Read O‘zbek tilidagi Muqaddas Kitob, 2013 Ishayo 60 Bible Online

Ishayo 60 - O‘zbek tilidagi Muqaddas Kitob, 2013 bible

Ishayo 60

¹Ey Quddus xalqi, tur, porlagin! Axir, nuring keldi, Egamizning ulug‘vorligi ustingga yog‘ildi.

²Mana, yer yuzini zulmat qopladi, Xalqlarni quyuq zulmat bosdi. Ammo Egamiz senga keladi, Sen uzra Uning ulug‘vorligi porlaydi.

³Xalqlar sening nuringga keladi, Tonggi yorug‘ligingga shohlar keladi.

⁴Boshingni ko‘tarib, atrofingga boq! Hammasi to‘planib, senga kelmoqda. O‘g‘illaringni uzoqlardan olib keladilar, Qizlaringni chaqaloqlarday qo‘llarda ko‘tarib keladilar.

⁵O‘shanda shularni ko‘rib, nur sochasan, Yuraging hapriqib, qinidan chiqquday bo‘ladi. Zotan, dengiz orqali keladigan boyliklar senga nasib etadi, Xalqlarning boyligi senga keladi.

⁶Yurting tuya suruvlariga to‘lib ketadi, Midiyon, Efaxning [1] bo‘taloqlari bilan to‘ladi. Ularning hammasi Shava yurtidan [2] keladi, Oltinu tutatqilar olib keladi. Ular Egamizga madhlar aytadi.

⁷Kedarning hamma qo‘y suruvlari senga keladi, Navayotning [3] qo‘chqorlari senga xizmat qiladi. Egamizning qurbongohida Ular qurbonlik, deb qabul qilinadi. Egamiz O‘z uyini yanada ulug‘vor qiladi.

⁸Bulutlar kabi uchayotgan nima u? Inlariga uchayotgan kaptarlarga o‘xshash nima u?

⁹Shubhasiz, dengiz ortidagi yurtlar Egamizga muntazir bo‘ladi. Isroil xalqining muqaddas Xudosi — Egangiz Xudoning sharafiga Tarshish [4] kemalari boshchiligida Bolalaringni uzoqdan olib kelishadi, Oltinu kumushlari bilan birga olib kelishadi. Zotan, Egamiz seni ulug‘vorlik bilan qoplagan.

¹⁰Egamiz Quddusga shunday deydi: “Begonalar devorlaringni tuzatadi, Shohlari senga xizmat qiladi. G‘azablanganimda senga jazo bergan bo‘lsam ham, Endi marhamat qilib, senga shafqat qilaman.

¹¹Darvozalaring doimo ochiq bo‘ladi, Ular kechayu kunduz yopilmaydi. Shunda xalqlar senga boyliklarini olib keladi, Ularni o‘z shohlari boshlab keladi.

¹²Senga xizmat qilmagan elatu shohlik yo‘q bo‘ladi, Ha, u xalqlar butunlay vayronaga aylanadi.

¹³Lubnonning faxrlangan daraxtlari senga keladi. Sarv, chinor, sadr yog‘ochlari Muqaddas maskanimni bezatish uchun keltiriladi. Oyog‘im turgan shu joyga Men shuhrat keltiraman.

¹⁴Senga zulm qilganlarning o‘g‘illari kelib, Senga ta’zim qiladilar. Sendan nafratlanganlarning hammasi Oyoqlaringga yiqiladi. Ular seni: ‘Egamizning shahri, Isroil xalqining muqaddas Xudosining shahri — Sion’, deb atashadi.

¹⁵Ilgari sen tashlab ketilgan, Hamma nafrat etgan, Biror kimsa o‘tmaydigan joy eding. Endi Men seni abadiy ulug‘vor qilaman, Jamiki nasllarning shodligi qilaman.

¹⁶Elatlar, shohlar seni ona kabi emizadilar, O‘shanda Men, Egang, sening najotkoring ekanligimni bilib olasan, Yoqub naslining qudratli Xudosi — Qutqaruvching Men ekanligimni anglaysan.

¹⁷Senga bronza o‘rniga oltin, Temir o‘rniga kumush, Yog‘och o‘rniga bronza, Tosh o‘rniga temir keltiraman. Tinchlik sening hakaming, Solihlik hukmdoring bo‘ladi.

¹⁸Yurtingda endi zo‘ravonlik tovushi eshitilmaydi, Chegarang ichida vayronagarchilik, halokat bo‘lmaydi. Devorlaringga, Najot, deya nom qo‘yasan, Darvozalaringga, Sharaf, deya nom berasan.

¹⁹Endi kunduzi nuringni quyosh bermaydi, Oy ham yorug‘lik manbaing bo‘lmaydi. Senga Mening O‘zim to abad nur manbayi bo‘laman, Men, Xudoying, sening ulug‘vorliging bo‘laman.

²⁰Quyoshing hech qachon botmaydi, Oying endi boshqa yashirinmaydi. Ha, Men sening to abad nuring bo‘laman, Qayg‘uli kunlaring tamom bo‘ladi.

²¹Xalqingning hammasi solih bo‘ladi, Ular yurtni to abad mulk qilib oladi. O‘zim o‘tqazgan niholdir ular, Menga shuhrat keltirsin, deb yaratgan Qo‘llarimning ijodi ular.

²²Eng kichik odamingdan mingta odam chiqadi, Eng zaif odamingdan kuchli xalq paydo bo‘ladi. Men, Egang, buni o‘z vaqtida tez bajo qildiraman.”