Read O‘zbek tilidagi Muqaddas Kitob, 2013 Ishayo 65 Bible Online

Ishayo 65 - O‘zbek tilidagi Muqaddas Kitob, 2013 bible

Ishayo 65

¹Egam aytar: “Meni so‘ramaganlarga ko‘rindim, Meni izlamaganlar topdi. Menga iltijo qilmagan bir xalqqa: ‘Mana Men! Shu yerdaman!’ deb aytdim.

²Itoatsiz xalqni Kun bo‘yi quchoq ochib kutdim. Ana, ular o‘zlari xohlagan, To‘g‘ri bo‘lmagan yo‘llardan yuradi.

³Ular yuzimga qarab turib, Jahlimni chiqaradi. Sajdagoh bog‘larda [1] hech to‘xtovsiz qurbonliklar keltiradi, G‘isht qurbongohlarda [2] tutatqilar tutatadi.

⁴Ular qabrlar orasida o‘tirib, Yashirin joylarda arvohlarga maslahat soladi [3]. Ular cho‘chqa go‘shtini yeydi, Qozonlarida harom go‘sht qaynatadi.

⁵Ular boshqalarga shunday deydi: ‘Nariroq tur, menga tegma, Yana muqaddasligim yuqib qolmasin.’ Bularning hammasi kun bo‘yi yonib turgan olov kabidir. Ularning tutuni burnimni achitadi.

⁶Mana, hammasi ko‘z o‘ngimda yozib qo‘yilgan. Men jim turmayman, ularni jazolayman. Qilmishlariga yarasha ularga to‘liq qaytaraman.

⁷Ularni o‘zlarining gunohlari uchun, Hamda otalarining gunohlari uchun jazolayman, — demoqda Egamiz. — Axir, ular tog‘larda tutatqilar tutatdilar, Tepaliklarda Meni haqorat qildilar. Shu bois qilmishlariga yarasha Ularga jazosini beraman.”

⁸Egamiz shunday aytmoqda: “Agar bir bosh uzumda hali sharbati bor bo‘lsa, Odamlar: ‘Uni tashlab yubormang, Hali foydasi tegadi’, deb aytadi. Men ham O‘z qullarim haqi shunday qilaman, O‘z xalqimning hammasini yo‘q qilmayman.

⁹Tog‘larimni mulk qilib olsin, deb Isroil [4] va Yahudo xalqiga avlod beraman. Tanlagan xalqim tog‘larimga egalik qiladi, Mening qullarim u yerda yashaydi.

¹⁰Sharon tekisligi qo‘ylar suruvlari uchun yaylov bo‘ladi, Oxor soyligi [5] mol–qo‘ylar uchun o‘tloq bo‘ladi. Ha, bu yerlar Menga intilganlarniki bo‘ladi.

¹¹Ammo ba’zilaringiz Meni tark etdingiz, Muqaddas tog‘imni [6] unutdingiz! ‘Omad’ buti uchun dasturxon yozdingiz, ‘Qismat’ buti uchun qadahlarga sharob quydingiz!

¹²Shundaylarni Men qilichning damiga ro‘para qilaman. Hammangiz tiz cho‘kasiz, bo‘g‘izlanasiz. Axir, Men chaqirganimda javob bermadingiz, Gapirganimda quloq solmadingiz. Mening oldimda qabihliklar qildingiz, Men xohlamagan narsalarni tanladingiz.”

¹³Shu bois Egamiz Rabbiy aytmoqda: “Mening qullarim yeydi, sizlar esa och qolasiz, Qullarim ichadi, sizlar tashnalikdan azob chekasiz, Qullarim shod–xurram bo‘ladi, Sizlar esa sharmandayu sharmisor bo‘lasiz.

¹⁴Mana, qalblari shodlikka to‘lib, Mening qullarim qo‘shiqlar kuylaydi. Sizlar esa yuragingizdagi qayg‘udan dod–voy qilasiz, Ezilgan ruhingiz tufayli uvullab yig‘laysiz.

¹⁵Tanlagan xalqim orasida nomingiz la’nat so‘zi bo‘ladi, Men, Egangiz Rabbiy, sizlarni o‘ldiraman, O‘zimning qullarimga esa boshqa nom beraman.

¹⁶Kim o‘ziga bu yurtda baraka tilasa, Mening, ya’ni sodiq Xudoning nomi bilan duo qiladi. Yurtda kim ont ichadigan bo‘lsa, Mening nomim bilan ont ichadi. Oldingi qayg‘ular unutiladi, Qayg‘u ko‘z oldimdan yo‘qotiladi.

¹⁷Mana, qarang! Yangi osmon, yangi yer yaratyapman. Ilgari bo‘lganlar endi eslanmaydi, Ular hech qachon yodga olinmaydi.

¹⁸Yaratayotgan ishlarim tufayli To abad shodlaning, xursand bo‘ling. Men Quddusni shodlik qilib, Xalqini quvonch qilib yaratyapman.

¹⁹Men Quddus tufayli sevinaman, Xalqim Menga quvonch keltiradi. Endi Quddusda hech qachon Yig‘i, faryod tovushi eshitilmaydi.

²⁰U yerda endi go‘daklar o‘lmaydi, Biror qariya yoshini yashamay o‘tmaydi. Birontasi yuz yoshga kirib olamdan o‘tsa, U haqda: ‘Evoh, yosh ketdi’, deb aytadilar. Yuzga yetmay o‘lganni la’nati ekan, deb biladilar [7].

²¹Xalqim uylar qurib, o‘zlari o‘sha yerda yashaydi, Tokzorlar o‘tqazib, hosilini o‘zlari yeydi.

²²Endi ular qurgan uylarda boshqalar yashamaydi, Ekkan daraxtlarining hosili boshqalarga nasib bo‘lmaydi. Xalqimning umri chinor umriday uzoq bo‘ladi, Tanlagan xalqim o‘z qo‘llarining mahsulidan uzoq vaqt bahramand bo‘ladi.

²³Ularning mehnati behuda ketmaydi, Nasllari baxtsizlikka mubtalo bo‘lmaydi. Ular Men, Egasidan baraka topgan xalqdir, Ularning avlodiga ham Men baraka beraman.

²⁴Menga yolvormaslaridan ham oldin Xalqimga javob beraman. Gapirayotgan paytining o‘zidayoq Ularga quloq tutaman.

²⁵Bo‘ri bilan qo‘zichoq birga o‘tlab yuradi, Sher ham ho‘kiz kabi somon yeydi, Ilon esa tuproq yalaydi. Muqaddas tog‘imning biron yerida Hech bir yovuzligu yomonlik qilinmaydi.” Egamizning kalomi shudir.