Read O‘zbek tilidagi Muqaddas Kitob, 2013 Ishayo 63 Bible Online

Ishayo 63 - O‘zbek tilidagi Muqaddas Kitob, 2013 bible

Ishayo 63

¹Edomdan kelayotgan kim? Qizil libos kiyib, Bozrax shahridan [1] kelayotgan kim? Ko‘zni qamashtiruvchi kiyimlar kiyib, Katta kuch bilan qadam bosgan kim? “Bu Men, Egangizman! Qutqarish kuchiga egaman. G‘alabani e’lon qilishga kelmoqdaman.”

²Nechun kiyimlaring qip–qizil? Nima uchun chuqurda uzum ezgan odamga [2] o‘xshaysan?

³“Chuqurda bir o‘zim ezdim, Yonimda xalqlardan birontasi yo‘q edi. G‘azab bilan ularni ezdim, Qahr bilan ularni oyoq osti qildim. Ularning qoni kiyimlarimga sachradi, Butun usti boshimni iflos qildi.

⁴Ha, Men qasos kunini tayinlab qo‘ygan edim, Xalqimni qutqaradigan kun yetib keldi.

⁵Qaradim, yordam beradigan biror odam yo‘q edi, Qo‘llab–quvvatlaydigan hech kimsa yo‘qligidan hayratda qoldim. Shunda O‘zimning qo‘lim yordamga keldi, O‘z g‘azabim Menga madad bo‘ldi.

⁶G‘azab bilan xalqlarni tepkiladim, Jahl bilan ularni ezib tashladim. Ularning qonini yerga to‘kdim.”

⁷Egamizning sodiq sevgisi haqida aytaman, Qilgan ishlari uchun Egamizga hamdlar aytaman. O‘zining mehr–shafqati, buyuk sevgisi bilan Isroil xonadoniga qilgan buyuk ezguliklari haqida aytaman.

⁸Egamiz shunday dedi: “Ha, ular Mening xalqimdir, Bevafolik qilmaydigan farzandlardir.” Shunday qilib, Xudo ularning najotkori bo‘ldi.

⁹Ular qiynalganlarida, U ham azob chekdi, Egamizning farishtasi ularni qutqardi. Sevgisi, shafqati tufayli Uning O‘zi ularni qutqardi. Egamiz ularni ko‘tarib, azaldan opichlab yurardi.

¹⁰Ammo ular isyon qildilar, Egamizning Muqaddas Ruhini ranjitdilar. Shuning uchun Egamiz ularning dushmani bo‘ldi. Egamizning O‘zi ularga qarshi kurashdi.

¹¹Shunda xalq o‘tgan kunlarni, Musoning davrini eslab, shunday dedi: “Cho‘ponlari bilan birga ota–bobolarimizni dengizdan o‘tkazgan qani? O‘z Muqaddas Ruhini ularning orasiga yuborgan qani?

¹²Ajoyib qudratli qo‘li bilan Musoning o‘ng qo‘lidan tutgan qani? O‘zining nomini sharaflay, deb Ularning oldidagi suvni ikkiga bo‘lgan qani?”

¹³Egamiz ularni dengiz tubidan olib o‘tdi. Tekis joyda yurgan otday Ular hech qoqilmasdan o‘tdi.

¹⁴Vodiyga yoyilgan podaga o‘xshatib, Egamizning Ruhi ularga orom berdi. O‘zining buyuk nomi ulug‘lansin, deya Egamiz O‘z xalqiga yo‘l ko‘rsatdi.

¹⁵Ey Egamiz, osmondan qara, Muqaddas, ulug‘vorlikka to‘la Maskaningdan boq! Qani endi g‘ayrating, qudrating? Sen mehribonligingni, shafqatingni Bizdan darig‘ tutding.

¹⁶Axir, Sen bizning otamizsan, ey Egamiz! Ibrohim bizni bilmaydi, Yoqub [3] bizni tanimaydi. Sen bizning otamizsan! Azaldan noming “Qutqaruvchimiz”dir.

¹⁷Ey Egamiz, nega bizni yo‘lingdan adashtirasan? Nega bizga Sendan qo‘rqmaydigan tosh yurak bergansan? Biz Sening qullaringmiz. Bizning haqi–hurmatimiz, O‘zingning aziz xalqing haqi–hurmati Bizga yuz burgin!

¹⁸Sening muqaddas maskaningga Biz, aziz xalqing, faqat oz vaqt egalik qildik. Endi esa dushmanlarimiz U yerni oyoq osti qilib tashladi [4].

¹⁹Biz allaqachon Senga tegishli bo‘lmagan, Sen ustidan hukmron bo‘lmagan xalqlarga o‘xshab qoldik.