Read O‘zbek tilidagi Muqaddas Kitob, 2013 Ishayo 61 Bible Online

Ishayo 61 - O‘zbek tilidagi Muqaddas Kitob, 2013 bible

Ishayo 61

¹Egamiz Rabbiyning Ruhi meni qamrab olgan, Chunki U meni tanlagan. “Yo‘qsillarga xushxabar yetkazsin, Xasta qalblarga shifo bersin, Zindondagilarga, ‘qutulasiz’, desin, Asirlarga ozodlik e’lon qilsin”, deb Egam meni yubordi.

²“Egamning marhamat yilini, Xudoning qasos oladigan kunini e’lon qilsin, Azadorlarning hammasini ovutsin”, deb Egam meni yubordi.

³“Quddusda [1] nola qilayotganlarga tasalli bersin, Ularga kul o‘rniga zeb–ziynat, Aza o‘rniga shodlik moyi, Ma’yus ruh o‘rniga madhiya bersin”, deb Egam meni yubordi. Endi ularni, “Egamiz O‘z shuhrati uchun ekkan ko‘chatlar, Solihlik emanlari”, deb atashadi.

⁴Endi ular qadimgi vayronalarni qayta tiklaydi, Azaliy vayrona yerlarni yana o‘nglaydi, Nasllar osha vayron yotgan shaharlarni qayta quradi.

⁵Ey xalqim, begonalar kelib, mol–qo‘ylaringizni boqadi, Yot xalq o‘g‘illari dehqoningiz, bog‘boningiz bo‘ladi.

⁶Sizlarni esa Egamizning ruhoniylari, deb atashadi, Xudoyimizning xizmatkorlari, degan nom olasizlar. Elatlarning boyliklari sizlarniki bo‘ladi, O‘zga xalqlardan kelgan mol–mulk bilan faxrlanasiz.

⁷Uyat o‘rniga sizlar ikki hissa ulush olasiz. Sharmanda bo‘lmaysiz, olgan mulkingizdan shodlanasiz. Ha, o‘z yurtingizda ikki hissa ulush olasiz, Abadiy shodlikka ega bo‘lasiz.

⁸Egam aytar: “Men, Egangiz, adolatni sevaman, Talonchilik, haqsizlikdan nafratlanaman. Sadoqat bilan xalqimga mukofotini beraman. Ular bilan abadiy ahd tuzaman.

⁹Ularning nasli xalqlar orasida mashhur bo‘ladi, Ularning zurriyoti ellar orasida mashhur bo‘ladi, Ko‘rganlarning hammasi ularni, ‘Egamiz baraka bergan xalq’, deb tan oladi.”

¹⁰Egam tufayli men buyuk shodlik topaman, Xudoyim deb qalbim jo‘sh uradi. Zotan, U meni najot libosi bilan o‘radi, Zafar kiyimini menga kiydirdi. Men toj kiygan kuyovga o‘xshayman, Zeb–ziynat bilan bezangan kelindayman.

¹¹Yer o‘simlikni yetishtirgani kabi, Bog‘ ekilganlarni o‘stirgani singari, Egamiz Rabbiy barcha xalqlar ko‘z o‘ngida Solihlik va madhiyalarni yetishtiradi.