni qo‘riqlaydi.

⁹Shunda yordam so‘raganingizda, Egamiz javob beradi, Faryod qilganingizda, “Shu yerdaman”, deb aytadi. Orangizdan bo‘yinturuqni yo‘q qilganingizda, Yovuz gaplaru qo‘l ko‘tarishlarni bas qilganingizda,

¹⁰Ochlar uchun jon kuydirganingizda, Mazlumlarning joniga oro kirganingizda, Nuringiz zulmatda ham porlaydi, Eng qorong‘i davringiz yop–yorug‘ kunduzday bo‘ladi.

¹¹Egamiz doimo sizga yo‘l ko‘rsatadi, Qaqragan yerlarda ham joningizga oziq beradi, Shunda siz sug‘orilgan bog‘day, Suvlari qurimas buloqday bo‘lasiz.

¹²Qadimgi vayronalaringiz qayta tiklanadi, Ko‘hna poydevorlarni qayta ko‘tarasiz. Shunda sizlarni: “Buzuq devorni Tiklovchi, Ko‘chalarni qayta Quruvchi”, deb chaqirishadi.

¹³Shabbat kunini oyoq osti qilmang, Shu muqaddas kunda xohishingizni qilishdan o‘zingizni tiying. Shabbat kunini zavqli, deb biling. Egamizning muqaddas kunini sharafli, deb biling. Bu kunda o‘zingiz istagan yo‘ldan yurmang, Xohlaganlaringizni qilavermang, Istagan gaplaringizni gapiravermang.

¹⁴Shabbat kuniga rioya qilsangiz, Egamiz tufayli shodlik topasiz, U sizlarni yurtning baland cho‘qqilariga olib chiqadi, Otangiz Yoqubning mulkiga to‘ydiradi. Egamizning kalomi shudir!